ਅੰਮ੍ਰਿਤਸਰ, 20 ਮਾਰਚ 2015:
ਸਿੱਖ
ਕੌਮ ਦੀ ਅਗਵਾਈ ਲਈ ਜਿਥੇ ਜਥੇਦਾਰ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੀ ਪਦਵੀ ਸਰਵੋਤਮ ਮੰਨੀ ਜਾਂਦੀ
ਹੈ, ਓਥੇ ਸਮੂਹ ਪੰਥਕ ਕਾਰਜਾਂ ਨੂੰ ਵਿਧੀਬੱਧ ਕਰਨ ਲਈ ਪ੍ਰਮੁੱਖ ਸੰਸਥਾ ਸ਼੍ਰੋਮਣੀ ਕਮੇਟੀ ਦੀ
ਜ਼ਿੰਮੇਵਾਰੀ ਨਿਰਧਾਰਿਤ ਹੁੰਦੀ ਹੈ, ਪਰ ਮੌਜੂਦਾ ਸਮੇਂ ‘ਚ ਜਦੋਂ ਕੌਮ ਨੂੰ ਦਰਪੇਸ਼ ਅੰਦਰੂਨੀ ਅਤੇ
ਬਾਹਰੀ ਸਮੱਸਿਆਵਾਂ ਦੇ ਢੁਕਵੇਂ ਹੱਲ ਲਈ ਸਿੰਘ ਸਾਹਿਬ ਅਤੇ ਸ਼੍ਰੋਮਣੀ ਕਮੇਟੀ ਦਰਮਿਆਨ ਭਰਵੇਂ
ਤਾਲਮੇਲ ਦੀ ਜ਼ਰੂਰਤ ਆਂਕੀ ਜਾ ਰਹੀ ਹੈ, ਓਦੋਂ ਉਨ੍ਹਾਂ ਦਰਮਿਆਨ ਸਬੰਧ ਲਗਾਤਾਰ ਤਲਖ ਹੁੰਦੇ ਨਜ਼ਰੀ
ਪੈ ਰਹੇ ਹਨ। ਰਾਜਨੀਤਿਕ ਦਖ਼ਲਅੰਦਾਜ਼ੀ ਕਾਰਨ ਸ਼੍ਰੋਮਣੀ ਕਮੇਟੀ ਅਤੇ
ਜਥੇਦਾਰ ਸ੍ਰੀ ਅਕਾਲ ਤਖ਼ਤ ਸਾਹਿਬ ਵਿਚਕਾਰ ਮੱਤਭੇਦ ਪੈਦਾ ਹੋਣ ਦੀ ਚਰਚਾ ਜ਼ੋਰਾਂ ‘ਤੇ ਹੈ।
ਬੀਤੇ ਕੱਲ੍ਹ ਜਿਥੇ ਜਥੇਦਾਰ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੀ ਸੁਰੱਖਿਆ
ਘਟਾਉਣ ਦੀਆਂ ਖ਼ਬਰਾਂ ਨਸ਼ਰ ਹੋਈਆਂ, ਓਥੇ ਅੱਜ ਪ੍ਰਧਾਨ ਸ਼੍ਰੋਮਣੀ ਕਮੇਟੀ ਨੇ ਅਜਿਹੀ ਕਿਸੇ
ਕਾਰਵਾਈ ਨੂੰ ਨਕਾਰਦਿਆਂ ਕਿਹਾ ਕਿ ਸਿੰਘ ਸਾਹਿਬਾਨ ਦੀ ਸੁਰੱਖਿਆ ਸ਼੍ਰੋਮਣੀ ਕਮੇਟੀ ਦੀ
ਜ਼ਿੰਮੇਵਾਰੀ ਹੈ ਅਤੇ ਜਥੇਦਾਰ ਸ੍ਰੀ ਅਕਾਲ ਤਖ਼ਤ ਸਾਹਿਬ ਨੂੰ ਦਿੱਤੀਆਂ ਗਈਆਂ ਤਿੰਨ ਗੱਡੀਆਂ
ਬਕਾਇਦਾ ਉਨ੍ਹਾਂ ਕੋਲ ਹੀ ਹਨ। ਇਸ ਸਬੰਧੀ ਉਕਸਾਹਟ ਲਈ ਉਨ੍ਹਾਂ ਸ਼੍ਰੋਮਣੀ ਕਮੇਟੀ ‘ਚ ਮੁਲਾਜ਼ਮ
ਸਿੰਘ ਸਾਹਿਬ ਦੇ ਪੁੱਤਰ ਨੂੰ ਜ਼ਿੰਮੇਵਾਰ ਦੱਸਦਿਆਂ, ਉਸ ਖਿਲਾਫ਼ ਬਣਦੀ ਕਾਰਵਾਈ ਦੇ ਸੰਕੇਤ ਦਿੱਤੇ।
ਜੳਟਹੲਦੳਰਸਿੰਘ ਸਾਹਿਬ ਦੀ ਸੁਰੱਖਿਆ ਘਟਾਉਣ ਬਾਰੇ ਸ਼੍ਰੋਮਣੀ ਕਮੇਟੀ ਦੇ ਅੰਦਰੂਨੀ ਸੂਤਰਾਂ ਤੋਂ
ਪ੍ਰਾਪਤ ਜਾਣਕਾਰੀ ਅਨੁਸਾਰ ਉਨ੍ਹਾਂ ਕੋਲ ਦੋ ਇਨੋਵਾ ਅਤੇ ਇਕ ਸਕਾਰਪੀਓ ਗੱਡੀ ਪਹਿਲਾਂ ਵਾਂਗ ਹੀ
ਸੇਵਾ ਲਈ ਹਾਜ਼ਰ ਹੈ ਅਤੇ ਸਕੱਤਰੇਤ ਸ੍ਰੀ ਅਕਾਲ ਤਖ਼ਤ ਸਾਹਿਬ ਵੱਲੋਂ ਇਕ ਹੋਰ ਨਵੀਂ ਮਹਿੰਦਰਾ
ਪਿਕਅੱਪ ਗੱਡੀ ਦੀ ਮੰਗ ਨੂੰ ਸ਼੍ਰੋਮਣੀ ਕਮੇਟੀ ਵੱਲੋਂ ਹਾਮੀ ਨਾ ਭਰਨ ‘ਤੇ ਅਜਿਹੀ ਸਥਿਤੀ ਸਾਹਮਣੇ
ਆਈ ਹੈ। ਸ਼੍ਰੋਮਣੀ ਕਮੇਟੀ ਦੀ ਅੰਤ੍ਰਿੰਗ ‘ਚ ਹੋਏ ਫ਼ੈਸਲੇ ਤਹਿਤ ਪੰਜਾਬ ‘ਚ ਸਮੂਹ ਜਥੇਦਾਰ
ਸਾਹਿਬਾਨ ਨੂੰ ਬਰਾਬਰ ਸੁਰੱਖਿਆ ਤੇ ਗੱਡੀਆਂ ਦਿੱਤੀਆਂ ਜਾਣਗੀਆਂ ਅਤੇ ਸ਼੍ਰੋਮਣੀ ਕਮੇਟੀ
ਅਧਿਕਾਰੀਆਂ ‘ਚ ਕੇਵਲ ਸਕੱਤਰ ਹੀ ਪੱਕੀ ਗੱਡੀ ਦਾ ਇਸਤੇਮਾਲ ਕਰ ਸਕਣਗੇ।
ਜਾਣਕਾਰੀ ਅਨੁਸਾਰ ਹੇਠਲੇ ਅਹੁਦੇਦਾਰਾਂ ਤੋਂ
ਗੱਡੀਆਂ ਵਾਪਸ ਲੈ ਲਈਆਂ ਗਈਆਂ ਹਨ ਅਤੇ ਲੋੜ ਪੈਣ ‘ਤੇ ਹੀ ਉਨ੍ਹਾਂ ਨੂੰ ਗੱਡੀ ਦੀ ਸਹੂਲਤ ਮਿਲ
ਸਕੇਗੀ। ਇਸ ਦੌਰਾਨ ਸੁਰੱਖਿਆ ਮਾਮਲੇ ‘ਤੇ ਉੱਠੀ ਚਰਚਾ ‘ਤੇ ਸ਼੍ਰੋਮਣੀ ਕਮੇਟੀ ਵੱਲੋਂ ਤਿੱਖੀ
ਨਜ਼ਰਸਾਨੀ ਕੀਤੀ ਜਾ ਰਹੀ ਹੈ।