Main News Page

* ਅਦਾਲਤ ਵੱਲੋਂ ਦਿੱਤਾ ਫੈਸਲਾ ਸਿਰਫ਼ ਸਿਰਫ਼ ਇੱਕ ਸਿੱਖ ਲਈ ਹੈ

ਮਿਲਾਨੋ 03 ਦਸੰਬਰ (ਬਲਵਿਦੰਰ ਸਿੰਘ ਢਿੱਲੋ) - 6 ਨਵੰਬਰ 2014 ਨੂੰ ਇਟਲੀ ਦੀ ਇੱਕ ਅਦਾਲਤ ਵੱਲੋਂ ਇੰਟਰਨੈਸਲਨ ਸਿੱਖ ਫੈਡਰੇਸ਼ਨ ਇਟਲੀ ਦੇ ਪ੍ਰਧਾਨ ਤਲਵਿੰਦਰ ਸਿੰਘ ਵਡਾਲੀ ਨੂੰ ਕਿਰਪਾਨ ਪਾਉਣ ਦੀ ਦਿੱਤੀ ਆਗਿਆ ਨਾਲ ਜਿੱਥੇ ਸਮੁੱਚਾ ਸਿੱਖ ਭਾਈਚਾਰਾ ਖੁਸ਼ੀ ਨਾਲ ਖੀਵੇ ਹੈ, ਉੱਥੇ ਹੀ ਕੁਝ ਕੁ ਸੱਜਣ ਇਸ ਫੈਸਲੇ ਨੂੰ ਸੰਗਤ ਵਿੱਚ ਇਹ ਕਹਿ ਕੇ ਪ੍ਰਚਾਰ ਰਹੇ ਹਨ ਕਿ ਹੁਣ ਇਟਲੀ ਵਿੱਚ ਜਨਤਕ ਥਾਵਾਂ ਤੇ ਕਿਰਪਾਨ ਪਾਉਣ ਦੀ ਇਟਲੀ ਦੇ ਹਰ ਸਿੱਖ ਨੂੰ ਆਗਿਆ ਮਿਲ ਗਈ ਹੈ, ਜਦੋਂ ਕਿ ਸਚਾਈ ਇਸ ਦੇ ਬਿਲਕੁਲ ਉਲਟ ਹੈ।

ਅਦਾਲਤ ਦਾ ਫੈਸਲਾ ਸਿਰਫ਼ ਉਸ ਵਿਅਕਤੀ ਉਪੱਰ ਹੀ ਸਿਰਫ਼ ਲਾਗੂ ਹੁੰਦਾ ਹੈ ਜਿਸ ਦਾ ਕੇਸ ਅਦਾਲਤ ਵਿੱਚ ਵਿਚਾਰ ਅਧੀਨ ਸੀ। ਇਸ ਖ਼ਬਰ ਵਿੱਚ ਕਿੰਨੀ ਸਚਾਈ ਹੈ ਇਹ ਜਾਨਣ ਲਈ ਇਸ ਪੱਤਰਕਾਰ ਨੇ ਜਦੋਂ ਇੰਟਰਨੈਸਲਨ ਸਿੱਖ ਫੈਡਰੇਸ਼ਨ ਇਟਲੀ ਦੇ ਪ੍ਰਧਾਨ ਤਲਵਿੰਦਰ ਸਿੰਘ ਵਡਾਲੀ ਨਾਲ ਫੋਨ ਉਪੱਰ ਗੱਲਬਾਤ ਕੀਤੀ, ਤਾਂ ਉਹਨਾਂ ਦੁੱਧ ਦਾ ਦੁੱਧ ਅਤੇ ਪਾਣੀ ਦਾ ਪਾਣੀ ਕਰਦਿਆਂ ਕਿਹਾ ਕਿ 5 ਜੁਲਾਈ 2013 ਨੂੰ ਕੰਮ ਦੌਰਾਨ ਉਹਨਾਂ ਦੀ ਕਿਸੇ ਸ਼ਰਾਰਤੀ ਅਨਸਰ ਦੇ ਕਹਿਣ ਉਪੱਰ ਇਟਾਲੀਅਨ ਪੁਲਿਸ ਨੇ ਤਲਾਸ਼ੀ ਕੀਤੀ ਸੀ ਅਤੇ ਗੁਰੂ ਦੇ ਬਖ਼ਸੇ ਪੰਜ ਕਕਾਰਾਂ ਵਿੱਚੋਂ ਕਿਰਪਾਨ ਨੂੰ ਆਪਣੇ ਕਬਜੇ ਵਿੱਚ ਲੈ ਇਟਾਲੀਅਨ ਪੁਲਿਸ ਨੇ ਉਸ ਉਪੱਰ ਸ੍ਰੀ ਸਾਹਿਬ ਪਾਉਣ ਨੂੰ ਗੈਰ-ਕਾਨੂੰਨੀ ਕਰਾਰ ਦਿੰਦਿਆਂ ਕੇਸ ਦਰਜ ਕਰ ਦਿੱਤਾ ਸੀ।

