Main News Page

ਅੰਮ੍ਰਿਤਸਰ 29 ਜੂਨ (ਜਸਬੀਰ ਸਿੰਘ) ਭਾਈ ਰੂਪਾ ਵਿਖੇ ਹੋਏ ਝਗੜੇ ਤੋਂ ਬਾਅਦ ਅਨੰਦਪੁਰ ਸਾਹਿਬ ਵਿਖੇ ਇੱਕ ਕਾਰ ਸੇਵਾ ਵਾਲੇ ਬਾਬੇ ਦਾ ਡੇਰਾ ਨੇਸਤੋਨਬੂਦ ਕਰਨ ਤੋਂ ਬਾਅਦ ਸ਼੍ਰੋਮਣੀ ਗੁਰੂਦੁਆਰਾ ਪ੍ਰਬੰਧਕ ਕਮੇਟੀ ਦੀ ਟਾਸਕ ਫੋਰਸ ਨੇ ਗੁੰਡਾਗਰਦੀ ਦਾ ਇੱਕ ਹੋਰ ਮੀਲ ਪੱਥਰ ਗੱਡਦਿਆਂ, ਉਹਨਾਂ ਦੁਕਾਨਾਂਦਾਰਾਂ ਦੀਆਂ ਦੁਕਾਨਾਂ ਨੂੰ ਨੇਸਤੋਂਨਬੂਦ ਕਰਨ ਦੀ ਕੋਸ਼ਿਸ਼ ਕੀਤੀ, ਜਿਹੜੇ ਪਿਛਲੇ ਕਈ ਦਹਾਕਿਆਂ ਤੋਂ ਦੁਕਾਨਦਾਰੀ ਕਰਕੇ ਆਪਣੇ ਪਰਿਵਾਰ ਪਾਲਦੇ ਹਨ। ਇਹ ਦੁਕਾਨਦਾਰ ਸ਼੍ਰੋਮਣੀ ਕਮੇਟੀ ਦੇ ਕਿਰਾਏਦਾਰ ਹਨ ਤੇ ਹਰ ਮਹੀਨੇ ਕਿਰਾਇਆ ਦੇ ਕੇ ਰਸੀਦ ਹਾਸਲ ਕਰਦੇ ਹਨ। ਪਿਛਲੇ ਲੰਮੇ ਸਮੇਂ ਤੋਂ ਸੁਰਖੀਆ ਵਿੱਚ ਰਹਿਣ ਵਾਲੇ ਸ਼੍ਰੋਮਣੀ ਕਮੇਟੀ ਦੇ ਸਕਤੱਰ ਸ੍ਰੀ ਦਿਲਜੀਤ ਸਿੰਘ ਬੇਦੀ ਦੀ ਅਗਵਾਈ ਹੇਠ ਭਾਰੀ ਗਿਣਤੀ ਵਿੱਚ ਟਾਸਕ ਫੋਰਸ ਦੇ ਮੁਲਾਜਮ ਜਦੋ ਕਾਬਜ ਦੁਕਾਨਦਾਰਾਂ ਦੀਆ ਦੁਕਾਨਾ ਨੂੰ ਢਾਹੁਣ ਵਾਸਤੇ ਡਿੱਚ ਮਸ਼ੀਨ ਲੈ ਕੇ ਚੌਕ ਬਾਬਾ ਸਾਹਿਬ ਵਿਖੇ ਪੁੱਜੇ ਤਾਂ ਦੁਕਾਨਾਂ ਐਤਵਾਰ ਹੋਣ ਕਾਰਨ ਬੰਦ ਪਈਆਂਸਨ।

ਜਦੋਂ ਦੁਕਾਨਦਾਰਾਂ ਨੂੰ ਪਤਾ ਲੱਗਾ ਤਾਂ ਉਹਨਾਂ ਨੇ ਸ਼੍ਰੋਮਣੀ ਕਮੇਟੀ ਦੇ ਬਾਬੇ ਨਾਨਕ ਦੇ ‘‘ਵੱਸਦੇ ਰਹੋ’’ ਦੇ ਸੰਕਲਪ ਦਾ ਵਾਸਤਾ ਪਾ ਕੇ ਦੁਕਾਨਾਂ ਨਾ ਢਾਹੁਣ ਦੀ ਬੇਨਤੀ ਕੀਤੀ, ਪਰ ਭੂਤਰੇ ਸ਼੍ਰੋਮਣੀ ਕਮੇਟੀ ਦੀ ਟਾਸਕ ਫੋਰਸ ਨੇ ਬਾਬੇ ਨਾਨਕ ਦੇ ਸੰਕਲਪ ਦੇ ਬਿਲਕੁਲ ਉਲਟ ਇਹਨਾਂ ਦੁਕਾਨਦਾਰਾਂ ਦੇ ਰੁਜਗਾਰ ਨੂੰ ਖਤਮ ਕਰਦਿਆਂ, ਜਦੋ ਡਿੱਚ ਮਸ਼ੀਨ ਨਾਲ ਹਮਲਾ ਕੀਤਾ ਤਾਂ ਦੁਕਾਨਦਾਰਾਂ ਨੇ ਅੱਗੋ ਇਸ ਦਾ ਵਿਰੋਧ ਕੀਤਾ ਤੇੋ ਦੋਹਾਂ ਧਿਰਾਂ ਵਿਚਕਾਰ ਜੰਮ ਕੇ ਡਾਂਗ ਸੋਟਾ ਤੇ ਇੱਟਾਂ ਰੋੜੇ ਚੱਲੇ ਤੇ ਦੋਹਾਂ ਧਿਰਾਂ ਦੇ ਵਿਅਕਤੀ ਫੱਟੜ ਹੋਏ ਜੋ ਹਸਪਤਾਲ ਵਿੱਚ ਜੇਰੇ ਇਲਾਜ ਹਨ। ਇਹਨਾਂ ਫੱਟੜਾਂ ਵਿੱਚ ਸ਼੍ਰੋਮਣੀ ਕਮੇਟੀ ਦੇ ਉਹ ਮਾਰਸ਼ਲ ਮੂਧਲ ਨਾਮੀ ਵਿਅਕਤੀ ਵੀ ਸ਼ਾਮਲ ਹੈ ਜਿਹੜਾ 6 ਜੂਨ 2014 ਨੂੰ ਵੀ ਲੋਕਾਂ ਤੇ ਹਮਲਾ ਕਰਨ ਵਾਲਿਆ ਵਿੱਚ ਮੋਹਰਲੀ ਕਤਾਰ ਵਿੱਚ ਸ਼ਾਮਲ ਸੀ। ਸ਼੍ਰੋਮਣੀ ਕਮੇਟੀ ਦੇ ਸਕੱਤਰ ਸ੍ਰ ਦਲਜੀਤ ਸਿੰਘ ਬੇਦੀ ਨੂੰ ਜਦੋਂ ਫੋਨ ਕੀਤਾ ਤਾਂ ਉਹਨਾਂ ਨੇ ਆਪਣਾ ਫੋਨ ਚੁੱਕਣ ਦੀ ਕੋਈ ਵੀ ਜ਼ਹਿਮਤ ਨਹੀ ਕੀਤੀ ਪਰ ਸ੍ਰ ਦਿਲਮੇਘ ਸਿੰਘ ਨੇ ਦੱਸਿਆ ਕਿ ਸ੍ਰੀ ਦਰਬਾਰ ਸਾਹਿਬ ਵਿਖੇ ਸ਼ਰਧਾਲੂਆ ਦੀ ਵੱਧਦੀ ਆਮਦ ਨੂੰ ਦੇਖਦੇ ਹੋਏ ਸ਼੍ਰੋਮਣੀ ਕਮੇਟੀ ਵੱਲੋ ਸ਼ਰਧਾਲੂਆ ਲਈ ਨਵੀਆ ਸਰਾਵਾਂ ਬਣਾਈਆ ਜਾ ਰਹੀਆ ਹਨ।

ਉਹਨਾਂ ਕਿਹਾ ਕਿ ਬਾਬਾ ਸਾਹਿਬ ਚੌਕ ਵਿਖੇ ਜਿਹੜਾ ਸਰਕਾਰੀ ਸਕੂਲ ਸ਼੍ਰੋਮਣੀ ਕਮੇਟੀ ਦੀ ਜਗਾ 'ਤੇ ਚੱਲਦਾ ਸੀ ਉਸ ਨੂੰ ਵੀ ਸਰਕਾਰ ਨੂੰ ਕਹਿ ਕੇ ਹੋਰ ਜਗਾ ਤੇ ਸ਼ਿਫਟ ਕਰ ਦਿੱਤਾ ਗਿਆ ਹੈ ਅਤੇ ਸ਼੍ਰੋਮਣੀ ਕਮੇਟੀ ਦੀਆ ਨੌ ਦੁਕਾਨਾਂ ਵਿੱਚ ਜਿਹੜੇ ਕਿਰਾਏਦਾਰ ਸਨ ਉਹਨਾਂ ਵਿੱਚੋ ਛੇ ਦੁਕਾਨਾ ਵਾਲਿਆ ਨਾਲ ਉਹਨਾਂ ਦਾ ਸਮਝੌਤਾ ਹੋ ਚੁੱਕਾ ਹੈ ਜਦ ਕਿ ਤਿੰਨ ਦੁਕਾਨਾਂ ਅਕਾਲੀ ਆਗੂ ਸ੍ਰ ਸਤਬੀਰ ਸਿੰਘ ਬਜਾਜ ਕੋਲ ਹਨ। ਉਹਨਾਂ ਦੱਸਿਆ ਕਿ ਜਦੋ ਅੱਜ ਦੁਪਿਹਰੇ ਸ਼੍ਰੋਮਣੀ ਕਮੇਟੀ ਦੇ ਮੁਲਾਜ਼ਮ ਛੇ ਦੁਕਾਨਾਂ ਢਾਹੁਣ ਲਈ ਗਏ ਤਾਂ ਸਤਬੀਰ ਸਿੰਘ ਬਜਾਜ ਤੇ ਉਸ ਦੇ ਸਾਥੀਆ ਨੇ ਸ਼ਾਤਮਈ ਕੰਮ ਕਰ ਕਰੇ ਸ਼੍ਰੋਮਣੀ ਕਮੇਟੀ ਮੁਲਾਜ਼ਮਾਂ ‘ਤੇ ਹਮਲਾ ਕਰ ਦਿੱਤਾ। ਇਸ ਹਮਲੇ ਦੌਰਾਨ ਪਰਮਜੀਤ ਸਿੰਘ ਮੀਤ ਮੈਨੇਜਰ ਸ੍ਰੀ ਦਰਬਾਰ ਸਾਹਿਬ ਸਮੇਤ ਕਰੀਬ ਅੱਧੀ ਦਰਜਨ ਵਿਅਕਤੀ ਫੱਟੜ ਹੋਏ। ਉਹਨਾਂ ਕਿਹਾ ਕਿ ਸਤਬੀਰ ਸਿੰਘ ਵੱਲੋ ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਉਸ ਕੋਲ ਸਾਰੀਆ ਦੁਕਾਨਾਂ ਦੀਆ ਛੱਤਾਂ ਦਾ ਕਬਜਾ ਹੈ ਜੋ ਕਿਸੇ ਵੀ ਤਰਾ ਵਾਜਬ ਨਹੀ ਹੈ।

ਉਹਨਾਂ ਕਿਹਾ ਕਿ ਸਤਬੀਰ ਸਿੰਘ ਬਜਾਜ ਵੱਲੋ ਸ਼੍ਰੋਮਣੀ ਕਮੇਟੀ ਨੇ ਸ਼ਕਾਇਤ ਥਾਣਾ ‘ਸੀ’ ਡਵੀਜਨ ਵਿਖੇ ਦਰਜ ਕਰਵਾ ਦਿੱਤੀ ਹੈ ਪਰ ਉਹਨਾਂ ਅਫਸੋਸ ਪ੍ਰਗਟ ਕਰਦਿਆ ਕਿ ਇਹ ਮੰਦਭਾਗੀ ਘਟਨਾ ਨਹੀ ਵਾਪਰਨੀ ਚਾਹੀਦੀ ਸੀ। ਸ੍ਰ ਸਤਬੀਰ ਸਿੰਘ ਬਜਾਜ ਨੂੰ ਜਦੋਂ ਪੁੱਛਿਆ ਗਿਆ ਤਾਂ ਉਹਨਾਂ ਕਿਹਾ ਕਿ ਸ਼੍ਰੋਮਣੀ ਕਮੇਟੀ ਦੀਆ ਦੁਕਾਨਾਂ ਵਿੱਚ ਉਹ ਪਿਛਲੇ ਲੰਮੇ ਸਮੇਂ ਤੋਂ ਦੁਕਾਨਦਾਰੀ ਕਰਕੇ ਆਪਣੇ ਪਰਿਵਾਰ ਪਾਲ ਰਹੇ ਹਨ ਅਤੇ ਉਹਨਾਂ ਨੂੰ ਜਦੋ ਪਤਾ ਲੱਗਾ ਕਿ ਸ਼੍ਰੋਮਣੀ ਕਮੇਟੀ ਕਿਸੇ ਵੇਲੇ ਵੀ ਕੋਈ ਹਮਲਾ ਕਰ ਸਕਦੀ ਹੈ ਤਾਂ ਉਹਨਾਂ ਨੇ ਆਗਾਊ ਹੀ ਅਦਾਲਤ ਵਿੱਚੋ ਸਟੇਅ ਹਾਸਲ ਕਰ ਲਿਆ ਹੈ। ਉਹਨਾਂ ਕਿਹਾ ਕਿ ਜਿਲੇ ਦੇ ਡਿਪਟੀ ਕਮਿਸ਼ਨਰ ਕੋਲ ਉਹਨਾਂ ਦਾ ਕੇਸ ਵਿਚਾਰ ਅਧੀਨ ਹੈ ਅਤੇ ਪਹਿਲੀ ਜੁਲਾਈ 2014 ਨੂੰ ਇਸ ਕੇਸ ਦੀ ਸੁਣਵਾਈ ਹੈ। ਉਹਨਾਂ ਕਿਹਾ ਕਿ ਨੌ ਦੁਕਾਨਾਂ ਦੀਆ ਛੱਤਾਂ ਤੇ ਉਹਨਾਂ ਦਾ ਕਬਜ਼ਾ ਹੈ ਤੇ ਉਹ ਹਰ ਮਹੀਨੇ ਹੁਣ ਵੀ ਸ਼੍ਰੋਮਣੀ ਕਮੇਟੀ ਨੂੰ ਕਿਰਾਇਆ ਦੇ ਰਹੇ ਹਨ ਜਿਸਦੀਆ ਰਸੀਦਾਂ ਉਹਨਾਂ ਦੇ ਕੋਲ ਹਨ।

ਉਹਨਾਂ ਕਿਹਾ ਕਿ ਸ਼੍ਰੋਮਣੀ ਕਮੇਟੀ ਦਾ ਕਰੀਬ 400-500 ਬੰਦਾ ਅੱਜ ਦਲਜੀਤ ਸਿੰਘ ਬੇਦੀ ਦੀ ਅਗਵਾਈ ਹੇਠ ਆਇਆ ਤੇ ਉਹਨਾਂ ਨੇ ਆਉਦਿਆ ਹੀ ਬਜ਼ਾਰ ਵਿੱਚ ਧੀਆ ਭੈਣਾਂ ਦੀਆ ਗਾਲਾ ਕੱਢਣੀਆ ਸ਼ੁਰੂ ਕਰ ਦਿੱਤੀਆ। ਉਹਨਾਂ ਕਿਹਾ ਕਿ ਸਟੇਅ ਦੀ ਕਾਪੀ ਵਿਖਾਉਣ ਦੇ ਬਾਵਜੂਦ ਵੀ ਇਹ ਨਸ਼ੀਲੇ ਪਦਾਰਥਾਂ ਵਿੱਚ ਧੁੱਤ ਹੋਏ ਵਿਅਕਤੀ ਲਲਕਾਰੇ ਮਾਰਦੇ ਹੋਏ ਦੁਕਾਨਾਂ ਨੂੰ ਢਾਹੁਣ ਲੱਗ ਪਏ। ਉਹਨਾਂ ਕਿਹਾ ਕਿ ਸਮੁੱਚੇ ਬਜ਼ਾਰ ਨੇ ਜਦੋ ਇਹਨਾਂ ਦਾ ਵਿਰੋਧ ਕੀਤਾ ਤਾਂ ਨਸ਼ੇ ਵਿੱਚ ਧੁੱਤ ਸ੍ਰੋਮਣੀ ਕਮੇਟੀ ਮੁਲਾਜਮ ਆਪਸ ਵਿੱਚ ਹੀ ਉਲਝ ਕੇ ਫੱਟੜ ਹੋਏ ਹਨ ਤੇ ਹੁਣ ਨਾਮ ਉਹਨਾਂ ਦਾ ਲਗਾਇਆ ਜਾ ਰਿਹਾ ਹੈ। ਉਹਨਾਂ ਕਿਹਾ ਕਿ ਉਹ ਇੱਕ ਅੰਮ੍ਰਿਤਧਾਰੀ ਸਿੰਘ ਹਨ ਤੇ ਉਹਨਾਂ ਦਾ ਗਾਤਰਾ ਵੀ ਇਹਨਾਂ ਗੁੰਡਿਆ ਨੇ ਤੋਂੜ ਦਿੱਤਾ ਤੇ ਦਸਤਾਰ ਵੀ ਖਿਲਾਰ ਦਿੱਤੀ। ਉਹਨਾਂ ਕਿਹਾ ਕਿ ਉਹਨਾਂ ਭਰਾ ਤੇ ਬੇਟਿਆ ਤੇ ਵੀ ਇਹਨਾਂ ਨੇ ਜਾਨ ਲੇਵਾ ਹਮਲਾ ਕਰਕੇ ਉਹਨਾਂ ਨੂੰ ਵੀ ਫੱਟੜ ਕਰ ਦਿੱਤਾ। ਉਹਨਾਂ ਕਿਹਾ ਕਿ ਉਹ ਸ੍ਰੀ ਅਕਾਲ ਤਖਤ ਸਾਹਿਬ ਦੇ ਜਥੇਦਾਰ ਗਿਆਨੀ ਗੁਰਬਚਨ ਸਿੰਘ ਤੋਂ ਮੰਗ ਕਰਦੇ ਹਨ ਕਿ ਉਹਨ ਦੀ ਦਸਤਾਰ ਲਾਹੁਣ ਵਾਲਿਆ ਦੇ ਖਿਲਾਫ ਮਰਿਆਦਾ ਅਨੁਸਾਰ ਕਰਕੇ ਸਜਾਵਾਂ ਦਿੱਤੀਆ ਜਾਣ। ਇਸ ਸਬੰਧੀ ਜਦੋ ਥਾਣਾ ਸੀ ਡਵੀਜ਼ਨ ਦੇ ਮੁੱਖੀ ਸੁਰਿੰਦਰ ਸਿੰਘ ਨਾਲ ਗੱਲਬਾਤ ਕੀਤੀ ਤਾਂ ਉਹਨਾਂ ਕਿਹਾ ਕਿ ਮਾਮਲੇ ਦੀ ਤਫਤੀਸ਼ ਜਾਰੀ ਹੈ ਤੇ ਝਗੜੇ ਲਈ ਦੋਸ਼ੀ ਪਾਏ ਜਾਣ ਵਾਲੇ ਵਿਅਕਤੀਆ ਦੇ ਖਿਲਾਫ ਕਨੂੰਨੀ ਕਾਰਵਾਈ ਕੀਤੀ ਜਾਵੇਗੀ।

ਉਹਨਾਂ ਕਿਹਾ ਕਿ ਇਸ ਵਿੱਚ ਕੋਈ ਸ਼ੱਕ ਨਹੀ ਕਿ ਦੁਕਾਨਾਂ ਸ਼੍ਰੋਮਣੀ ਕਮੇਟੀ ਦੀਆ ਹਨ ਪਰ ਵਿਰੋਧੀ ਧਿਰ ਮੌਕੇ ਤੋਂ ਕੋਈ ਵੀ ਸਟੇਅ ਦੀ ਕਾਪੀ ਨਹੀ ਵਿਖਾ ਸਕੀ। ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਦੇ ਦਫਤਰ ਸਕੱਤਰ ਸ੍ਰ ਹਰਬੀਰ ਸਿੰਘ ਸੰਧੂ ਤੇ ਸ਼੍ਰੋਮਣੀ ਅਕਾਲੀ ਦਲ (ਪੰਚ ਪ੍ਰਧਾਨੀ) ਦੇ ਮੀਤ ਪ੍ਰਧਾਨ ਸ੍ਰ ਬਲਦੇਵ ਸਿੰਘ ਸਿਰਸਾ ਨੇ ਘਟਨਾ ਦੀ ਕਰੜੇ ਸ਼ਬਦਾਂ ਵਿੱਚ ਨਿਖੇਧੀ ਕਰਦਿਆ ਕਿਹਾ ਕਿ ਬੁਰਛਾਗਰਦੀ ਕਰਨ ਵਾਲੇ ਮੁਲਾਜਮਾਂ ਦੇ ਖਿਲਾਫ ਕੜੀ ਕਾਰਵਾਈ ਕੀਤੀ ਜਾਣੀ ਚਾਹੀਦੀ ਹੈ। ਉਹਨਾਂ ਕਿਹਾ ਕਿ ਸ੍ਰੀ ਗੁਰੂ ਰਾਮਦਾਸ ਜੀ ਨੇ ਚੱਕ ਗੁਰੂ ਰਾਮਦਾਸ ਨੂੰ ਵਸਾਉਣ ਲਈ ਬਾਹਰੋ ਲੋਕਾਂ ਨੂੰ ਲਿਆ ਕੇ ਅੰਮ੍ਰਿਤਸਰ ਵਸਾਇਆ ਸੀ ਤੇ ਉਹਨਾਂ ਨੂੰ ਜ਼ਮੀਨਾ ਵੀ ਖੁਦ ਖਰੀਦ ਕੇ ਦਿੱਤੀਆ ਸਨ ਪਰ ਮੌਜੂਦਾ ਮੱਕੜ ਮਸੰਦ ਵੱਲੋ ਆਰ.ਐਸ.ਐਸ ਨੂੰ ਖੁਸ਼ ਕਰਨ ਲਈ ਜਿਹੜੇ ਸਿੱਖਾਂ ਤੇ ਹਮਲੇ ਕਰਕੇ ਕਤਲ ਕੀਤਾ ਜਾ ਰਿਹਾ ਹੈ ਉਸ ਲਈ ਮੱਕੜ ਵਿੱਚ ਮਹੰਤ ਨਰੈਣੂ ਦੀ ਰੂਹ ਆ ਗਈ ਪ੍ਰਤੀਤ ਹੁੰਦੀ ਹੈ।

ਉਹਨਾਂ ਕਿਹਾ ਕਿ ਜਿਹੜੇ ਸ਼੍ਰੋਮਣੀ ਕਮੇਟੀ ਅਧਿਕਾਰੀ ਦਲਜੀਤ ਸਿੰਘ ਬੇਦੀ ਨੇ ਇਸ ਇੱਕ ਹੋਰ ਭਰਾ ਮਾਰੂ ਸਾਕੇ ਨੂੰ ਅੰਜ਼ਾਮ ਦਿੱਤਾ ਹੈ ਉਸ ਨੂੰ ਬਿਨਾਂ ਕਿਸੇ ਦੇਰੀ ਤੋਂ ਸ਼੍ਰੋਮਣੀ ਕਮੇਟੀ ਵਿੱਚੋ ਬਰਖਾਸਤ ਕੀਤਾ ਜਾਵੇ। ਉਹਨਾਂ ਕਿਹਾ ਕਿ ਇਸੇ ਅਧਿਕਾਰੀ ਦੀਆ ਅਖਬਾਰਾਂ ਵਿੱਚ ਅਸ਼ਲੀਲ ਤਸਵੀਰਾਂ ਛੱਪਣ ਨਾਲ ਜਿਹੜੀ ਸਿੱਖ ਪੰਥ ਦੀ ਬਦਨਾਮੀ ਹੋਈ ਸੀ ਉਸ ਲਈ ਮੱਕੜ ਸਿੱਧ ਤੇ ਅਸਿੱਧੇ ਰੂਪ ਵਿੱਚ ਜਿੰਮੇਵਾਰ ਹੈ। ਉਹਨਾਂ ਕਿਹਾ ਕਿ ਇਸ ਘਟਨਾ ਦੇ ਦੋਸ਼ੀਆ ਦੇ ਖਿਲਾਫ ਤੁਰੰਤ ਕਾਰਵਾਈ ਕੀਤੀ ਜਾਵੇ ਅਤੇ ਸ੍ਰ ਸਤਬੀਰ ਸਿੰਘ ਬਜਾਜ ਅੰਮ੍ਰਿਤਧਾਰੀ ਸਿੰਘ ਦੀ ਦਸਤਾਰ ਪੈਰ ਹੇਠ ਰੋਲਣ ਵਾਲਿਆ ਦੇ ਖਿਲਾਫ ਧਾਰਾ 295 ਏ ਦਾ ਮੁਕੱਦਮਾ ਦਰਜ ਕਰਕੇ ਜੇਲ ਯਾਤਰਾ 'ਤੇ ਭੇਜਿਆ ਜਾਵੇ। ਸ੍ਰ ਹਰਬੀਰ ਸਿੰਘ ਸੰਧੂ ਨੇ ਕਿਹਾ ਕਿ ਸਤਬੀਰ ਸਿੰਘ ਬਜਾਜ ਤੇ ਗੰਭੀਰ ਕਿਰਪਾਨ ਦੀ ਫੱਟ ਵੀ ਵੱਜਾ ਤੇ ਉਹ ਹਸਪਤਾਲ ਸਿੰਘ ਜ਼ੇਰੇ ਇਲਾਜ ਹੈ।