Main News Page

ਅੰਮ੍ਰਿਤਸਰ 17 ਮਾਰਚ (ਜਸਬੀਰ ਸਿੰਘ): ਸ਼੍ਰੋਮਣੀ ਗੁਰੂਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਬੰਧ ਹੇਠ ਚੱਲਦੇ ਸ੍ਰੀ ਗੁਰੂ ਰਾਮਦਾਸ ਲੰਗਰ ਵਿਖੇ ਹੋਏ ਖਾਦ ਪਦਾਰਥਾਂ ਦੀ ਚੋਰੀ ਕਾਂਡ ਦੀਆਂ ਕੜੀਆਂ ਹੋਰ ਵੀ ਅੱਗੇ ਵੱਧਦੀਆਂ ਜਾ ਰਹੀਆਂ ਹਨ ਅਤੇ ਸ਼੍ਰੋਮਣੀ ਕਮੇਟੀ ਦੇ ਅਧਿਕਾਰੀਆਂ ਨੇ ਦੋ ਹੋਰ ਮੁਲਾਜਮਾਂ ਨੂੰ ਮੁਅੱਤਲ ਕਰਨ ਦੇ ਨਾਲ ਨਾਲ, ਲੰਗਰ ਹਾਲ ਦੇ ਮੈਨੇਜਰ ਰਘਬੀਰ ਸਿੰਘ ਮੰਡ ਦਾ ਵੀ ਤਬਾਦਲਾ ਕਰ ਦਿੱਤਾ ਹੈ।

ਬੀਤੀ 16 ਮਾਰਚ ਦੀ ਰਾਤ ਨੂੰ ਕਰੀਬ 12 ਵਜੇ ਸ੍ਰੀ ਦਰਬਾਰ ਸਾਹਿਬ ਵਿਖੇ ਆਈਆਂ ਸੰਗਤਾਂ ਦੇ ਲੰਗਰ ਲਈ ਰੱਖੀ ਗਈ ਰਸਦ ਵਿੱਚੋ ਭਾਰੀ ਮਾਤਰਾ ਵਿੱਚ ਹੋ ਰਹੀ ਚੋਰੀ ਨੂੰ ਜਦੋਂ ਫਲਾਇੰਗ ਸਕੁਐਡ ਦੇ ਇੰਚਾਰਜ ਸਕੱਤਰ ਸਿੰਘ ਨੇ ਲੰਗਰ ਇੰਚਾਰਜ ਮੇਜਰ ਸਿੰਘ, ਟੈਂਪੂ ਡਰਾਈਵਰ ਕਰਮ ਸਿੰਘ, ਹਰਪਾਲ ਸਿੰਘ ਸੇਵਾਦਰ ਨੂੰ ਉਸ ਵੇਲੇ ਰੰਗੀ ਹੱਥੀਂ ਫ਼ੜ ਲਿਆ, ਤਾਂ ਇੱਕ ਵਾਰੀ ਤਾਂ ਹਫੜਾ ਦਫੜੀ ਮੱਚ ਗਈ। ਜਦੋ ਉਹ ਚੋਰੀ ਦਾ ਮਾਲ ਟੈਂਪੂ ਵਿੱਚ ਭਰ ਕੇ ਵੇਚਣ ਜਾ ਰਹੇ ਸਨ। ਉੱਚ ਅਧਿਕਾਰੀਆਂ ਦੇ ਆਦੇਸ਼ਾਂ ਤੇ ਇਸ ਕਾਂਡ ਦੀ ਜਾਂਚ ਆਰੰਭ ਹੋਈ ਤਾਂ ਇਸ ਕਾਂਡ ਦੀਆਂ ਕੜੀਆਂ ਹੋਰ ਮੁਲਾਜਮਾਂ ਨਾਲ ਵੀ ਜੁੜ ਗਈਆ। ਇਸ ਕਾਂਡ ਨਾਲ ਸਬੰਧਿਤ ਹੁਣ ਤੱਕ ਨੌ ਅਧਿਕਾਰੀਆਂ ਤੇ ਮੁਲਾਜਮਾਂ ਨੂੰ ਡਿਸਮਿਸ ਕਰ ਦਿੱਤਾ ਗਿਆ ਹੈ, ਜਿਹਨਾਂ ਵਿੱਚੋ ਸੱਤ ਮੁਲਾਜਮਾਂ ਨੂੰ ਪਹਿਲੇ ਦਿਨ ਹੀ ਕੀਤਾ ਗਿਆ, ਜਦ ਕਿ ਦੋ ਮੁਲਾਜਮਾਂ ਨੂੰ ਦੂਸਰੇ ਦਿਨ ਮੁਅੱਤਲ ਕੀਤਾ ਗਿਆ।

ਮੁਅੱਤਲ ਮੁਲਾਜਮਾਂ ਵਿੱਚ ਲੰਗਰ ਹਾਲ ਦਾ ਰਾਤ ਸਮੇਂ ਦੇ ਇੰਚਾਰਜ ਮੇਜਰ ਸਿੰਘ, ਟੈਂਪੂ ਡਰਾਈਵਰ ਕਰਮ ਸਿੰਘ ਸੇਵਾਦਾਰ, ਹਰਪਾਲ ਸਿੰਘ, ਰਾਜ ਸਿੰਘ ਸੇਵਾਦਾਰ, ਲਾਭ ਸਿੰਘ ਸੇਵਾਦਾਰ, ਦਿਲਬਾਗ ਸਿੰਘ ਹਲਵਾਈ, ਅਵਤਾਰ ਸਿੰਘ, ਰਾਵਿੰਦਰ ਸਿੰਘ ਕਲਰਕ ਤੇ ਗੁਰਬਿੰਦਰ ਸਿੰਘ ਸ਼ਾਮਲ ਹਨ। ਸੱਤ ਮੁਲਾਜਮਾਂ ਨੂੰ ਪਹਿਲੇ ਦਿਨ ਤੇ ਬਾਕੀ ਦੋ ਮੁਲਾਜ਼ਮਾਂ ਨੂੰ ਦੂਸਰੇ ਦਿਨ ਮੁਅੱਤਲ ਕੀਤਾ ਗਿਆ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਹੋਰ ਬਾਰੀਕੀ ਨਾਲ ਪੜਤਾਲ ਕੀਤੀ ਜਾ ਰਹੀ ਹੈ, ਤੇ ਜਿਹੜਾ ਵੀ ਦੋਸ਼ੀ ਪਾਇਆ ਗਿਆ ਉਸ ਵਿਰੁੱਧ ਵੀ ਕਾਰਵਾਈ ਕੀਤੀ ਜਾਵੇਗੀ।