ਅੰਮ੍ਰਿਤਸਰ
20 ਅਗਸਤ (ਜਸਬੀਰ ਸਿੰਘ): ਸ੍ਰ ਹਰਬੀਰ ਸਿੰਘ ਦਫਤਰ ਸਕੱਤਰ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ)
ਨੇ ਆਪਣੇ ਆਪ ਨੂੰ ਤਖਤ ਸ੍ਰੀ ਪਟਨਾ ਸਾਹਿਬ ਦਾ ਜਥੇਦਾਰ ਹੋਣ ਦਾ ਦਾਅਵਾ ਕਰਨ ਵਾਲੇ ਗਿਆਨੀ
ਇਕਬਾਲ ਸਿੰਘ ਵੱਲੋਂ ਸਿੱਖ ਪੰਥ ਦੀ ਦੁਸ਼ਮਣ ਨੰਬਰ ਇੱਕ ਜਮਾਤ ਆਰ.ਐਸ.ਐਸ ਦੀ ਹੋਈ ਮੀਟਿੰਗ
ਵਿੱਚ ਭਾਗ ਲੈਣ ਦੀ ਕੜੀ ਆਲੋਚਨਾ ਕਰਦਿਆਂ ਕਿਹਾ ਕਿ ਗਿਆਨੀ ਇਕਬਾਲ ਸਿੰਘ ਨੂੰ ਪੰਥ ਵਿੱਚੋਂ
ਬਿਨਾਂ ਕਿਸੇ ਦੇਰੀ ਤੋਂ ਖਾਰਜ ਕੀਤਾ ਜਾਵੇ, ਕਿਉਂਕਿ ਉਸ ਨੇ ਸੰਘ ਦੀ ਇਸ ਮੀਟਿੰਗ ਵਿੱਚ
ਸ਼ਾਮਲ ਹੋ ਕੇ ਸਿੱਖ ਪੰਥ ਦਾ ਧ੍ਰੋਹ ਕਮਾਇਆ ਹੈ।
ਜਾਰੀ ਇੱਕ ਬਿਆਨ ਰਾਹੀ ਸ੍ਰ. ਹਰਬੀਰ ਸਿੰਘ ਨੇ ਕਿਹਾ ਕਿ ਜਿਸ ਕੌਮ ਵਿੱਚ ਇਕਬਾਲ ਸਿੰਘ ਵਰਗੇ ਤਖਤਾਂ
ਦੇ ਜਥੇਦਾਰ ਅਖਵਾਉਣ ਵਾਲੇ ਬੈਠੇ ਹੋਣ, ਉਸ ਕੌਮ ਨੂੰ ਹੋਰ ਕਿਸੇ ਦੁਸ਼ਮਣ ਕੋਈ ਦੀ ਲੋੜ ਨਹੀਂ
ਹੈ। ਉਹਨਾਂ ਕਿਹਾ ਕਿ ਇਕਬਾਲ ਸਿੰਘ ‘ਤੇ ਪਹਿਲਾਂ ਹੀ ਉਸਦੀ
ਦੂਸਰੀ ਪਤਨੀ ਸੰਗੀਨ ਦੋਸ਼ ਲਗਾ ਚੁੱਕੀ ਹੈ, ਤੇ ਉਸਨੇ ਗੁਰੂ ਸਾਹਿਬ ਦੀ ਮੁਬਾਰਕ
ਬਚਨਾਂ ‘ਸੋ ਕਿਉ ਮੰਦਾ ਆਖੀਐ ਜਿਤੁ ਜੰਮੇ ਰਾਜਾਨ’ ਦੀ
ਉਲੰਘਣਾ ਕਰਦਿਆਂ ਆਪਣੀ ਦੂਸਰੀ ਪਤਨੀ 'ਤੇ ਅਥਾਹ ਜ਼ੁਲਮ ਕੀਤੇ, ਜਿਸਦੀ ਸਿੱਖ ਧਰਮ ਕਦਾਚਿਤ
ਆਗਿਆ ਨਹੀਂ ਦਿੰਦਾ।
ਉਹਨਾਂ ਕਿਹਾ ਕਿ ਇਕਬਾਲ ਸਿੰਘ ਗਿਆਨੀ
ਨਹੀਂ, ਸਗੋਂ ਅਗਿਆਨੀ ਹੈ, ਜਿਸ ਦੀ ਦੂਸਰੀ ਪਤਨੀ ਬੀਬੀ ਬਲਜੀਤ ਕੌਰ ਨੇ ਤਾਂ ਇਸ ਦੇ
ਤਸ਼ੱਦਦ ਦੀ ਇੱਕ ਐਫ.ਆਈ.ਆਰ ਵੀ ਥਾਣੇ ਵਿੱਚ ਦਰਜ ਕਰਵਾਈ ਤੇ ਉਹ ਬਾਰ ਬਾਰ ਅਧਿਕਾਰੀਆਂ ਕੋਲ
ਜਾ ਕੇ, ਇਕਬਾਲ ਸਿੰਘ ਦੀ ਗ੍ਰਿਫਤਾਰੀ ਦੀ ਮੰਗ ਕਰ ਰਹੀ ਹੈ। ਉਹਨਾਂ ਕਿਹਾ ਕਿ
ਸਿੱਖ ਰਹਿਤ ਮਰਿਆਦਾ ਅਨੁਸਾਰ ਪਹਿਲੀ ਪਤਨੀ ਦੇ ਹੁੰਦਿਆਂ ਕੋਈ ਵੀ ਸਿੱਖ ਦੂਸਰੀ ਸ਼ਾਦੀ ਨਹੀਂ
