ਲੋਕਨ ਕੀਆ ਵਡਿਆਈਆ ਬੈਸੰਤਰਿ ਪਾਗਉ॥ (ਬਿਲਾਵਲ
ਮਹਲਾ 5)
ਮੈਂ
ਵਿਸਾਖੀ ‘ਤੇ ਆਪਣੇ ਰਿਸ਼ਤੇਦਾਰਾਂ ਨੂੰ ਓਮਾਨ ਫੋਨ ਕੀਤਾ ਤੇ ਵਿਸਾਖੀ ਦੀਆਂ ਵਧਾਈਆਂ
ਦਿੱਤੀਆਂ ਤੇ ਪੁੱਛਿਆ ਕਿ ਉਹਨਾਂ ਵਿਸਾਖੀ ਕਿਵੇਂ ਮਨਾਈ? ਉਹਨੀਂ ਦੱਸਿਆ ਕਿ ਭਾਵੇਂ ਵਿਸਾਖੀ
ਵਾਲ਼ੇ ਦਿਨ ਸਵੇਰੇ ਸ਼ਾਮ ਗੁਰਦੁਆਰਾ ਸਾਹਿਬ ਵਿਚ ਰੌਣਕਾਂ ਲੱਗੀਆਂ ਰਹੀਆਂ ਪਰ ਕਿਉਂਕਿ ਅਰਬ
ਦੇਸ਼ਾਂ ‘ਚ ਛੁੱਟੀ ਸ਼ੁੱਕਰਵਾਰ ਦੀ ਹੁੰਦੀ ਹੈ, ਸੋ ਬੁੱਧਵਾਰ ਨੂੰ ਸ੍ਰੀ ਅਖੰਡ ਪਾਠ ਰੱਖ ਕੇ
ਸ਼ੁੱਕਰਵਾਰ ਨੂੰ ਭੋਗ ਪਾਏ ਜਾਣਗੇ ਤੇ ਸਾਰਾ ਦਿਨ ਦੀਵਾਨ ਸਜਣਗੇ।
ਦੁਬਈ ਵਿਚ ਬਣੇ ਆਲੀਸ਼ਾਨ ਗੁਰਦੁਆਰਾ ਸਾਹਿਬ ਦੀ ਗੱਲ ਚੱਲੀ ਤਾਂ ਉਹ
ਕਹਿਣ ਲਗੇ ਕਿ ਓਮਾਨ ਵਿਚ ਵੀ ਹਿੰਦੂ ਮੰਦਰ ਅਤੇ ਈਸਾਈ ਚਰਚ ਚਾਲੂ ਹੋ ਗਏ ਹਨ। ਜਦ ਮੈਂ
ਪੁੱਛਿਆ ਕਿ ਗੁਰਦੁਆਰਾ ਸਾਹਿਬ ਨਹੀਂ ਬਣੇ ਅਜੇ? ਤਾਂ ਉਹ ਭਾਵੁਕ ਹੋ ਕੇ ਕਹਿਣ ਲੱਗੇ, “ਕੀ
ਦੱਸੀਏ ਜੀ, ਸੁਲਤਾਨ ਵਲੋਂ ਆਫ਼ਰ ਆ ਚੁੱਕੀ ਹੈ, ਸਭ ਕਾਗਜ਼ ਪੱਤਰ ਵੀ ਤਿਆਰ ਹਨ, ਪਰ ਸਿੱਖਾਂ
ਦੀ ਆਪਸੀ ਖਹਿਬਾਜ਼ੀ ਨਹੀਂ ਕੰਮ ਪੂਰਾ ਹੋਣ ਦੇ ਰਹੀ। ਹਰੇਕ ‘ਚੌਧਰੀ’ ਹੀ ਚਾਹੁੰਦਾ ਹੈ ਕਿ
ਬੱਸ ਉਹਦੇ ਸਿਰ ‘ਤੇ ਹੀ ਇਸ ਗੱਲ ਦਾ ਸਿਹਰਾ ਬੱਝੇ ਕਿ ਉਸ ਨੇ ਗੁਰਦੁਆਰਾ ਬਣਾਇਆ ਹੈ, ਸੋ
