ਚੰਡੀਗੜ੍ਹ,
31 ਅਗੱਸਤ: ਪੰਜਾਬ ਅੰਦਰ ਅਕਾਲੀ-ਭਾਜਪਾ ਗਠਜੋੜ ਵਿਚਕਾਰ ਵੱਖੋ-ਵੱਖ ਮੁੱਦਿਆਂ 'ਤੇ
ਦਰਾੜ ਪੈਂਦੀ ਦਿਖ ਰਹੀ ਹੈ। ਭਾਵੇਂ ਸੀਨੀਅਰ ਅਕਾਲੀ ਆਗੂ ਪੀ.ਐਸ. ਗਿੱਲ ਵਲੋਂ ਭਾਜਪਾ
'ਚ ਸ਼ਾਮਲ ਹੋਣ ਦਾ ਮੁੱਦਾ ਹੋਵੇ ਜਾਂ ਸੂਬੇ ਅੰਦਰ ਪ੍ਰਾਪਰਟੀ ਟੈਕਸ ਅਤੇ ਅਡਵਾਂਸ
ਟੈਕਸ ਲਾਗੂ ਦਾ ਮੁੱਦਾ ਹੋਵੇ, ਦੋਹਾਂ ਭਾਈਵਾਲ ਪਾਰਟੀਆਂ ਦਰਮਿਆਨ ਤਲਖੀ ਵਧਦੀ ਜਾ ਰਹੀ
ਹੈ।
ਸ਼੍ਰੋਮਣੀ ਅਕਾਲੀ ਦਲ (ਬਾਦਲ) ਦੇ ਸਰਪ੍ਰਸਤ ਅਤੇ ਮੁੱਖ ਮੰਤਰੀ
ਪ੍ਰਕਾਸ਼ ਸਿੰਘ ਬਾਦਲ ਨੇ ਅਕਾਲੀ ਵਿਧਾਇਕ ਗਿੱਲ ਦੇ ਭਾਜਪਾ 'ਚ ਸ਼ਾਮਲ ਹੋਣ ਨੂੰ 'ਮੰਦਭਾਗਾ'
ਕਰਾਰ ਦਿਤਾ ਸੀ ਅਤੇ ਕਿਹਾ ਕਿ ਦੋਹਾਂ ਪਾਰਟੀਆਂ ਨੂੰ ਇਕ-ਦੂਜੀ ਪਾਰਟੀ ਦੇ ਆਗੂਆਂ
ਹਥਿਆਉਣ ਤੋਂ ਬਚਣਾ ਚਾਹੀਦਾ ਹੈ ਕਿਉਂਕਿ ਇਹ ਗਠਜੋੜ ਧਰਮ ਦੀ ਉਲੰਘਣਾ ਹੋਵੇਗੀ।
ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਦੇ ਸੀਨੀਅਰ ਆਗੂ ਅਤੇ ਪੰਜਾਬ
ਦੇ ਪਾਰਟੀ ਇੰਚਾਰਜ ਸ਼ਾਂਤਾ ਕੁਮਾਰ ਨੇ ਹਾਲਾਂਕਿ ਅੱਜ ਬਾਦਲ ਵਲੋਂ ਚੁੱਕੇ ਇਤਰਾਜ਼ 'ਤੇ
ਕੁੱਝ ਕਹਿਣ ਤੋਂ ਇਨਕਾਰ ਕਰ ਦਿਤਾ। ਉਨ੍ਹਾਂ ਅੱਜ ਜਲੰਧਰ ਵਿਖੇ ਕਿਹਾ, ''ਮੈਨੂੰ ਇਸ
ਬਾਰੇ ਕੁੱਝ ਨਹੀਂ ਪਤਾ। ਮੈਂ ਇਸ ਮੁੱਦੇ 'ਤੇ ਕੋਈ ਟਿਪਣੀ ਨਹੀਂ ਕਰਾਂਗਾ। ਮੈਨੂੰ ਨਹੀਂ