ਕਰਵਾ ਸਕਦਾ, ਪਰ ਗਿਆਨੀ ਇਕਬਾਲ ਸਿੰਘ ਨੇ ਤਾਂ ਖੁਦ ਇਸ ਪਵਿੱਤਰ ਦਸਤਾਵੇਜ ਦੀ ਉਲੰਘਣਾ
ਕਰਕੇ ਸਾਬਤ ਕਰ ਦਿੱਤਾ ਹੈ ਕਿ ਉਹ ਵਾਕਿਆ ਹੀ ਅਗਿਆਨੀ ਹੈ।
ਉਹਨਾਂ ਕਿਹਾ ਕਿ ਆਰ.ਐਸ.ਐਸ ਜਿਹੜੀ ਸਿੱਖਾਂ ਨੂੰ ਕੇਸਾਧਾਰੀ ਹਿੰਦੂ ਦੱਸ ਕੇ ਸਿੱਖਾਂ ਨੂੰ
ਹਿੰਦੂ ਧਰਮ ਵਿੱਚ ਵਿਲੀਨ ਕਰਨ ਦੀਆ ਬਾਤਾਂ ਪਾ ਰਹੀ ਹੈ, ਉਸ ਵੱਲੋਂ ਕੀਤੀ ਗਈ ਉਸ ਮੀਟਿੰਗ
ਵਿੱਚ ਇਸ ਪੰਥਕ ਅਗਿਆਨੀ ਨੇ ਭਾਗ ਲਿਆ ਹੈ,
ਜਿਸ ਮੀਟਿੰਗ ਵਿੱਚ ਆਰ.ਐਸ.ਐਸ ਮੁੱਖੀ
ਮੋਹਨ ਭਾਗਵਤ ਨੇ ਖੁਦ ਕਹਿ ਰਿਹਾ ਹੈ ਕਿ ਹਿੰਦੂ ਧਰਮ ਦੇਸ ਵਿੱਚ ਵੱਸਦੀਆਂ ਘੱਟ ਗਿਣਤੀਆ
ਨੂੰ ਆਪਣੇ ਵਿੱਚ ਜ਼ਜਬ ਕਰਨ ਦੀ ਸਮੱਰਥਾ ਰੱਖਦਾ ਹੈ।
ਉਹਨਾਂ ਕਿਹਾ ਕਿ ਜਦੋਂ ਭਾਗਵਤ ਆਪਣੇ ਮੁਖਾਰਬਿੰਦ ਤੋਂ ਸਿੱਖਾਂ 'ਤੇ ਹੋਰ ਘੱਟ ਗਿਣਤੀਆਂ
‘ਤੇ ਹਮਲੇ ਕਰ ਰਿਹਾ ਸੀ, ਤਾਂ ਅਗਿਆਨੀ ਇਕਬਾਲ ਸਿੰਘ ਨੇ ਕੋਈ ਵੀ ਪ੍ਰਤੀਕਰਮ ਜ਼ਾਹਿਰ ਨਹੀਂ
ਕੀਤਾ। ਉਹਨਾਂ ਕਿਹਾ ਕਿ ਸਿੱਖ ਇੱਕ ਵੱਖਰੀ ਕੌਮ ਹੈ ਅਤੇ ਇਸ ਨੂੰ ਕੇਸਾਧਾਰੀ ਹਿੰਦੂ ਹੋਣਾ
ਕਦੇ ਵੀ ਕਬੂਲ ਨਹੀਂ ਕੀਤਾ ਜਾ ਸਕਦਾ। ਉਹਨਾਂ ਕਿਹਾ ਕਿ ਉਹ ਜਿਥੇ ਭਾਗਵਤ ਦੇ ਬਿਆਨ ਦੀ ਕੜੇ
ਸ਼ਬਦਾਂ ਵਿੱਚ ਨਿਖੇਧੀ ਕਰਦੇ ਹਨ, ਉਥੇ ਅਗਿਆਨੀ ਇਕਬਾਲ ਸਿੰਘ ਨੂੰ ਤਾੜਨਾ ਕਰਦੇ ਹਨ, ਕਿ
ਸਿੱਖ ਕੌਂਮ ਉਸ ਦੀਆਂ ਅਜਿਹੀਆਂ ਹਰਕਤਾਂ ਨੂੰ ਕਦਾਚਿਤ ਬਰਦਾਸ਼ਤ ਨਹੀਂ ਕਰੇਗੀ।
ਉਹਨਾਂ ਕਿਹਾ ਕਿ ਗਿਆਨੀ ਗੁਰਬਚਨ ਸਿੰਘ ਜਿਹੜਾ ਆਪਣੇ ਆਪ ਨੂੰ ਜਥੇਦਾਰ ਅਕਾਲ ਤਖਤ ਸਾਹਿਬ
ਹੋਣ ਦਾ ਦਾਅਵਾ ਕਰਦਾ ਹੈ, ਦੀ ਵੀ ਜਿੰਮੇਵਾਰੀ ਬਣਦੀ ਹੈ, ਕਿ ਉਹ ਬਿਨਾਂ ਕਿਸੇ ਦੇਰੀ ਤੋਂ
ਗਿਆਨੀ ਇਕਬਾਲ ਸਿੰਘ ਨੂੰ ਅਕਾਲ ਤਖਤ ਸਾਹਿਬ 'ਤੇ ਤਲਬ ਕਰਕੇ, ਉਸ ਦੀ ਜਵਾਬ ਤਲਬੀ ਕਰਕੇ
ਤੇ ਮਰਿਆਦਾ ਅਨੁਸਾਰ ਉਸ ਵਿਰੁੱਧ ਕਾਰਵਾਈ ਕਰੇ।