Share on Facebook

Main News Page

ਗੁਰੂ ਗਰੰਥ ਸਾਹਿਬ ਦੇ ਬਰਾਬਰ ਕਿਸੇ ਡੇਰੇਦਾਰ ਬਾਬੇ ਦੀ ਗੱਦੀ ਜਾ ਕਿਸੇ ਗ੍ਰੰਥ ਦਾ ਪ੍ਰਕਾਸ ਨਹੀਂ ਹੋ ਸਕਦਾ
-: ਭਾਈ ਪੰਥਪ੍ਰੀਤ ਸਿੰਘ

* ਸੰਪਟ ਪਾਠਾਂ ਤੋਂ ਬਾਅਦ ਡੇਰੇਦਾਰਾਂ ਨੇ ਠੱਗੀਆਂ ਮਾਰਨ ਲਈ ਸੁਰੂ ਕੀਤੇ ਤੁੱਕ ਤੁੱਕ ਵਾਲੇ ਸੰਪਟ ਪਾਠ, ਸੰਗਤਾਂ ਸੁਚੇਤ ਰਹਿਣ

ਭਾਈ ਰੂਪਾ 4 ਸਤੰਬਰ ( ਅਮਨਦੀਪ ਸਿੰਘ ) : ਨੇੜਲੇ ਪਿੰਡ ਰੌਂਤਾ ਵਿਖੇ ਸਮੂਹ ਸੰਗਤਾਂ ਦੇ ਸਹਿਯੋਗ ਨਾਲ ਕਰਵਾਏ ਗਏ ਤਿੰਨ ਦਿਨਾ ਮਹਾਨ ਧਾਰਮਿਕ ਦੀਵਾਨ ਧੂਮ ਧਾਮ ਨਾਲ ਸਮਾਪਤ ਹੋ ਗਏ, ਜਿਸ ਦੌਰਾਨ ਸਿੱਖ ਕੌਮ ਦੇ ਉਘੇ ਪ੍ਰਚਾਰਕ ਭਾਈ ਪੰਥਪ੍ਰੀਤ ਸਿੰਘ ਜੀ ਖਾਲਸਾ ਭਾਈ ਬਖਤੌਰ ਵਾਲਿਆਂ ਵਲੋਂ ਤਿੰਨੇ ਦਿਨ ਵਿਸੇਸ ਤੌਰ 'ਤੇ ਹਾਜਰੀ ਭਰੀ ਗਈ। ਧਾਰਮਿਕ ਦੀਵਾਨਾਂ ਦੌਰਾਨ ਭਾਈ ਖਾਲਸਾ ਨੇ ਸਿੱਖੀ ਸਿਧਾਂਤਾ ਨੂੰ ਢਾਹ ਲਾਉਣ ਵਾਲੇ ਤੇ ਆਪਣੀਆਂ ਅੱਡ ਮਰਿਯਾਦਾਵਾਂ ਚਲਾ ਕੇ ਲੋਕਾਂ ਨੂੰ ਕੁਰਾਹੇ ਪਾਉਣ ਵਾਲੇ ਡੇਰੇਦਾਰ ਬਾਬਿਆਂ 'ਤੇ ਟਿਪਣੀ ਕਰਦਿਆਂ ਕਿਹਾ ਕਿ ਜਿਹੜੇ ਸਾਧ ਬਾਬੇ ਪੰਥਿਕ ਰਹਿਤ ਮਰਿਯਾਦਾ ਨੂੰ ਛੱਡ ਕੇ ਆਪਣੇ ਨਵੇਂ ਅਸੂਲ ਬਣਾਈ ਬੈਠੇ ਹਨ ਤੇ ਪੰਥਿਕ ਮਰਿਯਾਦਾ ਅਤੇ ਗੁਰੁਬਾਣੀ ਦੀ ਸਿਖਿਆ ਦੇ ਉੱਲਟ ਇਕੋਤਰੀਆਂ ਤੇ ਸੰਪਟ ਪਾਠ ਕਰ ਰਹੇ ਹਨ, ਇਹ ਇਹਨਾ ਅਖੌਤੀ ਸਾਧ ਬਾਬਿਆਂ ਵੱਲੋਂ ਚਲਾਇਆ ਹੋਇਆ ਠੱਗੀ ਜਾਲ ਹੈ ।

