ਗੁਰਦੁਆਰਿਆਂ ਦਾ ਵਧੀਆ ਢੰਗ ਨਾਲ ਪ੍ਰਬੰਧ ਚਲਾਉਣਾ ਅਤੇ ਸਿੱਖ ਧਰਮ
ਦਾ ਵੱਧ ਚੜ੍ਹ ਕੇ ਪ੍ਰਚਾਰ ਕਰਨਾ ਹੈ। ਸ਼੍ਰੋਮਣੀ ਕਮੇਟੀ ਨੇ ਆਪਣੇ ਸ਼ੁਰੂ ਦੇ ਸਮੇਂ ਵਿੱਚ
ਜਦ ਗੁਰਦੁਆਰਿਆਂ ਨੂੰ ਮਹੰਤਾਂ ਤੋਂ ਬੜੀਆਂ ਕੁਰਬਾਨੀਆਂ ਦੇਣ ਤੋਂ ਬਾਅਦ, ਜਦ ਆਜ਼ਾਦ
ਕਰਵਾਇਆ ਗਿਆ ਸੀ, ਤਾਂ ਕਮੇਟੀ ਨੇ ਵਧੀਆ ਢੰਗ ਨਾਲ ਗੁਰਦੁਆਰਿਆਂ ਦੀ ਸੇਵਾ ਸੰਭਾਲ ਸ਼ੁਰੂ
ਕੀਤੀ ਅਤੇ ਵਿਦਵਾਨਾਂ, ਇਤਿਹਾਸਕਾਰਾਂ ਵੱਲੋਂ ਸ਼ਨਾਖਤ ਦੇ ਆਧਾਰ ਉੱਤੇ ਨਵੇਂ ਗੁਰਦੁਆਰਿਆਂ
ਦੀਆਂ ਉਸਾਰੀਆਂ ਅਤੇ ਸ਼ਰਧਾਲੂਆਂ ਦੇ ਠਹਿਰਣ ਲਈ ਸਰਾਵਾਂ ਦਾ ਨਿਰਮਾਣ ਕਰਵਾਇਆ ਗਿਆ, ਜੋ
ਨਿਰੋਲ ਰੂਪ ਵਿੱਚ ਸਿੱਖ ਸੰਗਤਾਂ ਵੱਲੋਂ ਕਾਰ-ਸੇਵਾ ਦੇ ਰੂਪ ਵਿੱਚ ਨੇਪਰੇ ਚੜਾਇਆ ਗਿਆ।
ਪਰ ਸਮੇਂ ਦੀ ਚਾਲ ਦੇ ਚੱਲਦਿਆਂ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਸਿਆਸਤਦਾਨਾਂ ਦੇ
ਕਬਜ਼ੇ ਥੱਲੇ ਚਲੀ ਗਈ ਹੈ।
ਅੱਜ
ਸ਼੍ਰੋਮਣੀ ਕਮੇਟੀ ਉੱਪਰ ਸਿਆਸਤ ਇਸ ਕਦਰ ਹਾਵੀ ਹੋ ਚੁੱਕੀ ਹੈ, ਕਿ ਸ਼੍ਰੋਮਣੀ ਗੁਰਦੁਆਰਾ
ਪ੍ਰਬੰਧਕ ਕਮੇਟੀ ਵੱਲੋਂ ਜੋ ਵੀ ਸਿੱਖ ਧਰਮ ਬਾਰੇ ਫੈਸਲੇ ਲਏ ਜਾਂਦੇ ਹਨ, ਉਹ ਸਿਆਸੀ ਹਾਕਮਾਂ
ਦੇ ਫੁਰਮਾਨ ਹੀ ਹੁੰਦੇ ਹਨ। ਸ਼੍ਰੋਮਣੀ ਕਮੇਟੀ ਸਿਰਫ ਉਸ ਨੂੰ ਲਾਗੂ ਹੀ ਕਰਦੀ ਹੈ
ਸਿਆਸਤਦਾਨਾਂ ਨੇ ਸ਼੍ਰੋਮਣੀ ਕਮੇਟੀ ਦੇ ਕੰਮਾਂ ਵਿੱਚ ਦਖਲਅੰਦਾਜੀ ਕਰਕੇ ਉਸ ਵਿੱਚ ਇੱਥੋਂ
ਤੱਕ ਨਿਘਾਰ ਲੈ ਆਂਦਾ ਹੈ, ਕਿ ਉਹਨਾਂ ਨੇ ਗੁਰੁ ਘਰ ਦੇ ਲੰਗਰ ਦਾ ਵੀ ਸਿਆਸੀਕਰਨ ਕਰ ਕੇ