ਪਤਾ ਕਿ ਕਿਹੜੇ ਅਕਾਲੀ ਆਗੂ ਨੇ ਸਾਡੀ ਪਾਰਟੀ 'ਚ ਸ਼ਿਰਕਤ ਕੀਤੀ ਹੈ ਅਤੇ ਮੁੱਖ ਮੰਤਰੀ
ਨੇ ਇਸ ਬਾਰੇ ਕੀ ਕਿਹਾ ਹੈ।'' ਉਨ੍ਹਾਂ ਇਸ ਗੱਲ ਤੋਂ ਇਨਕਾਰ ਕੀਤਾ ਕਿ ਪੰਜਾਬ 'ਚ
ਦੋਹਾਂ ਪਾਰਟੀਆਂ ਵਿਚਕਾਰ ਦਰਾੜ ਪੈਣੀ ਸ਼ੁਰੂ ਹੋ ਗਈ ਹੈ।
ਪੰਜਾਬ ਭਾਜਪਾ ਦੇ ਮੁਖੀ ਕਮਲ ਸ਼ਰਮਾ ਨੇ ਇਸ ਦੌਰਾਨ ਕਿਹਾ ਕਿ
ਪੁਲਿਸ ਅਫ਼ਸਰ ਵਜੋਂ ਅਪਣੇ ਕਾਰਜਕਾਲ ਦੌਰਾਨ ਜ਼ਿਆਦਾਤਰ ਸਮਾਂ ਗਿੱਲ ਜੰਮੂ-ਕਸ਼ਮੀਰ 'ਚ
ਰਹੇ ਸਨ ਅਤੇ ਉਹ ਜੰਮੂ ਅਤੇ ਕਸ਼ਮੀਰ ਦੇ ਲੋਕਾਂ ਬਾਰੇ ਜ਼ਿਆਦਾ ਜਾਣਦੇ ਹਨ। ਇਸ ਲਈ ਉਹ
ਉਥੇ ਹੀ ਭਾਜਪਾ 'ਚ ਸ਼ਾਮਲ ਹੋਣਗੇ। ਗਿੱਲ 1974 ਬੈਚ ਦੇ ਜੰਮੂ-ਕਸ਼ਮੀਰ ਕੈਡਰ ਦੇ ਆਈ.ਪੀ.ਐਸ.
ਅਫ਼ਤਸਰ ਹਨ ਅਤੇ ਪੰਜਾਬ ਦੇ ਸਾਬਕਾ ਪੁਲਿਸ ਮੁਖੀ ਵੀ ਹਨ, ਜਿਨ੍ਹਾਂ ਨੇ ਪਿੱਛੇ ਜਿਹੇ
ਕਠੂਆ ਵਿਖੇ ਭਾਜਪਾ ਪ੍ਰਧਾਨ ਅਮਿਤ ਸ਼ਾਹ ਦੀ ਰੈਲੀ 'ਚ ਅਕਾਲੀ ਦਲ ਨੂੰ ਛੱਡ ਕੇ ਭਾਜਪਾ
'ਚ ਸ਼ਿਰਕਤ ਕਰ ਲਈ ਸੀ।
ਇਸ ਤੋਂ ਪਹਿਲਾਂ ਕਈ ਅਜਿਹੀਆਂ ਘਟਨਾਵਾਂ ਹੋ ਚੁਕੀਆਂ ਹਨ ਜਿਸ
ਕਾਰਨ ਦੋਹਾਂ ਭਾਈਵਾਲਾਂ ਵਿਚਕਾਰ ਖਹਿਬਾਜ਼ੀ ਸਾਹਮਣੇ ਆਈ ਸੀ। ਜੂਨ 'ਚ ਸੀਨੀਅਰ ਭਾਜਪਾ
ਆਗੂ ਬਲਰਾਮਜੀ ਦਾਸ ਟੰਡਨ ਨੇ ਬਾਦਲ ਦੀ ਪ੍ਰਧਾਨ ਮੰਤਰੀ ਨਾਲ ਬੈਠਕ 'ਤੇ ਇਤਰਾਜ਼
ਪ੍ਰਗਟ ਕਰਦਿਆਂ ਕਿਹਾ ਸੀ ਕਿ ਉਹ ਕਿਸੇ ਭਾਜਪਾ ਆਗੂ ਨੂੰ ਨਾਲ ਲੈ ਕੇ ਕਿਉਂ ਨਹੀਂ ਗਏ?
