Main News Page

ਵਾਤਾਵਰਣ ਤਬਦੀਲੀ, ਮੌਸਮੀ ਫੇਰਬਦਲ ਅਤੇ ਸੰਨ 2050 ਤੱਕ 9 ਬਿਲੀਅਨ ਨੂੰ ਅੱਪੜ ਰਹੀ ਵਿਸ਼ਵ ਵਸੋਂ ਦੇ ਕਾਰਣ ਜਲ ਸਰੋਤਾਂ ਤੇ ਦਬਾਅ ਵਧ ਰਿਹਾ ਹੈ। ਮੁਲਕਾਂ ਦੌਰਾਨ ਜੰਗ ਦੇ ਆਸਾਰ ਬਣ ਰਹੇ ਹਨ। ਮੁੱਖ ਜਲ ਪ੍ਰਣਾਲੀਆਂ ਦੇ ਸਰੋਤ ਤਿੱਬਤੀ ਪਠਾਰ ਉੱਤੇ ਚੀਨ ਦਾ ਕਬਜ਼ਾ ਦੱਖਣੀ ਅਤੇ ਪੂਰਬੀ ਏਸ਼ੀਆ ਲਈ ਭਾਰੀ ਚੁਣੌਤੀ ਹੈ। ਆਰਕਟਿਕ ਅਤੇ ਅੰਟਾਰਕਟਿਕ ਮਗਰੋਂ ਤਿੱਬਤ ਦੇ ਗਲੇਸ਼ੀਅਰ ਹੀ ਪਾਣੀ ਦੇ ਵੱਡੇ ਸਰੋਤ ਹਨ। 2050 ਤੱਕ ਗਲੇਸ਼ੀਅਰਾਂ ਦਾ ਦੋ ਤਿਹਾਈ ਹਿੱਸਾ ਖਤਮ ਹੋਣ ਜਾ ਰਿਹਾ ਹੈ। ਜੋ ਕਿ ਵਿਨਾਸ਼ ਦਾ ਸੰਕੇਤ ਹੈ।

ਚੀਨ ਸਵਾਰਥੀ ਪਹੁੰਚ ਹੇਠ ਪਾਣੀ ਦਾ ਵਹਿਣ ਉੱਤਰ ਵੱਲ ਮੋੜ ਚੁੱਕਾ ਹੈ। ਪਾਕਿਸਤਾਨ ਵੀ ਦੋਸ਼ ਲਗਾ ਰਿਹਾ ਹੈ ਕਿ ਭਾਰਤ ਸਾਡੇ ਦਰਿਆਈ ਪਾਣੀਆਂ ਦੀ ਵਰਤੋਂ ਕਰ ਰਿਹਾ ਹੈ। ਦਰਿਆਈ ਪਾਣੀਆਂ ਦਾ ਮੁੱਦਾ ਅਤਿ ਨਾਜ਼ਕ ਹੈ। ਪੰਜਾਬ ਤੇ ਹਰਿਆਣਾ ਦਰਮਿਆਨ ਪਾਣੀ ਦਾ ਰੇੜਕਾ ਚਾਰ ਦਹਾਕਿਆਂ ਤੋਂ ਚੱਲ ਰਿਹਾ ਹੈ। ਬਿਨਾਂ ਸ਼ੱਕ ਪੰਜਾਬ ਦਾ ਸ਼ਿਕਵਾ ਦਰੁਸਤ ਹੈ ਕਿ ਦਰਿਆਈ ਪਾਣੀਆਂ ਦੀ ਵੰਡ ਪੱਖੋਂ ਉਸ ਨਾਲ ਵਿਤਕਰਾ ਹੋਇਆ। ਜੇ ਇਹ ਮਸਲੇ ਅਦਾਲਤਾਂ ਜਾਂ ਟ੍ਰਿਬਿਊਨਲਾਂ ਦੇ ਸੁਲਝਾਉਣ ਦੇ ਹੁੰਦੇ ਤਾਂ ਸੁਲਝ ਚੁੱਕੇ ਹੁੰਦੇ। ਕੇਂਦਰੀ-ਸੂਬਾਈ ਅਤੇ ਅੰਤਰਰਾਜੀ ਵਿਰੋਧ ਛੱਡ ਕੇ ਭੂਮੀ-ਪਾਣੀ-ਖੁਰਾਕ ਸੁਰੱਖਿਆ ਅਤੇ ਫਸਲੀ ਵਿਭਿੰਨਤਾ ਨੀਤੀਆਂ ਅਪਣਾ ਕੇ ਜਲ ਸੰਕਟ ਦੇ ਹੱਲ ਲਈ ਕੌਮੀ ਸਾਂਝ ਬਣਾਉਣ ਦੀ ਲੋੜ ਹੈ।

