* ਨੰਦਗੜ੍ਹ ਨੇ ਪੰਜ ਪਿਆਰਿਆਂ ਨੂੰ ਦੱਸਿਆ ਆਰ.ਐਸ.ਐਸ ਦੇ ਏਜੰਟ : ਮੱਕੜ
ਚੰਡੀਗੜ੍ਹ,
15 ਜਨਵਰੀ (ਗਗਨਦੀਪ ਸਿੰਘ ਸੋਹਲ) : ਨਾਨਕਸ਼ਾਹੀ ਕੈਲੰਡਰ ਦੇ ਮੁੱਦੇ
'ਤੇ ਅਲੱਗ ਸੁਰ ਵਾਲੇ ਤਖਤ ਸ੍ਰੀ ਦਮਦਮਾ ਸਾਹਿਬ ਤਲਵੰਡੀ ਸਾਬੋ ਦੇ ਜਥੇਦਾਰ ਬਲਵੰਤ ਸਿੰਘ
ਨੰਦਗੜ੍ਹ ਦਾ ਜਾਣਾ ਹੁਣ ਲਗਭਗ ਤੈਅ ਮੰਨਿਆ ਜਾ ਰਿਹਾ ਹੈ।
ਅੱਜ ਇਸ ਸਬੰਧੀ 150 ਐਸ ਜੀ ਪੀ ਸੀ ਮੈਂਬਰਾਂ ਨੇ ਇਥੇ ਸ਼੍ਰੋਮਣੀ ਕਮੇਟੀ ਪ੍ਰਧਾਨ ਜਥੇਦਾਰ
ਅਵਤਾਰ ਸਿੰਘ ਮੱਕੜ ਨੂੰ ਮੈਮੋਰੰਡਮ ਦਿੰਦਿਆਂ ਨਾਨਕਸ਼ਾਹੀ ਮਸਲੇ ਨੂੰ ਸੁਲਝਾਉਣ, ਸਿੱਖਾਂ ਦੀ
ਵੱਖਰੀ ਪਛਾਣ ਕਾਇਮ ਕਰਨ, ਬੰਦੀ ਸਿੰਘਾਂ ਦੀ ਰਿਹਾਈ ਲਈ ਯਤਨਾਂ ਨੂੰ ਤੇਜ਼ ਕਰਨ ਦੀ ਮੰਗ ਕੀਤੀ
ਗਈ ਹੈ।
ਦੱਸਣਯੋਗ ਹੈ ਕਿ ਅੱਜ ਇਕ ਤਰ੍ਹਾਂ ਨਾਲ ਨੰਦਗੜ੍ਹ ਨੂੰ ਹਟਾਉਣ ਲਈ ਖਾਕਾ
ਉਲੀਕ ਦਿਤਾ ਦਿਤਾ ਗਿਆ ਹੈ। ਇਸੇ ਤਹਿਤ ਅਮਰਜੀਤ ਚਾਵਲਾ ਦੀ ਅਗਵਾਈ ਚ 150 ਐਸ ਜੀ ਪੀ ਸੀ
ਮੈਂਬਰਾਂ ਦੇ ਦਸਖਤਾਂ ਵਾਲਾ ਮੈਮੋਰੰਡਮ ਜਥੇਦਾਰ ਮੱਕੜ ਨੂੰ ਸੌਂਪਿਆ ਗਿਆ। ਇਸ ਚ ਮੰਗ ਕੀਤੀ ਗਈ
ਹੈ ਕਿ ਨਾਨਕਸ਼ਾਹੀ ਮੁੱਦੇ ਤੇ ਸਿਖ ਸੰਗਤ ਚ ਪਏ ਭੰਬਲੂਸੇ ਨੂੰ ਦੂਰ ਕੀਤਾ ਜਾਵੇ।
ਇਸ ਮੈਮੋਰੰਡਮ ਚ ਕਿਹਾ ਗਿਆ ਹੈ ਕਿ ਜਥੇਦਾਰ ਨੰਦਗੜ੍ਹ ਨੇ ਨਗਰ ਕੀਰਤਨ ਚ
ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦਾ ਅਤੇ ਪੰਜ ਪਿਆਰਿਆਂ ਦਾ ਸਤਿਕਾਰ ਨਹੀਂ ਕੀਤਾ। ਇਸ ਲਈ ਉਨ੍ਹਾਂ
