ਨਵੀਂ
ਦਿੱਲੀ, 1 ਸਤੰਬਰ - ਕੇਂਦਰ ਵਿੱਚ ਮੋਦੀ ਸਰਕਾਰ ਨੇ ਆਪਣੇ ਹਿੰਦੁਤਵਾ ਨੂੰ ਫੈਲਾਉਣ ਦੇ
ਏਜੰਡੇ ਤੇ ਕੰਮ ਕਰਦਿਆਂ ਅਧਿਆਪਕ ਦਿਵਸ ਨੂੰ ‘ਗੁਰੂ ਉਤਸਵ’ ਵਜੋਂ ਮਨਾਉਣ ਅਤੇ ਪ੍ਰਧਾਨ
ਮੰਤਰੀ ਨਰਿੰਦਰ ਮੋਦੀ ਦਾ ਸਕੂਲ ਬੱਚਿਆਂ ਨਾਲ ਸੰਵਾਦ ਰਚਾਉਣ ਦੀਆਂ ਤਰਕੀਬਾਂ ਨਾਲ ਵਿਵਾਦ
ਪੈਦਾ ਹੋ ਗਿਆ ਹੈ। ਇਸ ਤੋਂ ਪਹਿਲਾਂ ਵੀ ਮੋਦੀ ਸਰਕਾਰ ਵੱਲੋਂ ਹਿੰਦੀ ਨੂੰ ਲਾਗੂ ਕਰਨ ਦਾ
ਫੁਰਮਾਨ ਜਾਰੀ ਕੀਤਾ ਸੀ।
ਵਿਰੋਧੀ ਧਿਰ ਕਾਂਗਰਸ ਅਤੇ ਹੋਰਨਾਂ ਸਮੇਤ ਭਾਜਪਾ ਦੀਆਂ ਭਾਈਵਾਲ
ਪਾਰਟੀਆਂ ਐਮ.ਡੀ.ਐਮ.ਕੇ. ਤੇ ਪੀਐਮਕੇ ਨੇ ਸਰਕਾਰ ਨੂੰ ਇਸ ਮਸਲੇ ’ਤੇ ਘੇਰਦਿਆਂ ਤਿੱਖੀ
ਨੁਕਤਾਚੀਨੀ ਕੀਤੀ ਹੈ। ਉਂਜ, ਮਨੁੱਖੀ ਵਸੀਲਿਆਂ ਬਾਰੇ ਵਿਕਾਸ ਮੰਤਰੀ ਸਮ੍ਰਿਤੀ ਇਰਾਨੀ ਨੇ
ਵਿਰੋਧੀ ਪਾਰਟੀਆਂ ਦੀ ਆਲੋਚਨਾ ’ਤੇ ਅਫਸੋਸ ਪ੍ਰਗਟ ਕਰਦਿਆਂ ਸਪਸ਼ਟ ਕੀਤਾ ਹੈ ਕਿ ਸੰਵਾਦ ’ਚ
ਵਿਦਿਆਰਥੀਆਂ ਦੀ ਸ਼ਮੂਲੀਅਤ ਉਨ੍ਹਾਂ ਦੀ ਮਰਜ਼ੀ ’ਤੇ ਨਿਰਭਰ ਹੈ।
ਕਾਂਗਰਸ ਆਗੂ ਮੁਨੀਸ਼ ਤਿਵਾੜੀ ਨੇ ਅਧਿਆਪਕ ਦਿਵਸ ਦਾ ਨਾਮ ਬਦਲਣ ਨੂੰ
ਪੈਕੇਜਿੰਗ ਦੀ ਕਵਾਇਦ ਕਰਾਰ ਦਿੱਤਾ ਹੈ ਤਾਂ ਜੋ ਬਾਅਦ ’ਚ ਇਸ ਨੂੰ ਨਿਵੇਕਲਾ ਕਦਮ ਦੱਸਿਆ
ਜਾ ਸਕੇ। ਤਾਮਿਲਨਾਡੂ ’ਚ ਭਾਜਪਾ ਦੀ ਦੋ ਭਾਈਵਾਲ ਪਾਰਟੀਆਂ ਪੀਐਮਕੇ ਅਤੇ ਐਮਡੀਐਮਕੇ ਨੇ
ਡੀਐਮਕੇ ਦੀ ਸੁਰ ’ਚ ਸੁਰ ਮਿਲਾਉਂਦਿਆਂ ਸੰਸਕ੍ਰਿਤ ਨੂੰ ਥੋਪਣ ਦੀ ਕੋਝੀ ਕੋਸ਼ਿਸ਼ ਕਰਾਰ
