ਟੋਰਾਂਟੋ-
02 Feb 2016: ਦੁਨੀਆ ਦੇ ਸਭ ਤੋਂ ਤਾਕਤਵਰ ਸਿੱਖ ਅਤੇ ਕੈਨੇਡਾ ਦੇ ਰੱਖਿਆ ਮੰਤਰੀ ਬਣ ਕੇ
ਇਤਿਹਾਸ ਰਚਣ ਵਾਲੇ ਹਰਜੀਤ ਸਿੰਘ ਸੱਜਣ ਖਿਲਾਫ ਨਸਲੀ ਟਿੱਪਣੀ ਕਰਨ ਦਾ ਮੁੱਦਾ ਗਰਮਾਅ ਗਿਆ
ਹੈ। ਇਹ ਨਸਲੀ ਟਿੱਪਣੀ ਕਿਤੇ ਹੋਰ ਨਹੀਂ
ਸਗੋਂ ਕੈਨੇਡਾ ਦੇ ਸੰਸਦ ਭਵਨ (ਹਾਊਸ ਆਫ ਕਾਮਨਜ਼) ਵਿਚ ਸਾਬਕਾ ਰੱਖਿਆ ਮੰਤਰੀ ਤੇ
ਕੰਜ਼ਰਵੇਟਿਵ ਐੱਮ. ਪੀ. ਜੈਸਨ ਕੇਨੀ ਨੇ ਕੀਤੀ, ਜਿਸ ਤੋਂ ਬਾਅਦ ਕੈਨੇਡਾ 'ਚ ਪੰਜਾਬੀ ਮੂਲ
ਦੇ ਨੇਤਾਵਾਂ ਨੇ ਇਸ ਦਾ ਮੂੰਹ-ਤੋੜ ਜਵਾਬ ਦਿੱਤਾ।
ਸੋਮਵਾਰ ਨੂੰ ਕੈਨੇਡਾ ਦੇ ਸੰਸਦ ਭਵਨ 'ਹਾਊਸ ਆਫ ਕਾਮਨਜ਼' ਵਿਚ
ਪ੍ਰਸ਼ਨਕਾਲ ਦੌਰਾਨ ਹਰਜੀਤ ਸਿੰਘ ਸੱਜਣ ਸਵਾਲਾਂ ਦੇ ਜਵਾਬ ਦੇਣ
ਲਈ ਖੜ੍ਹੇ ਹੋਏ ਤਾਂ ਜੈਸਨ ਕੇਨੀ ਨੇ ਚੀਖ ਕੇ ਕਿਹਾ, ''ਮੈਨੂੰ
ਇਕ ਇੰਗਲਿਸ਼-ਟੂ-ਇੰਗਲਿਸ਼ ਟਰਾਂਸਲੇਟਰ ਦੀ ਲੋੜ ਹੈ।'
ਇਸ 'ਤੇ ਹਾਊਸ ਵਿਚ ਬੈਠੇ ਲਿਬਰਲ ਨੇਤਾਵਾਂ ਨੇ ਇਸ ਦਾ ਜ਼ੋਰਦਾਰ ਵਿਰੋਧ ਕੀਤਾ।
ਜਿਸ ਤੋਂ ਬਾਅਦ ਹਾਊਸ ਲੀਡਰ ਪਾਰਲੀਮਾਨੀ ਸਕੱਤਰ ਨੇ ਕੇਨੀ ਨੂੰ ਮੁਆਫੀ ਮੰਗਣ ਲਈ ਕਿਹਾ,
ਪਰ ਉਸ ਨੇ ਮੁਆਫੀ ਮੰਗਣ ਤੋਂ ਇਨਕਾਰ ਕਰ ਦਿੱਤਾ।
ਕੇਨੀ ਦੀ ਅਜਿਹੀ ਹਰਕਤ 'ਤੇ ਕੈਨੇਡਾ ਵਿਚ ਪੰਜਾਬੀ ਮੂਲ ਦੇ ਨੇਤਾਵਾਂ
ਨੇ ਸਖਤ ਪ੍ਰਤੀਕਿਰਿਆ ਦਿੱਤੀ। ਐੱਮ. ਪੀ. ਰੂਬੀ ਸਹੋਤਾ ਨੇ ਟਵਿੱਟਰ 'ਤੇ ਪ੍ਰਤੀਕਿਰਿਆ
ਦਿੰਦੇ ਹੋਏ ਕਿਹਾ ਕਿ ਬੇਸ਼ੱਕ ਇਹ ਰਾਜਨੀਤੀ ਬਹਿਸ ਵਿਚ ਗਹਿਮਾ-ਗਹਿਮੀ ਹੋਣੀ ਆਮ ਗੱਲ ਹੈ
ਪਰ ਕਿਸੇ 'ਤੇ ਨਿੱਜੀ ਵਾਰ ਕਰਨੇ ਜਾਂ ਨਸਲੀ ਟਿੱਪਣੀ ਕਰਨੀਆਂ ਕਿਸੇ ਵੀ ਹਾਲਤ ਵਿਚ ਜਾਇਜ਼