ਰੱਖ ਦਿੱਤਾ ਹੈ।
ਗੁਰਦੁਆਰਿਆਂ ਅਤੇ ਸਰਾਵਾਂ ਦਾ ਕੰਮ ਜੋ ਕਾਰ-ਸੇਵਾ ਰਾਹੀਂ
ਹੁੰਦਾ ਸੀ ਉਹ ਵੀ ਅੱਜ ਠੇਕੇਦਾਰੀ ਸਿਸਟਮ ਅਧੀਨ ਕਰ ਦਿੱਤਾ ਗਿਆ ਹੈ। ਸ਼੍ਰੋਮਣੀ
ਕਮੇਟੀ ਕਾਰ-ਸੇਵਾ ਵਾਲੇ ਸੰਤਾਂ, ਬਾਬਿਆਂ ਕੋਲੋਂ ਪੈਸੇ ਲੈ ਕੇ ਉਸਾਰੀਆਂ ਦਾ ਕੰਮ ਦੇਣ ਦੇ
ਇਲਜਾਮ ਪਿਛਲੇ ਲੰਮੇ ਸਮੇਂ ਤੋਂ ਲੱਗਦੇ ਆ ਰਹੇ ਹਨ। ਇਹ ਕਾਰ ਸੇਵਾ ਵਾਲੇ ਬਾਬੇ ਸਿੱਖ
ਸੰਗਤਾਂ ਤੋਂ ਲੰਮਾਂ ਸਮਾਂ ਉਗਰਾਹੀਆਂ ਕਰਕੇ ਗੁਰਦੁਆਰਿਆਂ ਦੀਆਂ ਇਮਾਰਤਾਂ ਜਾਂ ਸਰਾਵਾਂ
ਦੀਆਂ ਇਮਾਰਤਾਂ ਬਣਾ ਕੇ ਜਦ ਸ਼੍ਰੋਮਣੀ ਕਮੇਟੀ ਦੇ ਹਵਾਲੇ ਕਰ ਦਿੰਦੇ ਹਨ, ਤਾਂ ਇੱਥੋਂ ਹੀ
ਸਿਆਸਤ ਸ਼ੁਰੂ ਹੋ ਜਾਂਦੀ ਹੈ। ਇਹ ਸਰਾਵਾਂ ਸਾਰੀਆਂ ਸਿੱਖ ਸੰਗਤਾਂ ਦੇ ਤਨ, ਮਨ, ਧਨ ਦੇ
ਸਹਿਯੋਗ ਦੇ ਨਾਲ ਬਣੀਆਂ ਹੁੰਦੀਆਂ ਹਨ, ਤਾਂ ਜਦ ਕੋਈ ਸ਼ਰਧਾਲੂ
ਆਪਣੇ ਪਰਿਵਾਰ ਸਮੇਤ ਦੂਰੋਂ ਨੇੜਿਉ ਗੁਰੂ ਘਰ ਦੇ ਦਰਸ਼ਨਾਂ ਲਈ ਆਉਂਦੇ ਹਨ ਅਤੇ ਰਾਤ ਨੂੰ
ਠਹਿਰਣ ਲਈ ਸਰਾਵਾਂ ਵਿੱਚ ਕਮਰਾ ਪੁੱਛਦੇ ਹਨ, ਤਾਂ ਉਹਨਾਂ ਨੂੰ ਦੁਰਕਾਰ ਦੇ ਪਿਛਾਂਹ ਧੱਕ
ਦਿੱਤਾ ਜਾਂਦਾ ਹੈ। ਕਮਰਿਆਂ ਨੂੰ ਬਾਹਰੋਂ ਤਾਲੇ ਮਾਰ
ਕੇ ਕਮਰੇ ਖਾਲੀ ਨਾ ਹੋਣ ਦਾ ਸ਼ਰੇਆਮ ਝੂਠ ਮਾਰਿਆ ਜਾਂਦਾ ਹੈ ਅਤੇ ਉੱਥੇ ਬੈਠੇ ਸੇਵਾਦਾਰਾਂ
ਦਾ ਸ਼ਰਧਾਲੂਆਂ ਪ੍ਰਤੀ ਰਵੱਈਆ ਬਹੁਤ ਮਾੜਾ ਹੁੰਦਾ ਹੈ।
ਇਸ ਤੋਂ ਉਪਰੰਤ ਜਦ ਕੋਈ ਪਹੁੰਚ ਵਾਲਾ ਵਿਅਕਤੀ ਸ਼੍ਰੋਮਣੀ ਕਮੇਟੀ ਦੇ ਜਥੇਦਾਰਾਂ ਤੋਂ
