Main News Page

* ਭਾਈਚਾਰੇ ਨੂੰ ਸਦਭਾਵਨਾ ਬਣਾਈ ਰੱਖੇ ਜਾਣ ਦੀ ਅਪੀਲ

ਬ੍ਰੈਂਪਟਨ, 11 ਸਤੰਬਰ 2014 (ਪਿਸਟ ਬਿਊਰੋ) : ਓਂਟਾਰੀਓ ਖਾਲਸਾ ਦਰਬਾਰ ਵਿਖੇ ਕੱਲ ਸਿੱਖ ਸੰਸਥਾਵਾਂ ਅਤੇ ਤਰਕਸ਼ੀਲ ਸੋਸਾਇਟੀ ਵਿਚ ਹੋਈ ਮੀਟਿੰਗ ਵਿਚ ਦੋਵੇਂ ਧਿਰਾਂ ਸਹਿਮਤੀ ‘ਤੇ ਪਹੁੰਚ ਗਈਆਂ ਹਨ। 14 ਤਰੀਕ ਨੂੰ ਤਰਕਸ਼ ਸੋਸਾਇਟੀ ਅਤੇ ਇੰਡੋ-ਕਨੇਡੀਅਨ ਵਰਕਰਜ਼ ਐਸੋਸੀਏਸ਼ਨ ਵੱਲੋਂ ਕਰਾਏ ਜਾ ਰਹੇ ਸਮਾਗਮ ਦੌਰਾਨ ਹੋਣ ਜਾ ਰਹੇ ਮੁਜ਼ਾਹਰੇ ਨੂੰ ਰੱਦ ਕਰ ਦਿੱਤਾ ਗਿਆ ਹੈ। ਕਾਉਂਸਲ ਦੇ ਪ੍ਰਧਾਨ ਰਣਜੀਤ ਸਿੰਘ ਦੂਲੇ ਨੇ ਸਾਡੇ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਤਰਕਸ਼ੀਲ ਸੋਸਾਇਟੀ ਦੀ ਕਾਰਵਾਈ ਤੋਂ ਅਸੀਂ ਸੰਤੁਸ਼ਟ ਹਾਂ।

ਉਹਨਾਂ ਕਿਹਾ ਕਿ ਸੰਬੰਧਿਤ ਮੈਂਬਰ ਜੁਝਾਰ ਸਿੰਘ ਢਿੱਲੋਂ ਤੋਂ ਅਸਤੀਫ਼ਾ ਲੈ ਲਿਆ ਗਿਆ ਹੈ ਅਤੇ ਸੋਸਾਇਟੀ ਨੇ ਉਸਨੂੰ ਅੱਗੇ ਤੋਂ ਵੀ ਮੈਂਬਰ ਨਾ ਬਣਾਉਣ ਦਾ ਪ੍ਰਣ ਕੀਤਾ ਹੈ। ਇਸੇ ਤਰ੍ਹਾਂ ਸਿੱਖ ਸੰਸਥਾਵਾਂ ਦਾ ਬਣਿਆ ਪੈਨਲ ਬਲਰਾਜ ਸ਼ੋਕਰ ਵੱਲੋਂ ਦਿੱਤੇ ਗਏ ਸਪਸ਼ਟੀਕਰਨ ਤੋਂ ਵੀ ਸੰਤੁਸ਼ਟ ਹੈ। ਇਹ ਪੁੱਛੇ ਜਾਣ ‘ਤੇ ਕਿ ਕੀ ਜੁਝਾਰ ਢਿੱਲੋਂ ਵੱਲੋਂ ਕੋਈ ਖਿਮਾ ਯਾਚਨਾ ਦਾ ਨੋਟਿਸ ਦਿੱਤਾ ਗਿਆ ਹੈ ਜਾਂ ਨਹੀਂ ਤਾਂ ਉਹਨਾਂ ਕਿਹਾ ਕਿ ਇਸ ਮਸਲੇ ਨੂੰ ਅਸੀਂ ਬਾਅਦ ਵਿਚ ਨਜਿੱਠ ਲਵਾਂਗੇ। ਉਹਨਾਂ ਇਹ ਵੀ ਕਿਹਾ ਕਿ ਜੁਝਾਰ ਢਿੱਲੋਂ ਵੱਲੋਂ ਕੱਲ ਰੇਡੀਓ ਪ੍ਰੋਗਰਾਮ ਦੌਰਾਨ ਜੋ ਗੱਲਬਾਤ ਕੀਤੀ ਗਈ, ਉਸ ਤੋਂ ਪੈਨਲ ਦੇ ਮੈਂਬਰ ਕਾਫ਼ੀ ਹੱਦ ਤੱਕ ਸੰਤੁਸ਼ਟ ਵੀ ਹਨ।

ਖਬਰਦਾਰ ਮੈਗਜ਼ੀਨ ਦੇ ਸੰਪਾਦਕ ਗੁਰਦੇਵ ਸਿੰਘ ਸੰਧੇਵਾਲੀਆ ਵੀ ਇਸ ਮੀਟਿੰਗ ਵਿਚ ਸ਼ਾਮਿਲ ਸਨ। ਉਹਨਾਂ ਨੇ ਵੀ ਸੋਸਾਇਟੀ ਦੇ ਸਹਿਯੋਗ ਤੋਂ ਸੰਤੁਸ਼ਟੀ ਦਰਸਾਈ। ਸੋਸਾਇਟੀ ਦੇ ਪ੍ਰਧਾਨ ਬਲਜਿੰਦਰ ਸਿੰਘ ਸੇਖੋਂ ਨੇ ਸਾਡੇ ਨਾਲ ਗੱਲਬਾਤ ਕਰਦਿਆਂ ਕਾਉਂਸਲ ਦਾ ਧੰਨਵਾਦ ਵੀ ਕੀਤਾ ਅਤੇ ਭਾਈਚਾਰੇ ਨੂੰ ਅਪੀਲ ਕੀਤੀ ਕਿ ਉਹ ਇਸ ਮਸਲੇ ਨੂੰ ਹੋਰ ਨਾਂ ਉਭਾਰਨ, ਸਗੋਂ ਅਜਿਹੇ ਮਸਲਿਆਂ ਨੂੰ ਸਦਭਾਵਨਾ ਦੇ ਮਾਹੌਲ ਵਿਚ ਸੁਲਝਾਉਣ ਦੀ ਪਿਰਤ ਪਾਈ ਜਾਵੇ। ਉਹਨਾਂ ਭਾਈਚਾਰੇ ਨੂੰ 14 ਤਰੀਕ ਨੂੰ ਹੋ ਰਹੇ ਫੰਕਸ਼ਨ ਵਿਚ ਪਹੁੰਚਣ ਦੀ ਅਪੀਲ ਕੀਤੀ। ਇਸ ਮੀਟਿੰਗ ਵਿਚ ਪੀਲ ਪੁਲੀਸ ਦੇ ਦੋ ਅਫਸਰ ਮੌਜੂਦ ਸਨ। ਜਿਹੜੇ ਬੀਤੇ ਦਿਨਾਂ ਤੋਂ ਇਸ ਪੂਰੀ ਸਥਿਤੀ ਉੱਤੇ ਨਜ਼ਰ ਰੱਖ ਰਹੇ ਸਨ।