ਨੋਟ: ਜਾਪੁ ਅਤੇ ਚੰਡੀ
ਚਰਿਤ੍ਰ ਵਿੱਚ ਦੁਰਗਾ ਦੇਵੀ ਦੇ ਗੁਣਾਂ ਦੀ ਸਮਾਨ ਵਰਤੋਂ ਕਰਕੇ ਉਸ ਨੂੰ ਸਲਾਹਿਆ
ਜਾ ਰਿਹਾ ਹੈ। ਦੁਰਗਾ ਦੇ ਗੁਣ ਗਾਉਣ ਵਾਲ਼ਾ ਕਵੀ ਦੁਰਗਾ ਭਗਤ ਹੁੰਦਾ ਹੈ ਤੇ ਉਹ
ਦੋਗਲਾ ਬਣ ਕੇ ਦੇਵੀ ਨੂੰ ਛੱਡ ਕੇ ਕਿਸੇ ਹੋਰ ਦੇ ਗੁਣ ਨਹੀਂ ਗਾ ਸਕਦਾ।
ਚੰਡੀ ਚਰਿੱਤ੍ਰ ਵਿੱਚ ਸਾਫ਼ ਤੌਰ 'ਤੇ
ਲਿਖਿਆ ਹੈ "ਦੇਵੀ ਜੂ ਕੀ ਉਸਤਤ" ਬਰਨੰ।
ਅਖੌਤੀ ਦਸਮ ਗ੍ਰੰਥ ਦੇ ਪੰਨਾਂ 118
ਉੱਤੇ ਚੰਡੀ ਚਰਿਤ੍ਰ ਦੀ ਸਮਾਪਤੀ 'ਤੇ ਇਉਂ ਲਿਖਿਆ ਹੋਇਆ ਹੈ-
“ਇਤਿ ਸ੍ਰੀ
ਬਚਿਤ੍ਰ ਨਾਟਕੇ ਚੰਡੀ ਚਰਿਤ੍ਰੇ ਦੇਵੀ ਜੂ ਕੀ ਉਸਤਤ ਬਰਨਨ ਨਾਮ ਸਪਤਮੋ ਧਿਆਇ
ਸੰਪੂਰਣਮ ਸਤੁ ਸੁਭਮ ਸਤੁ ।7। ਅਫਜੂ”।
ਅੱਖਾਂ
ਖੁੱਲ੍ਹ ਜਾਣੀਆਂ ਚਾਹੀਦੀਆਂ ਹਨ:
ਜਿਹੜੇ ਵੀਰ ਵਰਜੀਨੀਆਂ ਦੇ ਸਿੱਖਾਂ ਨੂੰ ਸਬਕ ਸਿਖਾਉਣ 'ਤੇ
ਤੁਲੇ ਹੋਏ ਹਨ ਉਹ ਸ਼੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਨਿਰਾਦਰੀ ਕਰ ਰਹੇ ਹਨ। ਉਹ
ਗੁਰੂ ਜੀ ਉੱਤੇ ਹੀ ਉਂਗਲ਼ ਚੁੱਕ ਰਹੇ ਹਨ। ਦਸਵੇਂ
ਗੁਰੂ ਜੀ ਵਲੋਂ ਆਦਿ ਬੀੜ ਵਿੱਚ ਦਰਜ ਬਾਣੀਆਂ ਪੜ੍ਹ ਕੇ ਅੰਮ੍ਰਿਤ ਪਾਨ ਕਰਾਉਣਾ
ਕੋਈ ਗੁਨਾਹ ਨਹੀਂ ਹੈ। ਗੁਨਾਹ ਦੇ ਉਹ ਭਾਗੀ ਹਨ ਜੋ ਸੰਨ 1931 ਤੋਂ 1945 ਤਕ
14 ਕੁ ਬੰਦਿਆਂ ਦੁਆਰਾ ਬਣਾਈ ਰਹਿਤ ਮਗਰ ਲੱਗੇ ਹੋਏ ਹਨ, ਜਿਸ ਵਿੱਚ ਸੋਚੀ ਸਮਝੀ