ਟੈਲੀਫੋਨ ਕਰਵਾਉਂਦਾ ਹੈ, ਤਾਂ ਉਹਨਾਂ ਲਈ ਝੱਟ ਹੀ ਕਮਰੇ ਦੀ ਚਾਬੀ ਦੇ ਦਿੱਤੀ ਜਾਂਦੀ ਹੈ,
ਜਿਸਤੋਂ ਸਾਬਿਤ ਹੁੰਦਾ ਹੈ ਕਿ ਇਹ ਜੋ ਸਰਾਵਾਂ ਆਮ ਸੰਗਤਾਂ ਦੇ ਖੂਨ ਪਸੀਨੇ ਦੀ ਕੀਤੀ
ਕਮਾਈ ਵਿੱਚੋਂ ਗੁਰੁ ਘਰ ਵਿੱਚ ਦਿੱਤੇ ਹੋਏ ਦਸਵੰਦ ਦੇ ਰੂਪ ਵਿੱਚ ਜੋ ਮਾਇਆ ਇਕੱਤਰ ਹੁੰਦੀ
ਹੈ, ਉਸ ਇਕੱਤਰ ਹੋਈ ਮਾਇਆ ਨਾਲ ਬਣੀਆਂ ਹੋਈਆਂ ਸਰਾਵਾਂ ਨੇ ਸ਼੍ਰੋਮਣੀ ਕਮੇਟੀ ਦੇ ਮੈਂਬਰਾਂ,
ਅਧਿਕਾਰੀਆਂ ਨੇ ਆਪਣੀ ਨਿੱਜੀ ਜਾਇਦਾਦ ਬਣਾ ਕੇ ਰੱਖ ਦਿੱਤਾ ਹੈ ਕਿਉਂਕਿ ਇਹਨਾਂ ਮੈਬਰਾਂ,
ਅਧਿਕਾਰੀਆਂ ਦੀ ਸ਼ਿਫਾਰਿਸ਼ ਤੋਂ ਬਿਨਾਂ ਕੋਈ ਆਮ ਵਿਅਕਤੀ ਕਮਰਾ ਲੈਣ ਲਈ ਸੋਚ ਨਹੀਂ ਸਕਦਾ।
ਮੌਜੂਦਾ ਸਮੇਂ ਚੱਲਦੇ ਇਹਨਾਂ ਦੇ ਵਤੀਰੇ ਨਾਲ ਦਰਬਾਰ ਸਾਹਿਬ ਆਉਣ ਵਾਲੀ ਸੰਗਤ ਦੀ ਜਿੱਥੇ
ਖੱਜਲ-ਖਰਾਬੀ ਹੁੰਦੀ ਹੈ ਨਾਲ ਹੀ ਲੋਕਾਂ ਦੀ ਗੁਰੁ ਘਰ ਵਿੱਚ ਸ਼ਰਧਾ, ਭਾਵਨਾ ਵਿੱਚ ਵੀ ਫਰਕ
ਪੈਦਾ ਦਿਖਾਈ ਦਿੰਦਾ ਹੈ। ਹੁਣ ਚਾਹੀਦਾ ਤਾਂ ਇਹ ਹੈ ਕਿ ਜਿਵੇਂ ਹਰ ਖੇਤਰ ਵਿੱਚ ਨਵੀਂ
ਤਕਨੀਕ ਨਾਲ ਕੰਪਿਊਟਰੀਕਰਨ ਹੋ ਚੁੱਕਾ ਹੈ ਤਾਂ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ
ਸਰਾਵਾਂ ਵਿੱਚ ਕਮਰਿਆਂ ਦੇਣ ਦੀ ਪ੍ਰਕਿਰਿਆ ਵਿੱਚ ਪਾਰਦਰਸ਼ਤਾ ਲਿਆਉਣ ਕਮਰਿਆਂ ਦੀ ਆਨ-ਲਾਈਨ
ਬੁਕਿੰਗ ਸ਼ੁਰੂ ਕਰ ਦੇਵੇ ਤਾਂ ਜੋ ਹਰ ਸ਼ਰਧਾਲੂ ਨੂੰ ਕਮਰੇ ਲੈਣ ਲਈ ਆਸਾਨੀ ਹੋ ਸਕੇ ਤਾਂ ਜੋ
ਲੋਕਾਂ ਵਿੱਚ ਗੁਰੂ ਘਰ ਪ੍ਰਤੀ ਸ਼ਰਧਾ ਭਾਵਨਾ ਵੱਧ ਸਕੇ।