ਬਠਿੰਡਾ,
10 ਫ਼ਰਵਰੀ (ਜਸਪਾਲ ਸਿੰਘ ਸਿੱਧੂ): ਦਿੱਲੀ ਵਿਚ ਆਮ ਆਦਮੀ ਪਾਰਟੀ ਦੀ ਜਿੱਤ ਲਈ ਜਿਥੇ ਦਿੱਲੀ
ਦੇ ਲੋਕਾਂ ਨੇ ਸੱਚਾਈ ਤੇ ਇਮਾਨਦਾਰੀ ਦੇ ਹੱਕ ਵਿਚ ਫ਼ਤਵਾ ਦਿਤਾ ਹੈ, ਉਥੇ ਇਹ ਜਿੱਤ ਆਮ ਲੋਕਾਂ
ਦੀ ਹੈ ਅਤੇ ਇਸ ਵਿਚ ਪੰਜਾਬੀਆਂ ਦਾ ਅਹਿਮ ਯੋਗਦਾਨ ਹੈ।
ਇਸ ਸਬੰਧੀ ਸੰਗਰੂਰ ਤੋਂ ਲੋਕ ਸਭਾ ਮੈਂਬਰ
ਭਗਵੰਤ ਮਾਨ ਨੇ ਦਿੱਲੀ ਦੇ ਲੋਕਾਂ ਦੇ ਨਾਲ-ਨਾਲ ਪੰਜਾਬ ਦੇ ਲੋਕਾਂ ਨੂੰ ਵੀ ਵਧਾਈ ਦਿਤੀ
ਹੈ। ਉਨ੍ਹਾਂ ਕਿਹਾ ਕਿ ਪੰਜਾਬੀ ਇਸ ਲਈ ਵੀ ਵਧਾਈ ਦੇ ਪਾਤਰ ਹਨ ਕਿ ਆਮ ਆਦਮੀ ਪਾਰਟੀ ਨੂੰ ਲੋਕ
ਸਭਾ ਵਿਚ ਦਾਖ਼ਲਾ ਪੰਜਾਬ ਨੇ ਹੀ ਚਾਰ ਲੋਕ ਸਭਾ ਮੈਂਬਰ ਜਿਤਾ ਕੇ ਦਿਵਾਇਆ ਸੀ।
ਉਨ੍ਹਾਂ ਕਿਹਾ ਕਿ ਹੁਣ ਦਿੱਲੀ ਵਾਂਗ ਵੱਡੀ ਤਬਦੀਲੀ ਲਈ ਪੰਜਾਬ ਦੇ ਲੋਕ ਵੀ ਤਿਆਰ ਰਹਿਣ। ਉਨ੍ਹਾਂ
ਕਿਹਾ ਕਿ ਪੰਜਾਬ ਵਿਚ ਇਹ ਤਬਦੀਲੀ ਧੂਰੀ ਵਿਧਾਨ ਸਭਾ ਚੋਣਾਂ ਤੋਂ ਹੀ ਸ਼ੁਰੂ ਹੋ ਜਾਵੇਗੀ।
ਜਿਥੇ ਆਮ ਆਦਮੀ ਪਾਰਟੀ ਵਲੋਂ ਇਕ ਤਕੜਾ ਉਮੀਦਵਾਰ ਦਿਤਾ ਜਾਵੇਗਾ। ਦਿੱਲੀ
ਵਿਚ ਆਮ ਆਦਮੀ ਪਾਰਟੀ ਦੀ ਜਿੱਤ ਤੋਂ ਬਾਅਦ ਜਿਥੇ ਅਕਾਲੀ-ਭਾਜਪਾ ਦੇ ਬੁੱਲ੍ਹ ਡਿੱਗੇ ਹੋਏ ਹਨ,
ਉਥੇ ਕਾਂਗਰਸ ਪਾਰਟੀ ਵੀ ਚਿੰਤਤ ਦਿਖਾਈ ਦੇ ਰਹੀ ਹੈ।
ਰਾਹੁਲ ਗਾਂਧੀ ਨੂੰ ਦਿੱਲੀ ਵਿਚ ਅਪਣੀ ਪਾਰਟੀ
ਦੀ ਕਾਰਗੁਜ਼ਾਰੀ ਦਾ ਪਹਿਲਾਂ ਹੀ ਪਤਾ ਸੀ, ਜਿਸ ਕਾਰਨ ਉਨ੍ਹਾਂ ਨੇ ਸਾਰਾ ਧਿਆਨ ਪੰਜਾਬ 'ਤੇ
ਕੇਂਦਰਤ ਕਰ ਲਿਆ ਸੀ ਅਤੇ ਕਾਂਗਰਸ ਪਾਰਟੀ ਨੂੰ ਪੰਜਾਬ ਤੋਂ ਵੱਡੀਆਂ ਉਮੀਦਾਂ ਸੀ। ਪਰ
ਇਹ ਕਿਸੇ ਨੇ ਵੀ ਨਹੀਂ ਸੋਚਿਆ ਸੀ ਕਿ ਆਮ ਆਦਮੀ ਪਾਰਟੀ ਦੀ ਜਿੱਤ ਏਨੀ ਵੱਡੀ ਤੇ ਇੱਕਤਰਫ਼ੀ
ਹੋਵੇਗੀ। ਹੁਣ ਇਹ ਗੱਲ ਵੀ ਸਾਫ਼ ਹੁੰਦੀ ਦਿਖਾਈ ਦੇ ਰਹੀ ਹੈ ਕਿ ਪੰਜਾਬ ਦੇ ਲੋਕ ਵੀ ਅਕਾਲੀ
ਦਲ-ਭਾਜਪਾ ਗਠਜੋੜ ਤੋਂ ਅੱਕੇ ਹੋਏ ਹਨ ਅਤੇ ਕਾਂਗਰਸ ਦਾ ਅੰਦਰੂਨੀ ਕਾਟੋਕਲੇਸ਼ ਦੇਖ ਕੇ ਅਤੇ ਆਮ
ਆਦਮੀ ਦੀ ਚੜ੍ਹਤ ਦੇਖ ਕੇ ਪੰਜਾਬ ਵਿਚ ਅਕਾਲੀ ਦਲ-ਭਾਜਪਾ ਦਾ ਬਦਲ ਆਮ ਆਦਮੀ ਪਾਰਟੀ ਵਿਚ ਦੇਖਣਗੇ
ਜਿਸ ਨੂੰ ਲੈ ਕੇ ਅਕਾਲੀ ਦਲ ਭਾਜਪਾ ਗਠਜੋੜ ਦੇ ਨਾਲ-ਨਾਲ ਕਾਂਗਰਸ ਵੀ ਪੂਰੀ ਚਿੰਤਤ ਹੈ।