ਬ੍ਰਾਹਮਣਵਾਦੀ ਸਾਜਿਸ਼ ਨਾਲ਼ ਨਿੱਤ-ਨੇਮ ਅਤੇ ਅੰਮ੍ਰਿਤ ਸੰਚਾਰ ਵਿੱਚ ਕੱਚੀਆਂ
ਬਾਣੀਆਂ ਸ਼ਾਮਲ ਕੀਤੀਆਂ ਗਈਆਂ ਸਨ।
ਗੁਰੂ ਦੀ ਦੱਸੀ ਰਹਿਤ ਤਾਂ ਧੰਨੁ ਗੁਰੂ ਨਾਨਕ ਪਾਤਿਸ਼ਾਹ ਤੋਂ
ਹੀ ਚਲਦੀ ਆ ਰਹੀ ਹੈ, ਜੋ ਗੁਰਬਾਣੀ ਵਿੱਚ ਦਰਜ ਹੈ। ਚੌਦਾਂ ਕੁ ਬੰਦਿਆਂ ਨੇ ਨਵੀਂ
ਰਹਿਤ ਬਣਾ ਕੇ ਸਿੱਖਾਂ ਵਿੱਚ ਕਲ਼ੇਸ਼ ਹੀ ਖੜ੍ਹਾ ਕੀਤਾ ਹੈ ਕਿਉਂਕਿ ਧੰਨੁ ਸ਼੍ਰੀ
ਗੁਰੂ ਅਰਜੁਨ ਸਾਹਿਬ ਪਾਤਿਸ਼ਾਹ ਵਲੋਂ ਬਣਾਇਆਂ ਨਿੱਤ-ਨੇਮ ਭੰਗ ਕਰ ਦਿੱਤਾ ਗਿਆ
ਹੈ। ਗੁਰੂ ਦਸਵੇਂ ਪਾਤਿਸ਼ਾਹ ਜੀ ਵੱਡੇ ਹਨ ਕਿ 14 ਕੁ
ਬੰਦੇ?
ਬਹੁਤ ਹੀ ਹੈਰਾਨੀ ਦੀ ਗੱਲ!!!
ਇਹ ਹੈਰਾਨੀ ਓਦੋਂ ਹੋਈ ਜਦੋਂ ਭਾਈ ਭੁਪਿੰਦਰ ਸਿੰਘ ਦੇ ਸਸਕਾਰ ਮੌਕੇ ਸ਼੍ਰੀ ਅਕਾਲ
ਤਖ਼ਤ ਸਾਹਿਬ ਵਿਖੇ ਸੇਵਾ ਨਿਭਾਅ ਚੁੱਕੇ ਪੰਜ ਪਿਆਰਿਆਂ ਵਿੱਚੋਂ ਇੱਕ ਸੱਜਣ ਨੇ
ਅਕਾਲ ਚੈਨਲ ਦੇ ਮਾਈਕ ਸਾਮ੍ਹਣੇ ਬੋਲਦਿਆਂ ਕਿਹਾ ਕਿ ਅਕਾਲ ਤਖ਼ਤ ਤੋਂ ਪ੍ਰਵਾਨਤ
ਮਰਯਾਦਾ ਮੰਨ ਕੇ ਇੱਕ-ਮੁੱਠ ਹੋਣਾ ਚਾਹੀਦਾ ਹੈ। ਇਹ ਭਾਈ ਸਾਹਿਬ ਹੁਣ ਤਕ ਕੱਚੀਆਂ
ਰਚਨਾਵਾਂ ਨੂੰ ਧੁਰ ਕੀ ਬਾਣੀ ਦੇ ਬਰਾਬਰ ਸਮਝਕੇ ਅੰਮ੍ਰਿਤ ਪਾਨ ਕਰਾਉਂਦੇ ਆ ਰਹੇ
ਸਨ। ਕੀ ਅਜੇ ਜੀ ਇਨ੍ਹਾਂ ਨੂੰ ਧੁਰ ਕੀ ਬਾਣੀ ਅਤੇ ਕੱਚੀ ਬਾਣੀ ਦੀ ਪਛਾਣ ਨਹੀਂ
ਆਈ?
ਇਹ ਦੱਸਣ ਕਿ ਇਹ ਕਿੱਥੇ ਲਿਖਿਆ
ਹੋਇਆ ਹੈ ਕਿ ਸਿੱਖ ਰਹਿਤ ਮਰਯਾਦਾ ਸ਼੍ਰੀ ਅਕਾਲ ਤਖ਼ਤ ਤੋਂ ਪ੍ਰਵਾਨਤ ਹੈ?
ਕਿੰਨਾ ਕੁ ਚਿਰ ਸੰਗਤਾਂ ਨੂੰ ਧੋਖੇ ਵਿੱਚ ਰੱਖੋਗੇ? ਇਹ ਕਿੱਥੇ ਲਿਖਿਆ ਹੈ ਕਿ
ਰਹਿਤ ਮਰਯਾਦਾ ਸ਼੍ਰੋ. ਕਮੇਟੀ ਵਲੋਂ ਜਾਂ ਸ਼੍ਰੀ ਅਕਾਲ ਤਖ਼ਤ ਵਲੋਂ ਲਾਗੂ ਕੀਤੀ ਗਈ
ਹੈ? ਇਸ ਦੀਆਂ ਤਾਂ ਥਾਂ-ਥਾਂ ਧਜੀਆਂ ਉੱਡ ਰਹੀਆਂ ਹਨ। ਰਹਿਤ ਮਰਯਾਦਾ ਤਾਂ ਸ਼੍ਰੋ.
ਕਮੇਟੀ ਦੀ ਦੁਕਾਨ ਤੇ ਬਾਕੀ ਪੁਸਤਕਾਂ ਵਾਂਗ ਇੱਕ ਛੋਟੀ ਜਿਹੀ ਪੁਸਤਕ ਹੈ। ਕੋਈ
ਪੜ੍ਹੇ ਨਾ ਪੜ੍ਹੇ, ਕੋਈ ਮੰਨੇ ਜਾਂ ਨਾ ਮੰਨੇ ਸ਼੍ਰੋ. ਕਮੇਟੀ ਨੂੰ ਇਸ ਨਾਲ਼ ਕੋਈ
ਸਰੋਕਾਰ ਨਹੀਂ ਹੈ। ਸ਼੍ਰੋ. ਕਮੇਟੀ ਨੇ ਤਾਂ ਸੰਨ 1945 ਵਿੱਚ ਖਰੜੇ ਵਿੱਚ ਕੀਤੇ
ਵਾਧੇ ਘਾਟੇ ਨੂੰ ਪ੍ਰਵਾਨਗੀ ਦਿੱਤੀ ਸੀ। ਕਦੇ ਵੀ ਇਸ ਨੂੰ ਲਾਗੂ ਨਹੀਂ ਕੀਤਾ
ਗਿਆ।
ਸ਼ਬਦ ਗੁਰੂ
ਦੇ ਚਾਨਣ ਵਿੱਚ ਹੁਣ ਜਾਪੁ, ਚੌਪਈ ਅਤੇ ਸਵੱਯਾਂ ਨੂੰ ਪੜ੍ਹਨ ਦਾ ਹਨ੍ਹੇਰਾ ਦੂਰ
ਕਰੋ। ਗੁਰੂ ਗ੍ਰੰਥ ਸਾਹਿਬ ਉੱਚਾ ਹੈ, ਅਖੌਤੀ ਦਸਮ ਗ੍ਰੰਥ ਨਹੀਂ ਜਿਸ
ਦੀਆਂ ਕੱਚੀਆਂ ਰਚਨਾਵਾਂ ਨਾਲ਼ ਹੁਣ ਤਕ ਅੰਮ੍ਰਿਤ ਪਾਨ ਕਰਾਇਆ ਜਾਂਦਾ ਰਿਹਾ ਹੈ।
ਸਿੱਖੀ ਨੂੰ ਬ੍ਰਾਹਮਣਵਾਦ ਦੇ ਜੂਲ਼ੇ ਤੋਂ ਆਜ਼ਾਦ
ਕਰਾਉਣਾ ਹੈ ਤਾਂ ਕੇਵਲ ਦਸਵੇਂ ਗੁਰੂ ਜੀ ਵਲੋਂ ਸਿੱਖਾਂ ਲਈ ਥਾਪੇ ਗੁਰੂ ਸ਼੍ਰੀ
ਗੁਰੂ ਗ੍ਰੰਥ ਸਾਹਿਬ ਜੀ ਦੀਆਂ ਬਾਣੀਆਂ ਤਕ ਹੀ ਸੀਮਤ ਰਹਿਣਾ ਹੋਵੇਗਾ।
ਮੱਕਿਓਂ ਪਰੇ ਉਜਾੜ ਹੈ।
|