੨੦੧੫,
ਨਵਾਂ ਸਾਲ ਆਪ ਸੱਭ ਦੋਸਤਾਂ, ਮਿੱਤਰਾਂ, ਸਾਥੀਆਂ, ਪਰਿਵਾਰ, ਤੇ ਪਿਆਰ ਕਰਨ ਵਾਲਿਆਂ ਨੂੰ
ਮੁਬਾਰਕ ਹੋਵੇ । ਵਾਹਿਗੁਰੂ ਮੇਹਰ ਕਰੇ ਇਹ ਨਵਾਂ ਸਾਲ, ਆਪ ਸੱਭ ਲਈ ਬਹੁਤ ਸਾਰੀਆਂ ਨਵੀਆਂ
ਖੁਸ਼ੀਆਂ ਲੈ ਕੇ ਆਵੇ।
ਕੁੱਝ ਦੋਸਤ ਮਿੱਤਰ ਇਹ ਜ਼ਰੂਰ ਕਹਿਣ ਗੇ ਕਿ
ਇਹ ਈਸਵੀ ਸਾਲ ਹੈ, ਤੇ ਇਹ ਸਿੱਖਾਂ ਦਾ ਕੈਲੰਡਰ ਤਾਂ ਹੈ ਹੀ ਨਹੀਂ, ਸੋ ਮੁਬਾਰਕ ਕਾਹਦੀ
। ਮੈਂ ਇਹਨਾਂ ਦੋਸਤਾਂ ਨੂੰ ਗਲਤ ਨਹੀਂ ਕਹਾਂਗਾ । ਅਮਲੀ
ਤੌਰ ਤੇ ਸਾਡੀ ਜ਼ਿੰਦਗੀ ਦੇ ਸਾਰੇ ਕਾਰ ਵਿਹਾਰ ਇਸੀ ਕੈਲੰਡਰ ਦੇ ਹਿਸਾਬ ਨਾਲ ਹੁੰਦੇ ਹਨ, ਤੇ
ਮੈਂ ਵੀ ਇਸੇ ਅਮਲੀ ਤੇ ਵਿਉਹਾਰਕ ਜ਼ਿੰਦਗੀ ਦੇ ਹਿਸਾਬ ਨਾਲ ਆਪ ਸੱਭ ਨੂੰ ਮੁਬਾਰਕ ਆਖ ਰਿਹਾ ਹਾਂ
। ……ਵੈਸੇ ਸਾਡੇ ਲਈ ਕੀ ਨਵਾਂ ਸਾਲ ਤੇ ਕੀ ਪੁਰਾਣਾ
।
ਸਾਡੇ ਲਈ ਤਾਂ ਮੁੱਦਤਾਂ ਤੋਂ ਨਾ ਕਦੇ ਰੁੱਤ ਬਦਲੀ ਹੈ, ਨਾ ਵਰ੍ਹਾ ।
ਜੇਲ੍ਹ ਦੀ ਜ਼ਿੰਦਗੀ ਦੌਰਾਨ ਕਦੇ ਇੱਕ ਸ਼ਤੂਤ ਦੇ ਮਿੱਤਰ ਦਰਖੱਤ ਨਾਲ ਗੱਲਾਂ ਕਰਦੇ ਕਦੇ ਇਹ ਵੀ
ਲਿਖਿਆ ਸੀ...
ਤੇਰੇ 'ਤੇ ਜੋ ਪੱਤਝੜ੍ਹ ਆਈ ਸੀ
ਵਕਤ ਲੰਘਾ ਕੇ ਤੁਰ ਵੀ ਗਈ ਹੈ
ਸਾਡੇ ਤੇ ਜੋ ਪੱਤਝੜ੍ਹ ਆਈ
ਉਹ ਇੱਕੋ ਥਾਂ ਰੁਕੀ ਪਈ ਹੈ
ਨਾ ਸਾਡੇ ਲਈ ਮੌਸਮ ਬਦਲਣ
ਨਾ ਹਰਿਆਲੀ ਆਉਂਦੀ ਹੈ
ਲੂਹ ਵਿੱਚ ਤਾਂ ਸਾਰੇ ਹੀ ਸੜ੍ਹਦੇ ਨੇ
ਸਾਨੂੰ ਬਾਰਿਸ਼ ਵੀ ਝੁਲਸਾਉਂਦੀ ਹੈ
ਇੱਕ ਹੋਰ ਕਵਿਤਾ ਵਿੱਚ ਦਿਨ੍ਹਾਂ ਤੇ ਵਰ੍ਹਿਆਂ ਦੇ ਆਣ ਜਾਣ ਬਾਰੇ ਕਦੇ
ਇੰਝ ਵੀ ਲਿਖਿਆ ਸੀ ……..