ਦਿੱਤਾ ਹੈ। ਐਸ ਰਾਮਦੋਸ ਅਤੇ ਵਾਈਕੋ ਨੇ ਕੇਂਦਰ ਨੂੰ ‘ਗੁਰੂ ਉਤਸਵ’ ਨਾਮ ਤੁਰੰਤ ਵਾਪਸ
ਲੈਣ ਦੀ ਮੰਗ ਕੀਤੀ ਹੈ। ਡੀਐਮਕੇ ਮੁਖੀ ਐਮ ਕਰੁਣਾਨਿਧੀ ਨੇ ਸਰਕਾਰ ਦੇ ਇਸ ਫੈਸਲੇ ਨੂੰ
ਤਾਮਿਲ ਭਾਸ਼ਾ ਅਤੇ ਸਮਾਜ ਨੂੰ ਨੀਵਾਂ ਦਿਖਾਉਣ ਦੀ ਸਾਜ਼ਿਸ਼ ਗਰਦਾਨਿਆ ਹੈ।
ਮੰਤਰੀ ਸਮ੍ਰਿਤੀ ਇਰਾਨੀ ਨੇ ਸਪਸ਼ਟ ਕਰਦਿਆਂ ਕਿਹਾ ਕਿ ਅਧਿਆਪਕਾਂ ਦੇ
ਯੋਗਦਾਨ ਨੂੰ ਸਲਾਹੁਣ ਲਈ ਲੇਖ ਮੁਕਾਬਲੇ ਦਾ ਨਾਮ ‘ਗੁਰੂ ਉਤਸਵ’ ਰੱਖਿਆ ਗਿਆ ਹੈ।
ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦਾ ਭਾਸ਼ਨ ਸ਼ਾਮ ਤਿੰਨ ਵਜੇ ਤੋਂ ਪੌਣੇ
5 ਵਜੇ ਤੱਕ ਹੋਵੇਗਾ ਜਿਸ ਦਾ ਕਾਂਗਰਸ ਵੱਲੋਂ ਵਿਰੋਧ ਕੀਤਾ ਜਾ ਰਿਹਾ ਹੈ। ਕਾਂਗਰਸ ਆਗੂ
ਮੁਨੀਸ਼ ਤਿਵਾੜੀ ਨੇ ਕਿਹਾ ਕਿ ਜੇਕਰ ਪ੍ਰਧਾਨ ਮੰਤਰੀ ਬੱਚਿਆਂ ਨਾਲ ਸੰਵਾਦ ਰਚਾਉਣਾ ਚਾਹੁੰਦੇ
ਹਨ ਤਾਂ ਉਨ੍ਹਾਂ ਨੂੰ ਸਕੂਲ ਦੇ ਸਮੇਂ ’ਚ ਅਜਿਹਾ ਕਰਨਾ ਚਾਹੀਦਾ ਹੈ। ਸ੍ਰੀ ਮੋਦੀ 5
ਸਤੰਬਰ ਨੂੰ ਮਾਨਕਸ਼ਾਹ ਆਡੀਟੋਰੀਅਮ ’ਚ ਇਕ ਹਜ਼ਾਰ ਵਿਦਿਆਰਥੀਆਂ ਨੂੰ ਸੰਬੋਧਨ ਕਰਨਗੇ ਅਤੇ
ਵੀਡੀਓ ਕਾਨਫਰੰਸਿੰਗ ਰਾਹੀਂ ਕੁਝ ਸਵਾਲਾਂ ਦਾ ਜਵਾਬ ਵੀ ਦੇਣਗੇ। ਇਹ ਪ੍ਰੋਗਰਾਮ 18 ਲੱਖ
ਸਰਕਾਰੀ ਅਤੇ ਪ੍ਰਾਈਵੇਟ ਸਕੂਲਾਂ ’ਚ ਸਾਰੇ ਦੂਰਦਰਸ਼ਨ ਅਤੇ ਸਿੱਖਿਆ ਚੈਨਲਾਂ ਰਾਹੀਂ ਸਿੱਧਾ
ਪ੍ਰਸਾਰਿਤ ਕੀਤਾ ਜਾਵੇਗਾ।