ਉਨ੍ਹਾਂ ਕਿਹਾ ਕਿ ਕਈ ਡੇਰੇਦਾਰ ਬਾਬਿਆਂ ਨੇ ਤਾਂ ਭੋਲੇ ਭਾਲੇ ਸਿੱਖਾਂ ਨਾਲ ਠੱਗੀਆਂ ਮਾਰਨ ਲਈ ਸੰਪਟ ਪਾਠਾਂ ਤੋਂ ਬਾਅਦ ਤੁੱਕ ਤੁੱਕ ਵਾਲੇ ਮਹਾ ਸੰਪਟ ਆਦਿ ਸ਼ੁਰੂ ਕਰ ਲਏ ਹਨ, ਸੰਗਤਾਂ ਇਨ੍ਹਾਂ ਅਖੌਤੀ ਡੇਰੇਦਾਰਾਂ ਤੋਂ ਬੱਚ ਕੇ ਰਹਿਣ, ਕਿਉਂਕਿ ਪੂਰੀ ਗੁਰਬਾਣੀ ਵਿੱਚ ਕਿਤੇ ਵੀ ਗੁਰਬਾਣੀ ਸੁਣੇ ਤੋਂ ਬਿਨਾ ਪਾਠ ਕਰਵਾਉਣ ਦਾ ਕੋਈ ਫਲ ਨਹੀਂ ਹੈ ਤੇ ਨਾ ਹੀ ਗਿਣਤੀਆਂ ਮਿਣਤੀਆਂ ਦੇ ਪਾਠਾਂ ਨੂੰ ਕੋਈ ਮਾਨਤਾ ਹੈ, ਪਰ ਇਹ ਅਖੌਤੀ ਸਾਧ ਬਾਬੇ ਗੁਰਬਾਣੀ ਨੂੰ ਜਾਦੂ ਟੂਣਾ ਮੰਤਰ ਸਮਝਕੇ ਕਮਾਈ ਕਰ ਰਹੇ ਹਨ ਤੇ ਸੰਗਤਾਂ ਤੋਂ ਪਾਠਾਂ ਦੇ ਨਾਮ 'ਤੇ ਹਜ਼ਾਰਾਂ ਰੁਪੈ ਇਕੱਠੇ ਕਰ ਰਹੇ ਹਨ, ਜਿਸ ਨਾਲ ਇਹ ਲਗਜ਼ਰੀ ਗੱਡੀਆਂ, ਆਲੀਸ਼ਾਨ ਡੇਰੇ, ਮਹਿੰਗੇ ਚੋਲੇ, ਕਾਜੂ ਬਦਾਮ ਆਦਿ ਦੀਆਂ ਸਹੂਲਤਾਂ ਮਾਨ ਰਹੇ ਹਨ ਕਈ ਠੱਗ ਬਾਬਿਆਂ ਨੇ ਸੰਪਟ ਪਾਠਾਂ ਦੇ ਨਾਮ 'ਤੇ ਠੱਗੀਆਂ ਮਾਰ ਮਾਰ ਕੇ ਦਿੱਲੀ ਤੱਕ ਜ਼ਮੀਨਾਂ ਜਾਇਦਾਦਾਂ ਬਣਾ ਲਈਆਂ ਹਨ। ਸੰਗਤਾਂ ਇਨ੍ਹਾਂ ਅਖੌਤੀ ਸਾਧ ਬਾਬਿਆਂ ਦਾ ਖਹਿੜਾ ਛੱਡ ਕੇ ਸੁਚੇਤ ਹੋਣ ਤੇ ਆਪ ਗੁਰਬਾਣੀ ਪੜ, ਸੁਣ, ਮੰਨ ਕੇ ਆਪਣੇ ਜੀਵਨ ਵਿਚ ਲਾਗੂ ਕਰਨ, ਫਿਰ ਹੀ ਸਾਡੇ ਜੀਵਨ ਦਾ ਆਧਾਰ ਹੋਣਾ ਹੈ।

ਉਹਨਾ ਕਿਹਾ ਕਿ ਗੁਰਬਾਣੀ ਦੀ ਆੜ ਵਿੱਚ ਠੱਗੀਆਂ ਮਾਰਨ ਲਈ ਕਈ ਡੇਰੇਦਾਰ ਬਾਬਿਆਂ ਨੇ ਤਾਂ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੇ ਬਰਾਬਰ ਆਪਣੀਆਂ ਗੱਦੀਆਂ ਲਗਾਉਣੀ ਸ਼ੁਰੂ ਕਰ ਦਿੱਤੀਆਂ ਹਨ, ਸੰਗਤਾਂ ਅਜਿਹੇ ਸਾਧ ਬਾਬਿਆਂ ਤੋਂ ਵੀ ਸੁਚੇਤ ਰਹਿਣ ਜੋ ਗੁਰੂ ਸਾਹਿਬ ਦੇ ਸਰੀਕ ਬਣੇ ਬੈਠੇ ਹਨ, ਕਿਉਂਕਿ ਸਿੱਖੀ ਸਿਧਾਂਤਾਂ ਅਤੇ ਪੰਥਕ ਰਹਿਤ ਮਰਿਯਾਦਾ ਦੇ ਅਨੁਸਾਰ ਗੁਰੂ ਸਾਹਿਬ ਦੇ ਬਰਾਬਰ ਕਿਸੇ ਡੇਰੇਦਾਰ ਬਾਬੇ ਦੀ ਗੱਦੀ, ਕਿਸੇ ਮੂਰਤੀ ਜਾਂ ਕਿਸੇ ਗਰੰਥ ਦਾ ਪ੍ਰਕਾਸ਼ ਨਹੀਂ ਹੋ ਸਕਦਾ, ਨਾਲ ਹੀ ਉਹਨਾ ਨੇ ਸਿੱਖ ਵਿਰਸੇ ਨਾਲੋਂ ਟੁੱਟ ਚੁੱਕੇ ਨੌਜਵਾਨਾਂ ਨੂੰ ਆਪਣੇ ਮਹਾਨ ਵਿਰਸੇ ਨਾਲ ਜੁੜਨ ਲਈ ਪ੍ਰੇਰਿਤ ਕੀਤਾ।