ਇਹ ਪ੍ਰਗਟਾਵਾ ਪੰਥਕ ਤਾਲਮੇਲ ਸੰਗਠਨ ਦੇ ਕਨਵੀਨਰ ਗਿਆਨੀ ਕੇਵਲ ਸਿੰਘ ਸਾਬਕਾ ਜਥੇਦਾਰ ਤਖਤ ਸ੍ਰੀ ਦਮਦਮਾ ਸਾਹਿਬ ਅਤੇ ਕੋਰ ਕਮੇਟੀ ਨੇ ਕਰਦਿਆਂ ਕਿਹਾ ਕਿ ਸਤਲੁਜ ਯਮਨਾ ਲਿੰਕ ਨਹਿਰ ਦੇ ਮੁੱਦੇ ਤੇ ਚੀਚੀ ਨੂੰ ਲਹੂ ਲਾ ਕੇ ਸ਼ਹੀਦਾਂ ਦੀ ਕਤਾਰ ਦੇ ਨਾਇਕ ਬਣਨ ਲਈ ਜ਼ੋਰ ਅਜ਼ਮਾਈ ਕੀਤੀ ਜਾ ਰਹੀ ਹੈ। ਗੈਰਸੰਵਿਧਾਨਕ ਤੇ ਗੈਰਜਮਹੂਰੀ ਦੌੜ ਲਾ ਕੇ ਚੋਣ ਪੱਤਾ ਫੜਦਿਆਂ ਦੇਸ਼ ਦੀ ਅਮਨ ਸ਼ਾਂਤੀ ਨਾਲ ਖਿਲਵਾੜ ਕੀਤਾ ਜਾ ਰਿਹਾ ਹੈ। ਇਸੇ ਸਿਆਸੀ ਡਰਾਮੇਬਾਜ਼ੀ ਕਾਰਣ ਪੰਜਾਬ ਦੇ ਹਜ਼ਾਰਾਂ ਨੌਜਵਾਨ ਆਪਣਾ ਲਹੂ ਵਹਾ ਚੁੱਕੇ ਹਨ ਅਤੇ ਅੱਜ ਫਿਰ ਉਹਨਾਂ ਨੂੰ ਉਕਸਾਇਆ ਜਾ ਰਿਹਾ ਹੈ। ਇਹ ਉਹੀ ਨਹਿਰ ਹੈ ਜਿਸ ਦੀ ਯੋਜਨਾ ਇੰਦਰਾ ਗਾਂਧੀ ਦੀ ਅਗਵਾਈ ਵਿਚ ਕਾਂਗਰਸ ਸਰਕਾਰ ਨੇ 1976 ਵਿਚ ਬਣਾਈ ਸੀ ਅਤੇ 1982 ਵਿਚ ਨੀਂਹ ਪੱਥਰ ਰੱਖਿਆ ਗਿਆ ਸੀ। ਅਕਾਲੀ ਦਲ ਨੇ ਹੀ ਪਾਣੀਆਂ ਦਾ ਸਮਝੌਤਾ ਕਰਕੇ ਪੰਜਾਬ ਦੇ ਹੱਕ ਖੋਹਣ ਦੀ ਪ੍ਰਵਾਨਗੀ ਦਿੱਤੀ ਸੀ।

ਅੱਜ ਸਮੂਹ ਪੰਜਾਬੀਆਂ ਨੂੰ ਅਤੇ ਕਿਸਾਨਾਂ ਨੂੰ ਸਮਝ ਲੈਣਾ ਚਾਹੀਦਾ ਹੈ ਕਿ ਹਾਲ ਵਿਚ ਹੀ ਪੰਜਾਬ ਵਿਧਾਨ ਸਭਾ ਵਿਚ ਮਤਾ ਪਾਸ ਕਰਨ ਲੱਗਿਆਂ ਸਰਕਾਰ ਨੂੰ ਪਤਾ ਸੀ ਕਿ ਇਹ ਅਰਥਹੀਣ ਹੈ। ਨਹਿਰ ਨੂੰ ਪੂਰਨ ਅਤੇ ਨਹਿਰੀ ਜ਼ਮੀਨ ਤੇ ਕਬਜ਼ੇ ਦਿਵਾਉਣ ਵਾਲੀ ਨੀਤੀ ਪਿੱਛੇ ਖੋਟੀ ਨੀਅਤ ਸੀ। ਜੇਕਰ ਕਿਸੇ ਨੂੰ ਪੰਜਾਬ ਦੇ ਪਾਣੀਆਂ ਨਾਲ ਐਨਾ ਹੀ ਦਰਦ ਹੁੰਦਾ ਤਾਂ ਮੁੱਖ ਮੰਤਰੀ ਤੇ ਮੰਤਰੀ ਅਸਤੀਫੇ ਦੇ ਕੇ ਗ੍ਰਿਫਤਾਰੀਆਂ ਦੇ ਚੁੱਕੇ ਹੁੰਦੇ। ਪਰ ਤ੍ਰਾਸਦੀ ਹੈ ਕਿ ਸਿਆਸੀ ਲਾਭਾਂ ਤੇ ਲੋਭ ਹਿੱਤ ਲੋਕਾਂ ਦਾ ਲਹੂ ਵਹਾਅ ਦੇਣ ਲਈ ਦਰਵਾਜੇ ਖੋਲ ਦਿੱਤੇ ਜਾਂਦੇ ਹਨ। ਪੰਜਾਬੀਆਂ ਅਤੇ ਸਿੱਖਾਂ ਨੂੰ ਇਸ ਸਾਰੇ ਮਾਮਲੇ ਵਿਚ ਮੋਹਰਾ ਬਣਨ ਤੋਂ ਪਹਿਲਾਂ ਘੋਖ ਕਰਨੀ ਚਾਹੀਦੀ ਹੈ।