ਨਹੀਂ। ਉਨ੍ਹਾਂ ਨੇ ਟਵਿੱਟਰ 'ਤੇ ਲਿਖਿਆ- 'ਹਰਜੀਤ ਸਿੰਘ ਸੱਜਣ 'ਤੇ ਨਸਲੀ ਟਿੱਪਣੀ ਕਰਨ
ਵਾਲੀ ਕੇਨੀ ਨੂੰ ਸ਼ਰਮ ਆਉਣੀ ਚਾਹੀਦੀ ਹੈ। ਉਸ 'ਤੇ ਮੁਆਫੀ ਮੰਗਣ ਤੋਂ ਇਨਕਾਰ ਕਰਨਾ
ਸਵੀਕਾਰ ਨਹੀਂ ਕੀਤਾ ਜਾ ਸਕਦਾ।' ਰੂਬੀ ਸਹੋਤਾ ਨੇ ਕਿਹਾ ਕਿ ਹਾਊਸ ਆਫ ਕਾਮਨਜ਼ ਵਿਚ ਇਸ
ਤਰ੍ਹਾਂ ਦੀਆਂ ਟਿੱਪਣੀ ਲਈ ਕੋਈ ਥਾਂ ਨਹੀਂ ਹੈ।
ਐੱਮ. ਪੀ. ਰਾਜ ਗਰੇਵਾਲ ਨੇ ਵੀ ਇਸ 'ਤੇ ਸਖਤ ਪ੍ਰਤੀਕਿਰਿਆ ਦਿੱਤੀ
ਅਤੇ ਕਿਹਾ ਕਿ 'ਕੇਨੀ ਨੂੰ ਆਪਣੀ ਟਿੱਪਣੀ ਲਈ ਹਰਜੀਤ ਸੱਜਣ ਤੋਂ ਮੁਆਫੀ ਮੰਗਣੀ ਚਾਹੀਦੀ
ਹੈ।' ਇਸ ਤੋਂ ਬਾਅਦ ਕੇਨੀ ਨੇ ਵੀ ਆਪਣੀ ਗੱਲ ਕਹਿਣ ਲਈ ਟਵਿੱਟਰ ਦਾ ਸਹਾਰਾ ਲਿਆ ਅਤੇ ਕਿਹਾ
ਕਿ ਉਹ ਹਰਜੀਤ ਸਿੰਘ ਸੱਜਣ ਦਾ ਸਨਮਾਨ ਕਰਦੇ ਹਨ।
ਹਰਜੀਤ ਸੱਜਣ ਪੰਜ ਸਾਲ ਦੀ ਉਮਰ ਵਿਚ ਆਪਣੇ ਪਰਿਵਾਰ ਸਮੇਤ ਭਾਰਤ
ਤੋਂ ਕੈਨੇਡਾ ਚਲੇ ਗਏ ਸਨ ਉੱਥੇ ਵੈਨਕੂਵਰ ਪੁਲਸ ਵਿਭਾਗ ਵਿਚ ਸੇਵਾਵਾਂ ਦੇਣ ਤੋਂ ਬਾਅਦ
ਕੈਨੇਡੀਅਨ ਮਿਲਟ੍ਰੀ ਵਿਚ ਉਨ੍ਹਾਂ ਨੇ ਆਪਣੀਆਂ ਸੇਵਾਵਾਂ ਦਿੱਤੀਆਂ। ਅਫਗਾਨਿਸਤਾਨ ਵਿਚ
ਤਿੰਨ ਮਿਸ਼ਨ ਪੂਰੇ ਕਰਨ ਵਾਲੇ ਉਹ ਪਹਿਲੇ ਸਿੱਖ ਕੈਨੇਡੀਅਨ ਸਨ। 2015 ਦੀਆਂ ਸੰਘੀ ਚੋਣਾਂ
ਵਿਚ ਸੱਜਣ ਨੂੰ ਵੈਨਕੂਵਰ ਤੋਂ ਐੱਮ. ਪੀ. ਚੁਣਿਆ ਗਿਆ ਤੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ
ਨੇ ਉਨ੍ਹਾਂ ਨੇ ਰੱਖਿਆ ਮੰਤਰਾਲੇ ਦਾ ਕਾਰਜਭਾਰ ਸੌਂਪ ਕੇ ਕੈਨੇਡਾ ਨੂੰ ਦਿੱਤੀਆਂ ਉਨ੍ਹਾਂ
ਦੀਆਂ ਸੇਵਾਵਾਂ ਬਦਲੇ ਸਨਮਾਨ ਦਿੱਤਾ।
