Khalsanews

ਆਖ਼ਰ ਇਸ ਅੱਗ ਵਰਾਉਂਦੀ ਅਤੇ ਅਸ਼ਲੀਲਤਾ ਪ੍ਰਚਾਰ ਦੀ ਭੱਦੀ ਗਾਇਕੀ ਨੂੰ ਰੋਕਣ ਲਈ ਕੌਣ ਅੱਗੇ ਆਵੇਗਾ ?
-: ਫੇਸਬੁੱਕ 'ਚੋਂ

ਪੰਜਾਬ ਸਰਕਾਰ ਦੀ ਚੁੱਪ ਹੇਠ ਸਾਡੇ ਗਾਇਕਾਂ ਨੇ ਹਿੰਸਕ ਅਤੇ ਲੱਚਰ ਗਾਇਕੀ ਗਾ ਕੇ ਸ਼ਾਇਦ ਖੁਦ ਨੂੰ 'ਗੱਬਰ ਸਿੰਘ' ਸਾਬਿਤ ਕਰਨ ਲਈ ਲੱਕ ਬੰਨ੍ਹ ਲਿਆ ਹੈ, ਜਿਨ੍ਹਾਂ ਵੱਲੋਂ ਪ੍ਰੀਵਾਰਕ ਰਿਸ਼ਤਿਆਂ ਤੋਂ ਇਲਾਵਾ ਹੁਣ ਧਾਰਮਿਕ ਸਥਾਨਾਂ ਨੂੰ ਵੀ ਆਪਣਾ ਨਿਸ਼ਾਨਾਂ ਬਣਾਕੇ ਕਾਇਦੇ-ਕਾਨੂੰਨਾਂ ਅਤੇ ਮਾਣ-ਮਰਿਆਦਾਵਾਂ ਦੀਆਂ ਧੱਜੀਆਂ ਉਡਾਈਆਂ ਜਾ ਰਹੀਆਂ ਹਨ। ਇਹ ਗਾਇਕ 'ਪਹਿਲਾ ਗਲਤੀ ਕਰੋ ਤੇ ਫ਼ਿਰ ਮਾਫ਼ੀ ਮੰਗੋ' ਫ਼ਾਰਮੂਲੇ ਰਾਹੀਂ ਮੁਫ਼ਤ ਵਿਚ ਪ੍ਰਸਿੱਧੀ ਖੱਟਣ ਦੀ ਲਾਲਸਾ ਵਿਚ ਨੌਜਵਾਨਾਂ ਨੂੰ ਕੁਰਾਹੇ ਪਾਉਂਦੇ ਜਾ ਰਹੇ ਹਨ। ਤਾਜ਼ਾ ਜਾਰੀ ਹੋਈਆਂ ਕੁੱਝ ਗੀਤਾਂ ਦੀਆਂ ਵੀਡੀਓਜ਼ ਨੇ ਭਰਪੂਰ ਹਿੰਸਕ ਮਾਹੌਲ ਪੇਸ਼ ਕੀਤਾ ਹੈ, ਜਿਨ੍ਹਾਂ ਵਿਚੋਂ ਇੱਕ ਗਾਇਕ ਵੱਲੋਂ ਗੀਤ ਦੇ ਆਰੰਭ ਵਿਚ ਕਿਸੇ ਪਿੰਡ ਦੇ ਗੁਰਦੁਆਰਾ ਸਾਹਿਬ ਤੋਂ ਅਨਾਊਾਸਮੈਂਟ ਕਰਵਾਈ ਜਾ ਰਹੀ ਹੈ ਕਿ 'ਸਰਬੱਤ ਨਗਰ ਨਿਵਾਸੀ ਸੰਗਤਾਂ ਨੂੰ ਬੇਨਤੀ ਕੀਤੀ ਜਾਂਦੀ ਹੈ ਕਿ ਆਪਣੇ ਪਿੰਡ ਵਿਚ ਫ਼ਲਾਣਾ ਗਿੱਲ ਆ ਗਿਆ ਹੈ, ਸਾਰੇ ਜਾਣੇ ਆਪਣੇ ਨਿਆਣੇ ਲੈ ਕੇ ਘਰਾਂ ਵਿਚ ਵੜ੍ਹ ਜਾਓ, ਇਹ ਨਾਂਹ ਹੋਵੇ ਕਿਸੇ ਦਾ ਜੀਅ ਨੁਕਾਸਾਨਿਆ ਜਾਵੇ'।

