Main News Page

ਕੁਰੂਕਸ਼ੇਤਰ, 9 ਅਗਸਤ:-ਹਰਿਆਣਾ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦਾ 7 ਮੈਂਬਰ ਵਫ਼ਦ ਛੇਤੀ ਹੀ ਮੁੱਖ ਮੰਤਰੀ ਚੌ. ਭੁਪਿੰਦਰ ਸਿੰਘ ਹੁੱਡਾ ਨੂੰ ਮਿਲੇਗਾ ਅਤੇ 6 ਅਗਸਤ ਨੂੰ ਕੁਰੂਕਸ਼ੇਤਰ ‘ਚ ਪੁਲਿਸ ਵੱਲੋਂ ਕੀਤੇ ਗਏ ਲਾਠੀਚਾਰਜ ‘ਚ ਹੋਏ ਜ਼ਖ਼ਮੀਆਂ ਅਤੇ ਪੁਲਿਸ ਵੱਲੋਂ ਤੋੜੇ ਗਏ ਵਾਹਨਾਂ ਲਈ ਵਾਜ਼ਬ ਮੁਆਵਜ਼ੇ ਦੀ ਮੰਗ ਕਰੇਗਾ । ਏਨਾ ਹੀ ਨਹੀਂ ਕਮੇਟੀ ਦਾ 5 ਮੈਂਬਰੀ ਇਕ ਵਫ਼ਦ ਦਿੱਲੀ ਵੀ ਜਾਵੇਗਾ, ਜਿੱਥੇ ਜਾ ਕੇ ਸੀਨੀਅਰ ਵਕੀਲਾਂ ਨਾਲ ਵਿਚਾਰ-ਵਟਾਂਦਰਾ ਕਰਕੇ ਅਗਲੀ ਰਣਨੀਤੀ ਤਿਆਰ ਕਰੇਗਾ, ਤਾਂ ਜੋ 25 ਅਗਸਤ ਨੂੰ ਲੱਗੀ ਪੇਸ਼ੀ ‘ਚ ਹਰਿਆਣਾ ਕਮੇਟੀ ਦਾ ਪੱਖ ਪ੍ਰਭਾਵੀ ਢੰਗ ਨਾਲ ਰੱਖਿਆ ਜਾ ਸਕੇ । ਇਹ ਖੁਲਾਸਾ ਕਮੇਟੀ ਦੇ ਉਪ ਪ੍ਰਧਾਨ ਜਥੇਦਾਰ ਅਵਤਾਰ ਸਿੰਘ ਮਛੌਾਡਾ ਨੇ ਕਰਦਿਆਂ ਦੱਸਿਆ ਕਿ ਗੁਰਦੁਆਰਾ ਸਾਹਿਬ ਪਾਤਸ਼ਾਹੀ 6ਵੀਂ ਅਤੇ 9ਵੀਂ ਚੀਕਾ ‘ਚ ਹੋਈ ਜਨਰਲ ਹਾਊਸ ਦੀ ਬੈਠਕ ‘ਚ ਲਿਆ ਗਿਆ ਹੈ ।

ਉਨ੍ਹਾਂ ਦੱਸਿਆ ਕਿ ਬੈਠਕ ਤੋਂ ਪਹਿਲਾਂ ਗੁਰਦੁਆਰਾ ਸਾਹਿਬ ‘ਚ ਸ਼ੁਕਰਾਨਾ ਸਮਾਗਮ ਵੀ ਹੋਇਆ, ਜਿਸ ‘ਚ ਕਮੇਟੀ ਦੇ ਕਰੀਬ 25 ਮੈਂਬਰਾਂ ਨੇ ਹਿੱਸਾ ਲਿਆ । ਸ਼ੁਕਰਾਨਾ ਸਮਾਗਮ ਕਮੇਟੀ ਵੱਲੋਂ ਗੁਰਦੁਆਰਾ ਸਾਹਿਬ ਦੀ ਸੇਵਾ ਸੰਭਾਲਣ ਦੇ ਸਬੰਧ ‘ਚ ਕੀਤਾ ਗਿਆ ਸੀ । ਮਛੌਾਡਾ ਨੇ ਦੱਸਿਆ ਕਿ ਇਸ ਤੋਂ ਇਲਾਵਾ ਬੈਠਕ ‘ਚ 5 ਹੋਰ ਮਤੇ ਵੀ ਪਾਸ ਕੀਤੇ ਗਏ, ਜਿਨ੍ਹਾਂ ‘ਚ ਮੁੱਖ ਮੰਤਰੀ ਤੋਂ ਮੰਗ ਕੀਤੀ ਗਈ ਕਿ 6 ਅਗਸਤ ਨੂੰ ਕੁਰੂਕਸ਼ੇਤਰ ‘ਚ ਹੋਏ ਲਾਠੀਚਾਰਜ ਦੀ ਉੱਚ ਪੱਧਰੀ ਜਾਂਚ ਕਰਵਾ ਕੇ ਦੋਸ਼ੀ ਪੁਲਿਸ ਕਰਮਚਾਰੀਆਂ ਖਿਲਾਫ਼ ਵਾਜ਼ਬ ਕਾਰਵਾਈ ਕੀਤੀ ਜਾਵੇ ਤੇ ਗੁਰਦੁਆਰਿਆਂ ਦੀ ਸੇਵਾ ਜੋ ਹਰਿਆਣਾ ਕਮੇਟੀ ਨੇ ਸੰਭਾਲ ਲਈ ਹੈ, ਉਨ੍ਹਾਂ ਦੀ ਸੁਰੱਖਿਆ ਦੀ ਜ਼ਿੰਮੇਵਾਰੀ ਪ੍ਰਸ਼ਾਸਨ ਲਏ, ਕਿਉਂਕਿ ਉਨ੍ਹਾਂ ਨੂੰ ਸ਼ੱਕ ਹੈ ਕਿ ਸ਼ੋ੍ਰਮਣੀ ਕਮੇਟੀ ਸਮਰਥੱਕ ਉਥੇ ਗੜਬੜ ਕਰ ਸਕਦੇ ਹਨ । ਇਕ ਹੋਰ ਮਤੇ ‘ਚ ਕਿਹਾ ਗਿਆ ਹੈ ਕਿ ਸ਼ੋ੍ਰਮਣੀ ਕਮੇਟੀ ਵੱਲੋਂ ਹਰਿਆਣਾ ਦੇ ਇਤਿਹਾਸਕ ਗੁਰਦੁਆਰਾ ਸਾਹਿਬਾਨ ‘ਚ ਹੁਣ ਵੀ ਟਾਸਕ ਫੋਰਸ ਭੇਜੀ ਜਾ ਰਹੀ ਹੈ ।