ਤੋ ਸਪਸ਼ਟੀਕਰਨ ਲੈ ਕੇ ਅਹੁਦੇ ਤੋਂ ਤੁਰੰਤ ਫਾਰਗ ਕੀਤਾ ਜਾਵੇ। ਇਸ ਤੋ ਇਲਾਵਾ ਮੰਗ ਪੱਤਰ ਚ ਧਾਰਾ
25 ਬੀ ਚ ਸੋਧ ਕਰਨ ਲਈ ਕੇਂਦਰ ਚ ਪਹੁੰਚ ਕਰਕੇ ਸਿੱਖਾਂ ਦੀ ਵੱਖਰੀ ਪਛਾਣ ਦਾ ਮੁੱਦਾ ਚੁੱਕਣ ਦੀ
ਮੰਗ ਤੋਂ ਇਲਾਵਾ ਭਾਈ ਗੁਰਬਖਸ਼ ਸਿੰਘ ਖਾਲਸਾ ਦੇ ਸੰਘਰਸ਼ ਦੀ ਹਮਾਇਤ ਕਰਦਿਆਂ ਤੁਰੰਤ ਬੰਦੀ ਸਿੰਘਾਂ
ਦੀ ਰਿਹਾਈ ਦੀ ਮੰਗ ਕੀਤੀ ਗਈ ਹੈ।
ਮੰਗ ਪੱਤਰ ਲੈਣ ਉਪਰੰਤ ਜਥੇਦਾਰ ਮੱਕੜ ਨੇ ਕਿਹਾ ਕਿ ਨੰਦਗੜ੍ਹ ਨੇ ਪੰਜ
ਪਿਆਰਿਆਂ ਨੂੰ ਆਰ ਐਸ ਐਸ ਦਾ ਏਜੰਟ ਦੱਸਕੇ ਬੱਜਰ ਗਲਤੀ ਕੀਤੀ ਹੈ। ਇਸ ਤੋਂ ਇਲਾਵਾ ਉਨ੍ਹਾਂ ਵਲੋਂ
ਨਗਰ ਕੀਰਤਨ ਚ ਸ਼ਾਮਲ ਨਾ ਹੋਣਾ ਵੀ ਕਿਸੇ ਵੀ ਤਰਾਂ ਸਹੀ ਨਹੀਂ ਕਿਹਾ ਜਾ ਸਕਦਾ। ਉਨ੍ਹਾਂ ਸਬੰਧੀ
ਅਗਲਾ ਫੈਸਲਾ 17 ਦੀ ਐਗਜੈਕਟਿਵ ਕਮੇਟੀ ਦੀ ਮੀਟਿੰਗ 'ਚ ਕੀਤਾ ਜਾਵੇ।
ਉਨ੍ਹਾਂ ਭਾਈ ਗੁਰਬਖਸ਼ ਸਿੰਘ ਖਾਲਸਾ ਦੇ ਸੰਘਰਸ਼ ਦੀ ਹਮਾਇਤ ਕਰਦਿਆਂ ਕਿਹਾ
ਕਿ ਉਹ ਖੁਦ ਚਾਹੁੰਦੇ ਹਨ ਕਿ ਬੰਦੀ ਸਿੰਘਾਂ ਦੀ ਰਿਹਾਈ ਹੋਵੇ। ਉਨ੍ਹਾਂ ਕਿਹਾ ਕਿ ਮੁੱਖ ਮੰਤਰੀ
ਬਾਦਲ ਨੇ ਕਈ ਵਾਰ ਕੇਂਦਰ ਤੇ ਸੂਬਾ ਸਰਕਾਰਾਂ ਨੂੰ ਇਸ ਬਾਰੇ ਲਿਖਿਆ ਹੈ ਤੇ ਰਿਹਾਈ ਬਿਨਾ ਦੇਰੀ
ਹੋਣੀ ਚਾਹੀਦੀ ਹੈ।
ਇਸ ਤਰ੍ਹਾਂ ਹੁਣ
ਜਥੇਦਾਰ ਨੰਦਗੜ੍ਹ ਨੂੰ ਅਹੁਦੇ ਤੋਂ ਲਾਹਿਆ ਜਾਣਾ ਲਗਭਗ ਤੈਅ ਮੰਨਿਆ ਜਾਣਾ ਹੈ। ਬਹੁਗਿਣਤੀ ਐਸ
ਜੀ ਪੀ ਸੀ ਮੈਂਬਰਾਂ ਦੇ ਦਸਖਤਾਂ ਵਾਲੇ ਮੈਮੋਰੰਡਮ ਰਾਹੀਂ ਇਕ ਤਰ੍ਹਾਂ ਨਾਲ ਨੰਦਗੜ੍ਹ ਨੂੰ
ਲਾਹੁਣ ਲਈ ਰਸਤਾ ਸਾਫ ਕੀਤਾ ਗਿਆ ਹੈ।