ਇਸ ਅਨਾਊਾਸਮੈਂਟ ਤੋਂ ਬਾਅਦ ਗਾਇਕ ਵੱਲੋਂ ਡਾਕੂਆਂ ਦੇ ਗਰੋਹ ਵਾਂਗੂ ਪਿੰਡ ਵਿਚ ਦਸਤਕ ਦਿੱਤੀ ਜਾਂਦੀ ਹੈ ਤੇ ਲਾਸ਼ਾਂ ਦੇ ਢੇਰ ਵਿਚ ਖੜ੍ਹਕੇ ਉਹ ਗੀਤ ਗਾ ਰਿਹਾ ਹੈ 'ਕੋਠੇ 'ਤੇ ਚੜ੍ਹ ਕੇ ਸੁਣ ਲਈ, ਖੜ੍ਹਕੇ ਹਥਿਆਰਾਂ ਦੇ' ਇਸ ਦੌਰਾਨ ਪਿੰਡ ਦੀ ਧੀ ਲਈ ਜੋ ਅਪਸ਼ਬਦ ਵਰਤੇ ਹਨ ਉਹ ਲਿਖ਼ਣਯੋਗ ਨਹੀਂ ਹਨ। ਹਲਾਂਕਿ ਇਸ ਗੀਤ ਦੇ ਗਾਇਕ ਵੱਲੋਂ ਮਾਫ਼ੀ ਮੰਗਣ ਦਾ ਡਰਾਮਾ ਕੀਤਾ ਜਾ ਚੁੱਕਾ ਹੈ ਪਰ ਕਮਾਨ ਚੋਂ ਨਿਕਲੇ ਤੀਰ ਵਾਂਗ ਇਹ ਹਿੰਸਕ ਤੇ ਲੱਚਰ ਗੀਤ ਸਾਡੇ ਸਮਾਜਿਕ ਮਾਹੌਲ ਤੇ ਰਿਸ਼ਤਿਆਂ ਦਾ ਵੱਡਾ ਨੁਕਸਾਨ ਕਰਦਾ ਜਾ ਰਿਹਾ ਹੈ।