ਕੇਸ ਉਪੰਰਤ ਸ: ਵਡਾਲੀ ਨੇ ਵਕੀਲ ਰਾਹੀ ਆਪਣਾ ਪੱਖ ਅਦਾਲਤ ਵਿੱਚ ਰੱਖਿਆ ਅਤੇ ਸ੍ਰੀ ਸਾਹਿਬ ਦੀ ਸਿੱਖ ਧਰਮ ਵਿੱਚ ਮਹੱਤਤਾ ਸਮਝਾਉਂਦਿਆਂ ਇਹ ਗੱਲ ਠੋਸ ਰੂਪ ਵਿੱਚ ਰੱਖੀ ਕਿ ਕਿਰਪਾਨ ਕਿਸੇ ਨੂੰ ਨੁਕਸਾਨ ਦੇਣ ਲਈ ਨਹੀਂ ਸਗੋ ਇੱਕ ਧਰਮਿਕ ਚਿੰਨ ਹੈ। ਕਾਫ਼ੀ ਜੱਦੋ-ਜਹਿਦ ਦੇ ਬੀਤੇ ਦਿਨ ਮਾਨਯੋਗ ਅਦਾਲਤ ਨੇ ਫੈਸਲਾ ਉਸ ਦੇ ਹੱਕ ਵਿੱਚ ਸੁਣਾਉਂਦਿਆਂ ਸਿਰਫ਼ ਉਸ ਨੂੰ ਹੀ ਕਿਰਪਾਨ ਪਾਉਣ ਦੀ ਇਜਾਜ਼ਤ ਦਿੱਤੀ ਹੈ।

ਪਰ ਹੈਰਾਨੀ ਦੀ ਗੱਲ ਇਹ ਹੈ ਕਿ ਪਤਾ ਨਹੀਂ ਇਹ ਕੁਝ ਵਿਅਕਤੀ ਅਣਗਹਿਲੀ ਕਾਰਨ ਜਾਂ ਅਗਿਆਨਤਾ ਕਾਰਨ ਇਸ ਗੱਲ ਨੂੰ ਸੰਗਤ ਵਿੱਚ ਇਹ ਕਹਿ ਕੇ ਪ੍ਰਚਾਰ ਰਹੇ ਹਨ ਕਿ ਹੁਣ ਇਟਲੀ ਵਿੱਚ ਜਨਤਕ ਥਾਵਾਂ ਤੇ ਹਰ ਗੁਰਸਿੱਖ ਕਿਰਪਾਨ ਪਾਕੇ ਜਾ ਸਕਦਾ ਹੈ ਜੋ ਕਿ ਅਸਲੀਅਤ ਤੋਂ ਕੋਹਾ ਦੂਰ ਹੈ।