ਇਸ ਤੋਂ ਇਲਾਵਾ ਟਰਾਲੀਆਂ ‘ਚ ਭਰ ਕੇ ਇੱਟਾਂ-ਰੋੜੇ ਲਿਆਂਦੇ ਜਾ ਰਹੇ ਹਨ ਜਿਨ੍ਹਾਂ ਨੂੰ ਗੁਰਦੁਆਰਾ ਸਾਹਿਬ ਦੇ ਮੁੱਖ ਦੁਆਰ ਅਤੇ ਇਮਾਰਤ ਦੀ ਛੱਤ ‘ਤੇ ਵਿਛਾਇਆ ਜਾ ਰਿਹਾ ਹੈ । ਇਸ ਦੀ ਜਾਂਚ ਕਰਕੇ ਦੋਸ਼ੀ ਲੋਕਾਂ ਖਿ਼ਲਾਫ਼ ਕਾਰਵਾਈ ਕੀਤੀ ਜਾਵੇ ਅਤੇ ਟਾਸਕ ਫੋਰਸ ਨੂੰ ਵਾਪਿਸ ਮੋੜਿਆ ਜਾਵੇ । ਇਸ ਦੇ ਨਾਲ ਹੀ ਇਕ ਹੋਰ ਮਤੇ ‘ਚ ਬਾਬਾ ਬਲਜੀਤ ਸਿੰਘ ਦਾਦੂਵਾਲ ਖਿਲਾਫ਼ 5 ਸਾਲ ਪੁਰਾਣਾ ਕੇਸ ਖੋਲੇ ਜਾਣ ਦੀ ਵੀ ਨਿਖੇਧੀ ਕੀਤੀ ਗਈ । ਮੈਂਬਰਾਂ ਨੇ ਸਰਬਸੰਮਤੀ ਨਾਲ ਮਤਾ ਪਾਸ ਕਰਕੇ ਪੰਜਾਬ ਸਰਕਾਰ ਨੂੰ ਚਿਤਾਵਨੀ ਦਿੱਤੀ ਕਿ ਉਹ ਇਸ ਕੇਸ ਨੂੰ ਫੋਰੀ ਵਾਪਿਸ ਲੈਣ ਨਹੀਂ ਤਾਂ ਛੇਤੀ ਹੀ ਜਬਰਦਸਤ ਅੰਦੋਲਨ ਕੀਤਾ ਜਾਵੇਗਾ। ਮਛੌਡਾ ਨੇ ਦੱਸਿਆ ਕਿ ਅੱਜ ਦੀ ਬੈਠਕ ‘ਚ ਕਮੇਟੀ ਦੇ ਸੀਨੀਅਰ ਉਪ ਪ੍ਰਧਾਨ ਦੀਦਾਰ ਸਿੰਘ ਨਲਵੀ ਕਿਸੇ ਕਾਰਨ ਨਹੀਂ ਆ ਸਕੇ, ਜਦਕਿ ਕਾਰਜਕਾਰਣੀ ਦੇ ਬਾਕੀ ਮੈਂਬਰ ਮੌਜੂਦ ਰਹੇ ।