ਜ਼ਿਉਂਦੀਆਂ
ਜਾਗਦੀਆਂ ਕੌਮਾਂ ਅੰਦਰ ਵਿਚਾਰਕ ਮਤ-ਭੇਦ ਸੁਭਾਵਕ ਹੀ ਹੁੰਦੇ ਹਨ, ਜੋ ਕਿ ਸਿਹਤਮੰਦ ਸਮਾਜ
ਦੀ ਸਿਰਜਣਾ ਵਿਚ ਸਹਾਇਕ ਵੀ ਹੁੰਦੇ ਹਨ। ਪਰ ਮਨ-ਭੇਦ ਕੌਮਾਂ ਲਈ ਬਹੁਤ ਖਤਰਨਾਕ ਹੁੰਦੇ ਹਨ।
ਸ੍ਰੀ ਰਾਮਗੜ੍ਹੀਆ ਬੁੰਗਾ ਤਰਨਤਾਰਨ ਸਾਹਿਬ ਵਿਖੇ ਅਕਾਲ ਉਪਮਾ ਜਥਾ ਵਲੋਂ ਰੱਖੇ
ਗੁਰਮਤਿ ਸਮਾਗਮ ਵਿਚ ਉਚੇਚਾ ਪੁੱਜੇ ਪ੍ਰੋਫੈਸਰ ਦਰਸ਼ਨ ਸਿੰਘ
ਸਾਬਕਾ ਜਥੇਦਾਰ ਤਖਤ ਸ੍ਰੀ ਅਕਾਲ ਤਖਤ ਸਾਹਿਬ ਦਾ ਜਿਸ ਤਰੀਕੇ ਘਿਰਾਓ ਕੀਤਾ ਗਿਆ, ਕਾਰ ਦੀ
ਭੰਨ-ਤੋੜ ਕੀਤੀ ਗਈ ਅਤੇ ਕਾਰ ਵਿਚ ਫਿੱਟ ਕੀਤਾ ਗਿਆ ਬੰਬ ਚਲਾਇਆ ਗਿਆ, ਇਹ ਤਾਲਬਾਨੀ
ਪਹੁੰਚ ਹੈ। ਜੋ ਕਿ ਅੰਤਮ ਤੇ ਅਸਲ ਨਿਰਣੈ ਦੀ ਦੁਸ਼ਮਣ ਹੁੰਦੀ ਹੈ।
ਭਰ੍ਹਾ-ਮਾਰੂ ਜੰਗ ਕੌਮਾਂ ਦੀ ਤਕਦੀਰ ਅਤੇ ਤਸਵੀਰ ਨੂੰ ਛੱਲਣੀ ਕਰ
ਦਿੰਦੀ ਹੈ। ਸਿੱਖੀ ਸਿਧਾਂਤ ਅੰਦਰ ਵਿਚਾਰ ਅਤੇ ਸੱਭਿਅਕ ਵਿਹਾਰ ਦੀ ਪ੍ਰਧਾਨਤਾ ਹੈ। ਜਿਸ
ਉੱਪਰ ਹਰ ਧਿਰ ਨੂੰ ਅਮਲ ਕਰਨਾ ਚਾਹੀਦਾ ਹੈ। ਇਹ ਪ੍ਰਗਟਾਵਾ ਪੰਥਕ ਤਾਲਮੇਲ ਸੰਗਠਨ ਦੇ
ਕਨਵੀਨਰ ਗਿਆਨੀ ਕੇਵਲ ਸਿੰਘ ਸਾਬਕਾ ਜਥੇਦਾਰ ਤਖਤ ਸ੍ਰੀ ਦਮਦਮਾ ਸਾਹਿਬ ਨੇ ਆਸਟ੍ਰੇਲੀਆ ਦੇ
ਸ਼ਹਿਰ ਮੈਲਬੋਰਨ ਵਿਚ ਹੋਣ ਜਾ ਰਹੀ ਵਿਸ਼ਵ ਸਿੱਖ ਕਾਨਫਰੰਸ ਲਈ ਰਵਾਨਾ ਹੋਣ ਤੋਂ ਪਹਿਲਾਂ
ਕੀਤਾ।
ਉਹਨਾਂ ਕਿਹਾ ਕਿ ਦੁਨੀਆਂ ਦੇ ਦਾਨੇ ਸਿੱਖ ਕੌਮ ਦੇ ਸੁਨਹਿਰੀ ਭਵਿੱਖ
ਦਾ ਚਿੰਤਨ ਕਰਨ ਲਈ 10 ਤੋਂ 13 ਮਾਰਚ ਤੱਕ ਸਿੱਖ ਕੌਮ ਦੀ ਪ੍ਰਭੂਸਤਾ, ਵਰਲਡ ਸਿੱਖ
ਪਾਰਲੀਮੈਂਟ ਅਤੇ ਸ੍ਰੀ ਅਕਾਲ ਤਖਤ ਸਾਹਿਬ ਦੀ ਵਿਸ਼ਵ ਪਹੁੰਚ ਆਦਿ ਮੁੱਦਿਆਂ ਤੇ ਵਿਚਾਰ ਕਰਨ
ਜਾ ਰਹੇ ਹਨ। ਦੂਜੇ ਪਾਸੇ ਪ੍ਰੋਫੈਸਰ ਦਰਸ਼ਨ ਸਿੰਘ ਅਤੇ ਸਰਦਾਰ ਪ੍ਰਭਦੀਪ ਸਿੰਘ (ਟਾਈਗਰ ਜਥਾ
ਯੂ.ਕੇ. ਅਤੇ ਸਿੰਘ ਨਾਦ ਰੇਡੀਉ) ਹੋਰਾਂ ਤੇ ਬੰਬ ਹਮਲਾ ਹੋਣਾ ਭਾਰੀ ਚਿੰਤਾ ਦਾ ਵਿਸ਼ਾ ਹੈ।
ਜਿਸ ਲਈ ਚਿੰਤਨ ਦਾ ਪੱਲਾ ਫੜ ਕੇ ਐਸੀਆਂ ਕਾਰਵਾਈਆਂ ਤੋਂ ਨਾਤਾ
ਤੋੜਿਆ ਜਾਣਾ ਚਾਹੀਦਾ ਹੈ ਅਤੇ ਭਵਿੱਖ ਵਿਚ ਗੁਰੂ ਗ੍ਰੰਥ ਸਾਹਿਬ ਦੇ ਸਿੱਖ ਦੀ
ਸਿਆਣਪ ਨਾਲ ਪੰਥ ਤੈਅ ਕਰੀਏ।