ਯੂ-ਟਿਊਬ ਦੇ ਪਈ ਇਸ ਵੀਡੀਓ ਨੂੰ ਪਸੰਦ ਕਰਨ ਵਾਲਿਆਂ ਦੀ ਗਿਣਤੀ ਨਾਲੋਂ, ਨਾਪਸੰਦ ਕਰਨ ਵਾਲਿਆਂ ਦੀ ਗਿਣਤੀ ਕਿਤੇ ਜ਼ਿਆਦਾ ਹੈ ਤੇ ਨਾਲ ਹੀ ਲੋਕਾਂ ਵੱਲੋਂ ਕੀਤੀਆਂ ਗਈਆਂ ਟਿੱਪਣੀਆਂ ਵਿਚ ਗਾਇਕ ਨੂੰ ਬੁਰੀ ਤਰ੍ਹਾਂ ਭੰਡਿਆ ਹੈ ਅਤੇ ਇਸ ਗੀਤ ਦੇ ਪੋਸਟਰ ਨੂੰ ਅੱਤਵਾਦ ਦੇ ਨਾਂਅ ਹੇਠ ਪ੍ਰਚਾਰਿਆ ਜਾ ਰਿਹਾ ਹੈ। ਇਸ ਤੋਂ ਇਲਾਵਾ ਇੱਕ ਹੋਰ ਵੀਡੀਓ ਵਿਚ 'ਲੋਕੀ ਕਹਿੰਦੇ ਤੇਰੇ ਵਿਚ ਮੈਂ ਬੋਲਦਾ, ਮੇਰੇ ਵਿਚ ਬੋਲੇ ਬਿਲੋਂ 32 ਬੋਰ ਦਾ' ਬੋਲੇ 'ਤੇ ਜੋ ਦਹਿਸ਼ਤ ਅਤੇ ਗੁੰਡਾਗਰਦੀ ਦਾ ਫ਼ਿਲਮਾਂਕਣ ਕੀਤਾ ਹੈ। ਉਸ ਨੂੰ ਵੇਖ ਕੇ ਅੱਤਵਾਦੀਆਂ ਦੀਆਂ ਖ਼ਤਰਨਾਕ ਗਤੀਵਿਧੀਆਂ ਵੀ ਫ਼ਿੱਕੀਆਂ ਜਾਪ ਰਹੀਆਂ ਹਨ । ਗੀਤ ਵਿਚ ਪਿੰਡ ਦੀ ਇੱਕ ਧੀ ਨੂੰ ਜਿਵੇਂ ਆਪਣਿਆਂ ਦਾ ਕਤਲੇਆਮ ਕਰਦੇ ਵਿਖਾਇਆ ਗਿਆ ਹੈ, ਉਸ ਤੋਂ ਬਾਅਦ ਮਾਪਿਆਂ ਦਾ ਸਿਰ ਸ਼ਰਮ ਨਾਲ ਝੁੱਕਦਾ ਹੈ। ਇਸ ਤਰ੍ਹਾਂ ਦੇ ਅਨੇਕਾਂ ਗੀਤ ਹਨ ਜੋ ਪੰਜਾਬ 'ਚ ਮਾਹੌਲ ਨੂੰ ਗੰਧਲਾ ਕਰਕੇ ਜਾਤੀਵਾਦ ਅਤੇ ਅੱਤਵਾਦ ਦੀ ਜ਼ਹਿਰ ਫੈਲਾਅ ਰਹੇ ਹਨ।

ਦਿਸ਼ਾਹੀਣ ਹੋ ਰਹੀ ਜਵਾਨੀ

ਪੰਜਾਬੀ ਗੀਤਾਂ ਦੇ ਫ਼ਿਲਮਾਂਕਣ ਵਿਚ ਅੱਤਵਾਦੀਆਂ ਵਾਂਗੂ ਹਥਿਆਰ ਲਈ ਘੁੰਮਦੇ ਨੌਜਵਾਨ ਦੀਵਾਲੀ ਦੇ ਪਟਾਕਿਆਂ ਵਾਂਗ ਗੋਲੀਆਂ ਚਲਾਉਂਦੇ ਵਿਖਾਏ ਜਾ ਰਹੇ ਹਨ । ਲੜਕੇ ਤੇ ਲੜਕੀਆਂ ਨੂੰ ਸਿਰਫ਼ ਆਸ਼ਕ ਤੇ ਮਸ਼ੂਕ ਦਾ ਪਾਤਰ ਬਣਾ ਕੇ ਪੇਸ਼ ਕੀਤਾ ਜਾ ਰਿਹਾ ਹੈ । ਬਦਮਾਸ਼ੀ ਦੇ ਸਿਰ 'ਤੇ ਲੜਕੀਆਂ ਨਾਲ ਛੇੜ-ਛਾੜ ਜਾਂ ਫ਼ਿਰ ਉਨ੍ਹਾਂ ਨੂੰ ਜ਼ਬਰਦਸਤੀ ਚੁੱਕ ਕੇ ਲਿਜਾਣ ਵਰਗੇ ਦਿ੍ਸ਼ ਪੇਸ਼ ਕਰਕੇ ਸਾਡੀ ਨੌਜਵਾਨੀ ਨੂੰ ਦਿਸ਼ਾਹੀਣ ਕੀਤਾ ਜਾ ਰਿਹਾ ਹੈ।