ਬਾਦਲ ਪ੍ਰਧਾਨ ਮੰਤਰੀ ਕੋਲ ਇਰਾਕ 'ਚ ਫਸੇ ਪੰਜਾਬੀਆਂ ਨੂੰ ਛੇਤੀ ਛੁਡਵਾ ਕੇ ਲਿਆਉਣ
ਦੀ ਮੰਗ ਲੈ ਕੇ ਗਏ ਸਨ।
ਹਾਲਾਂਕਿ ਬਾਦਲ ਨੇ ਕਿਹਾ ਸੀ ਕਿ ਸੂਬੇ ਦੇ ਮੁੱਖੀ ਹੋਣ ਕਾਰਨ
ਮੁੱਖ ਮੰਤਰੀ ਕਦੀ ਵੀ ਪ੍ਰਧਾਨ ਮੰਤਰੀ ਅਤੇ ਕੇਂਦਰੀ ਮੰਤਰੀਆਂ ਨੂੰ ਮਿਲ ਸਕਦਾ ਹੈ
ਕਿਉਂਕਿ ਅਜਿਹੀਆਂ ਬੈਠਕਾਂ ਦਾ ਇਕੋ-ਇਕ ਮੰਤਵ ਸੂਬੇ ਦੇ ਲੋਕਾਂ ਦੀ ਭਲਾਈ ਅਤੇ ਵਿਕਾ
ਹੁੰਦਾ ਹੈ।
ਇਕ ਹੋਰ ਘਟਨਾ 'ਚ ਅਕਾਲੀ ਦਲ ਨੇ ਜੂਨ 'ਚ ਭਾਜਪਾ ਦੇ ਵਿਧਾਇਕ
ਅਤੇ ਕੈਬਨਿਟ ਰੈਂਕ ਮੰਤਰੀ ਅਨਿਲ ਜੋਸ਼ੀ ਨੂੰ ਕਿਹਾ ਸੀ ਕਿ ਉਹ 'ਅਡਵਾਂਸ ਟੈਕਸ ਅਤੇ
ਪ੍ਰਾਪਰਟੀ ਟੈਕਸ' ਨੂੰ ਵਾਪਸ ਲੈਣ ਦੇ ਮੁੱਦੇ 'ਤੇ ਸਿਆਸਤ ਨਾ ਕਰਨ। ਜੋਸ਼ੀ ਨੇ ਇਸ
ਮੁੱਦੇ 'ਤੇ ਅਪਣੀ ਹੀ ਸਰਕਾਰ ਦੀ ਨਿਖੇਧੀ ਕੀਤੀ ਸੀ। ਬਾਅਦ 'ਚ ਦੋਹਾਂ ਪਾਰਟੀਆਂ
ਵਿਚਕਾਰ ਪੈਦਾ ਹੋ ਰਹੀ ਦਰਾਰ ਨੂੰ ਭਰਨ ਲਈ ਇਕ ਤਾਲਮੇਲ ਕਮੇਟੀ ਕਾਇਮ ਕੀਤੀ ਗਈ ਸੀ
ਜਿਸ 'ਚ ਦੋਹਾਂ ਪਾਰਟੀਆਂ ਦੇ ਆਗੂ ਸ਼ਾਮਲ ਸਨ। (ਪੀਟੀਆਈ)