ਇਸੇ ਕਰ ਕੇ ਗੱਲ ਲਟਕਦੀ ਜਾ ਰਹੀ ਹੈ”। ਮੈਂ ਕਿਹਾ ਇਹ ਬਿਮਾਰੀ ਤਾਂ ਹੁਣ ਸਾਡੇ
ਖ਼ੂਨ ‘ਚ ਰਚ ਗਈ ਲਗਦੀ ਹੈ। ਸਮੁੱਚੇ ਸੰਸਾਰ ਵਿਚ ਹੀ ਇਸ ਬਿਮਾਰੀ ਨੇ ਸਿੱਖਾਂ ਨੂੰ ਘੇਰ
ਲਿਆ ਹੈ। ਜਿੱਥੇ ਦੇਖੋ ਚੌਧਰ ਦੇ ਰੌਲ਼ੇ। ਚੌਧਰਾਂ ਖਾਤਰ ਸੰਗਤਾਂ ਦੀ ਮਾਇਆ ਕੋਰਟਾਂ ਵਿਚ
ਰੋਹੜੀ ਜਾ ਰਹੀ ਹੈ।
ਕਿੱਥੇ ਗਿਆ ਉਹ ਕਪੂਰ ਸਿੰਘ ਵਾਲ਼ਾ ਕਿਰਦਾਰ ਜਿਸ ਨੇ ਨਵਾਬੀ ਲੈਣੋਂ
ਨਾਂਹ ਕਰ ਦਿੱਤੀ ਸੀ?
ਉਹਨਾਂ ਨੇ ਇਕ ਹੋਰ ਗੱਲ ਹੈਰਾਨੀ ਵਾਲ਼ੀ ਦੱਸੀ ਕਿ ਉੱਥੋਂ ਦੇ
ਸੁਲਤਾਨ ਨੇ ਸੁਝਾਉ ਦਿੱਤਾ ਹੈ ਕਿ ਤਿੰਨ ਚਾਰ ਗੁਰਦੁਆਰਿਆਂ ਦੀ ਜਗ੍ਹਾ ਸਿੱਖ ਇਕੋ ਹੀ
ਆਲੀਸ਼ਾਨ ਗੁਰਦੁਆਰਾ ਬਣਾਉਣ। ਮੈਨੂੰ ਉਹਨਾਂ ਦੀ ਗੱਲ ਸੁਣ ਕੇ ਬੜੀ ਹੈਰਾਨੀ ਵੀ ਹੋਈ ਤੇ
ਖ਼ੁਸ਼ੀ ਵੀ ਹੋਈ ਕਿ ਜਿਸ ਫ਼ਲਸਫ਼ੇ ਦੀ ਗੁਰੂ ਸਾਹਿਬਾਂ ਨੇ ਵਰਤੋਂ ਕਰ ਕੇ ਸਿੱਖਾਂ ਨੂੰ ਇਕ
ਥਾਂ ਇਕੱਠੇ ਕੀਤਾ, ਉਹੀ ਗੱਲ ਅੱਜ ਅਰਬਾਂ ਦਾ ਇਕ ਸੁਲਤਾਨ ਸਿੱਖਾਂ ਨੂੰ ਕਹਿ ਰਿਹਾ ਹੈ।
ਕੀ ਸਿੱਖ ਇਸ ਰਮਜ਼ ਨੂੰ ਸਮਝਣਗੇ?
ਸਤਿਗੁਰ ਸੱਚੇ ਪਾਤਸ਼ਾਹ ਸਾਡੇ ‘ਚੋਂ ਇਹ ਫੋਕੀਆਂ ਆਕੜਾਂ ਦੂਰ ਕਰੇ
ਤੇ ਸਿੱਖੀ ਦੇ ਸੁਨਹਿਰੀ ਮਾਰਗ ‘ਤੇ ਚੱਲਣ ਦਾ ਬਲ ਬਖ਼ਸ਼ੇ। ਅਰਦਾਸ ਹੈ।