ਬੋਲੀ ਹੋਈ ਸਰਕਾਰ

ਸਰਕਾਰ ਅੰਨ੍ਹੀ ਤੇ ਬੋਲ਼ੀ ਬਣੀ ਹੋਈ ਹੈ, ਜਿਸ ਦੇ ਸਾਹਮਣੇ ਜਾਰੀ ਹੁੰਦੀਆਂ ਵੀਡੀਓਜ਼ ਤੇ ਗੀਤ ਬਿਨ੍ਹਾਂ ਰੋਕ ਟੋਕ ਵੱਜ ਰਹੇ ਹਨ । ਪੰਜਾਬ ਤੇ ਪੰਜਾਬੀਅਤ ਤੇ ਮੁਤਫ਼ਿਕਰਾਂ ਨੂੰ ਇਸ ਗੱਲ ਦੀ ਚਿੰਤਾ ਹੈ ਕਿ ਆਖ਼ਰ ਇਸ ਅੱਗ ਵਰਾਉਂਦੀ ਅਤੇ ਅਸ਼ਲੀਲਤਾ ਪ੍ਰਚਾਰ ਦੀ ਭੱਦੀ ਗਾਇਕੀ ਨੂੰ ਰੋਕਣ ਲਈ ਕੌਣ ਅੱਗੇ ਆਵੇਗਾ?

ਵਾਹਿਗੁਰੂ ਜੀ ਕਾ ਖ਼ਾਲਸਾ, ਵਾਹਿਗੁਰੂ ਜੀ ਕੀ ਫ਼ਤਹਿ॥
ਖ਼ਾਲਸਾ ਨਿਊਜ਼ ਸਿਰਫ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਨੂੰ ਸਮਰਪਿਤ ਹੈ। ਅਸੀਂ ਅਖੌਤੀ ਦਸਮ ਗ੍ਰੰਥ ਅਤੇ ਹੋਰ ਅਨਮਤੀ ਗ੍ਰੰਥ, ਪੱਪੂ (ਅਖੌਤੀ ਜੱਥੇਦਾਰ), ਪਖੰਡੀ ਸਾਧ, ਬਾਬੇ, ਪਾਸ਼ਰੂਕ (ਅਖੌਤੀ ਜਾਗਰੂਕ), ਅਨਮਤੀ ਕਰਮਕਾਂਡਾਂ ਦੇ ਖਿਲਾਫ ਪ੍ਰਚਾਰ ਕਰਦੇ ਰਹੇ ਹਾਂ ਅਤੇ ਕਰਦੇ ਰਹਾਂਗੇ। ਅਸੀਂ ਹਰ ਉਸ ਸਿੱਖ / ਸਿੱਖ ਜਥੇਬੰਦੀ ਦਾ ਸਾਥ ਦੇਵਾਂਗੇ, ਜਿਸਦਾ ਨਿਸ਼ਚਾ ਸਿਰਫ ਸ੍ਰੀ ਗੁਰੂ ਗ੍ਰੰਥ ਸਾਹਿਬ 'ਤੇ ਹੋਵੇ, ਸੱਚ ਬੋਲਣ ਅਤੇ ਸੱਚ 'ਤੇ ਪਹਿਰਾ ਦੇਣ ਦੀ ਹਿੰਮਤ ਅਤੇ ਬਾਬਰ ਦੇ ਸਾਹਮਣੇ ਖਲੋ ਕੇ ਜਾਬਰ ਕਹਿਣ ਦੀ ਹਿੰਮਤ ਰੱਖਦਾ ਹੋਵੇ।


Disclaimer: Khalsanews.org does not necessarily endorse the views and opinions voiced in the news, articles, audios, videos or any other contents published on www.khalsanews.org and cannot be held responsible for their views. Read full details...