ਉਪਰੰਤ ਤਿੰਨੇ ਦਿਨ ਗੁਰੂ ਕਾ ਲੰਗਰ ਅਤੁੱਟ ਵਰਤਾਇਆ ਗਿਆ ਅਤੇ ਭਾਈ ਰੂਪ ਚੰਦ ਸੇਵਾ ਸੁਸਾਇਟੀ ਭਾਈ ਰੂਪਾ ਵਲੋਂ ਜੋੜਾ ਘਰ ਦੀ ਸੇਵਾ ਕੀਤੀ ਗਈ। ਧਾਰਮਿਕ ਦੀਵਾਨਾਂ ਤੋਂ ਉਪਰੰਤ ਖੰਡੇ ਬਾਟੇ ਦੀ ਪਾਹੁਲ ਵੀ ਛਕਾਈ ਗਈ, ਜਿਸ ਦੌਰਾਨ 85 ਪ੍ਰਾਣੀ ਅਮ੍ਰਿੰਤ ਛੱਕ ਕੇ ਗੁਰੂ ਵਾਲੇ ਬਣੇ।


ਜੇ ਕਿਸੇ ਪਾਠਕ ਨੇ ਕੁਮੈਂਟ ਕਰਨਾ ਹੋਵੇ ਤਾਂ ਇੱਥੇ ਕਲਿੱਕ ਕਰਕੇ ਕਰ ਸਕਦਾ ਹੈ।


ਵਾਹਿ ਗੁਰੂ ਜੀ ਕਾ ਖ਼ਾਲਸਾ, ਵਾਹਿ ਗੁਰੂ ਜੀ ਕੀ ਫ਼ਤਿਹ॥
ਖ਼ਾਲਸਾ ਨਿਊਜ਼ ਸਿਰਫ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਨੂੰ ਸਮਰਪਿਤ ਹੈ। ਅਸੀਂ ਅਖੌਤੀ ਦਸਮ ਗ੍ਰੰਥ ਅਤੇ ਹੋਰ ਅਨਮਤੀ ਗ੍ਰੰਥ, ਪੱਪੂ (ਅਖੌਤੀ ਜਥੇਦਾਰ), ਪਖੰਡੀ ਸਾਧ, ਸੰਤ, ਬਾਬੇ, ਅਨਮਤੀ ਕਰਮਕਾਂਡਾਂ ਦੇ ਖਿਲਾਫ ਪ੍ਰਚਾਰ ਕਰਦੇ ਰਹੇ ਹਾਂ ਅਤੇ ਕਰਦੇ ਰਹਾਂਗੇ।
ਅਸੀਂ ਹਰ ਉਸ ਸਿੱਖ / ਸਿੱਖ ਜਥੇਬੰਦੀ ਦਾ ਸਾਥ ਦੇਵਾਂਗੇ, ਜਿਸਦਾ ਨਿਸ਼ਚਾ ਸਿਰਫ ਸ੍ਰੀ ਗੁਰੂ ਗ੍ਰੰਥ ਸਾਹਿਬ 'ਤੇ ਹੋਵੇ, ਸੱਚ ਬੋਲਣ ਅਤੇ ਸੱਚ 'ਤੇ ਪਹਿਰਾ ਦੇਣ ਦੀ ਹਿੰਮਤ ਅਤੇ ਬਾਬਰ ਦੇ ਸਾਹਮਣੇ ਖਲੋ ਕੇ ਜਾਬਰ ਕਹਿਣ ਦੀ ਹਿੰਮਤ ਰੱਖਦਾ ਹੋਵੇ।



Disclaimer: Khalsanews.org does not necessarily endorse the views and opinions voiced in the news। articles। audios videos or any other contents published on www.khalsanews.org  and cannot be held responsible for their views.  Read full details....

Go to Top