ਦਿਨਾਂ ਦਾ ਕੀ ਹੈ
ਇਹ ਚੜ੍ਹਦੇ ਲਹਿੰਦੇ ਨੇ
ਮੌਸਮ ਦਾ ਕੀ ਹੈ
ਬਦਲਦੇ ਰਹਿੰਦੇ ਨੇ।
ਵਰ੍ਹਿਆਂ ਦਾ ਕੀ ਹੈ
ਵਰ੍ਹੇ ਕਈ ਲੰਘ ਗਏ
ਯਾਦਾਂ ਦੇ ਕੈਲੰਡਰ
ਸੀਨੇ ਟੰਗ ਗਏ।
ਦਿਨ ਤੇਰੇ ਚਰਨਾਂ ਵਿਚ
ਬੀਤੇ ਚੰਗੇ ਨੇ
ਆਪਣੇ ਨੇ, ਜੋ ਜੂਝ ਕੇ
ਮੌਸਮ ਲੰਘੇ ਨੇ।
ਵਰ੍ਹੇ ਉਹੀ ਜੋ
ਰੁੱਖ ਇਤਿਹਾਸ ਦਾ ਮੋੜ ਗਏ
ਸੁੱਤੀਆਂ ਕੌਮਾਂ ਨੂੰ
ਜਗਾ ਝੰਜੋੜ ਗਏ।
ਵੱਡੀਆਂ ਖੁਸ਼ੀਆਂ ਤਾਂ ਜਦੋਂ ਕਦੇ ਮਿਲਣ ਗੀਆਂ ਤਾਂ ਦੇਖਾਂਗੇ, ਅਸੀਂ ਤਾਂ ਵਿਹੜੇ ਦੀ ਕਿਆਰੀ
ਵਿੱਚ ਹੀ ਸਰੋਂ ਦੇ ਕੁੱਝ ਫੁੱਲ ਖਿੜਾ ਕੇ ਬਹਾਰ ਨੂੰ ਮਾਣਦੇ ਰਹੇ ਹਾਂ ……
ਕੁੱਝ ਫੁੱਲ ਸਰੋਂ ਦੇ ਖਿੜ੍ਹੇ ਨੇ, ਸਾਡੇ ਵਿਹੜੇ ਦੀ ਕਿਆਰੀ
ਬਸ ਇੰਨੀ ਕੂ ਬਹਾਰ ਆਈ ਹੈ, ਸਾਡੇ ਹਿੱਸੇ ਵਿੱਚ ਸਾਰੀ
ਇਸ ਦੇ ਬਾਵਜੂਦ ਹਰ ਨਵੇਂ ਦਿਨ ਨੂੰ, ਹਰ ਨਵੀਂ ਰੁੱਤ ਨੂੰ, ਤੇ ਹਰ ਨਵੇਂ ਵਰ੍ਹੇ ਨੂੰ ਬਾਹਾਂ
ਖੋਲ੍ਹ ਕੇ ਜੀ ਆਇਆਂ ਕਿਹਾ ਹੈ । ਲੰਮੀ ਜੇਲ੍ਹ ਤੇ ਜਲਾਵਤਨੀ ਨੇ ਜ਼ਿੰਦਗੀ ਦੇ ਕਈ ਨਵੇਂ ਅਰਥ
ਸਮਝਾ ਦਿੱਤੇ ਹਨ…………।
ਇਸ ਨਵੇਂ ਸਾਲ ਨੂੰ ਵੀ ਜੀ ਆਇਆਂ ਕਹਿੰਦਾ ਹਾਂ, ਇਸ ਉਮੀਦ ਨਾਲ…ਕਿ…
ਇੱਕ ਦਿਨ ਸਾਡੇ ਘਰ ਵੀ ਚਾਨਣ ਹੋਵੇਗਾ,
ਮੂੰਹ ਸਾਡੇ ਬਚਿਆਂ ਦੇ ਚਾਨਣ ਧੋਵੇਗਾ
ਇੱਕ ਦਿਨ ਸਾਡੀ ਪੱਤਝੜ੍ਹ ਵੀ ਮੁੱਕ ਜਾਵੇਗੀ,
ਇੱਕ ਦਿਨ ਸਾਡੇ ਲਈ ਬਸੰਤ ਵੀ ਆਵੇਗੀ