ਇਹ ਫੈਸਲਾ ਸਿਰਫ਼ ਉਸ ਲਈ ਹੈ। ਇਟਲੀ ਵਿੱਚ ਅੱਜ ਵੀ ਜਨਤਕ ਥਾਵਾਂ ਉਪੱਰ ਕਿਰਪਾਨ ਪਾਕੇ ਜਾਣਾ ਮਨ੍ਹਾਂ ਹੈ। ਹੋਰ ਤਾਂ ਹੋਰ ਸ:ਵਡਾਲੀ ਨੇ ਇਸ ਗੱਲ ਉਪੱਰ ਵੀ ਹੈਰਾਨੀ ਪ੍ਰਗਟਾਈ ਕਿ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਸ਼੍ਰੀ ਅੰਮ੍ਰਿਤਸਰ ਸਾਹਿਬ ਦੇ ਪ੍ਰਧਾਨ ਅਵਤਾਰ ਸਿੰਘ ਹੁਰਾਂ ਵੀ ਕਮੇਟੀ ਦੀ ਵੈਬ ਸਾਈਟ ਉਪੱਰ ਇਸ ਗੱਲ ਨੂੰ ਸਵੀਕਾਰ ਕਰਦਿਆਂ ਸਲਾਂਘਾਯੋਗ ਕਹਿ ਦਿੱਤਾ ਜਦੋਂ ਕਿ ਉਹਨਾਂ ਨੂੰ ਪਹਿਲਾਂ ਇਟਲੀ ਦੀਆਂ ਸਿੱਖ ਸੰਸਥਾਵਾਂ ਨਾਲ ਗੱਲਬਾਤ ਕਰਨੀ ਚਾਹੀਦੀ ਸੀ।

ਸ: ਵਡਾਲੀ ਨੇ ਅਦਾਲਤ ਵੱਲੋਂ ਉਹਨਾਂ ਨੂੰ ਕਿਰਪਾਨ ਪਾਉਣ ਦੀ ਦਿੱਤੀ ਆਗਿਆ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਇਹ ਕਾਰਵਾਈ ਜਿੱਥੇ ਇਟਲੀ ਦੇ ਪੰਥਕ ਆਗੂਆਂ ਦੀ ਬਦੌਲਤ ਨੇਪਰੇ ਚੜ੍ਹੀ ਹੈ ਉੱਥੇ ਹੀ ਇਟਾਲੀਅਨ ਵਕੀਲ ਦੀ ਸਿਆਣਪ ਅਤੇ ਸਮਝਦਾਰੀ ਦੇ ਕਾਰਨ ਹੀ ਸੰਭਵ ਹੋ ਸਕਿਆ ਹੈ, ਇਸ ਕੇਸ ਲਈ ਉਹਨਾਂ ਕਿਸੇ ਕੋਲੋ ਕੋਈ ਵੀ ਆਰਥਿਕ ਮਦਦ ਨਹੀਂ ਲਈ ਅਤੇ ਨਾਂਹੀ ਵਕੀਲ ਨੂੰ ਹੁਣ ਤੱਕ ਕੋਈ ਕਿਸੇ ਵੀ ਤਰ੍ਹਾਂ ਦਾ ਮਿਹਨਤਾਨਾ ਦਿੱਤਾ ਹੈ। ਉਹਨਾਂ ਨੂੰ ਇਸ ਕੇਸ ਵਿੱਚ ਕਿਸੇ ਤਰ੍ਹਾਂ ਦਾ ਕੋਈ ਵੀ ਜੁਰਮਾਨਾ ਵੀ ਨਹੀਂ ਹੋਇਆ। ਅੰਤ ਵਿੱਚ ਉਨ੍ਹਾਂ ਨੇ ਨੈਸ਼ਨਲ ਧਰਮ ਪ੍ਰਚਾਰ ਕਮੇਟੀ ਇਟਲੀ ਦੇ ਸਹਿਯੋਗ ਦਾ ਧੰਨਵਾਦ ਕੀਤਾ।