ਆ ਗਈਆਂ ਚੋਣਾਂ ਛਾਲ਼ੋ-ਛਾਲ਼ੀ,
ਤੂੰ ਵੀ ਖਾਹ ਕੋਈ ਦੜੀ ਦਲਾਲੀ।
ਏਵੇਂ ਤਾਂ ਫਿਰ ਕੰਮ ਨਹੀਂ ਚੱਲਣਾ,
ਬਈ ਖਾਤਾ ਤੇਰਾ ਖ਼ਾਲਮ-ਖ਼ਾਲੀ।

ਐਵੇਂ ਨਹੀਂ ਤੈਨੂੰ ਮਿਲਣੀਆਂ ਵੋਟਾਂ,
ਰੱਖੀਂ ਸਭ ਮਾਇਆ ‘ਤੇ ਓਟਾਂ।
ਦਾਰੂ, ਭੁੱਕੀ ਅਤੇ ਨੋਟ ਕੜਕਵੇਂ,
ਵੰਡਣੀਂ ਪੈਣੀ ਤੈਨੂੰ ਨਾਗਣ ਕਾਲ਼ੀ।
ਆ ਗਈਆਂ ਚੋਣਾਂ ਛਾਲੋ-ਛਾਲੀ,
ਤੂੰ ਵੀ ਖਾਹ ਕੋਈ ਦੜੀ ਦਲਾਲੀ।
ਏਵੇਂ ਤਾਂ ਫਿਰ ਕੰਮ ਨਹੀਂ ਚੱਲਣਾ,
ਬਈ ਖਾਤਾ……………….

ਛੇਤੀ ਕਰ ਕੋਈ ਘਪਲਾ ਕਰ ਲੈ,
ਡੰਗਰਾਂ ਦਾ ਭਾਵੇਂ ਚਾਰਾ ਚਰ ਲੈ।
ਤੇਰੀ ਹਰ ਪਾਸੇ ਤਸਵੀਰ ਛਪੂਗੀ,
ਬਣ ਜਾਊ ਤੇਰੀ ਸ਼ਾਨ ਨਿਰਾਲੀ।
ਆ ਗਈਆਂ ਚੋਣਾਂ ਛਾਲੋ-ਛਾਲੀ,
ਤੂੰ ਵੀ ਖਾਹ ਕੋਈ ਦੜੀ ਦਲਾਲੀ।
ਏਵੇਂ ਤਾਂ ਫਿਰ ਕੰਮ ਨਹੀਂ ਚੱਲਣਾ,
ਖਾਤਾ ਤੇਰਾ………………..

ਕਿਧਰੇ ਘਾਲਾ- ਮਾਲਾ ਕਰ ਲੈ,
ਜਾਂ ਫਿਰ ਖਾਦ ਘੁਟਾਲ਼ਾ ਕਰ ਲੈ।
ਜਾਂ ਬਾਰਡਰ ‘ਤੇ ਛੇੜ ਲੜਾਈ,
ਕੱਫ਼ਨਾਂ ‘ਚੋਂ ਫਿਰ ਪੈਸੇ ਖਾ ‘ਲੀਂ।
ਆ ਗਈਆਂ ਚੋਣਾਂ ਛਾਲੋ-ਛਾਲੀ,
ਤੂੰ ਵੀ ਖਾਹ ਕੋਈ ਦੜੀ ਦਲਾਲੀ।
ਏਵੇਂ ਤਾਂ ਫਿਰ ਕੰਮ ਨਹੀਂ ਚੱਲਣਾ,
ਬਈ ਖਾਤਾ.......................

 

ਨਹੀਂ ਤਾਂ ਫਿਰ ਕੋਈ ਭਰਤੀ ਖੋਲ੍ਹ,
ਨਾਲ ਮਾਇਆ ਦੇ ਭਰ ਲੈ ਝੋਲ।
ਕਰੀਂ ਯਕੀਨ ਨਾ ਹੋਰ ਕਿਸੇ ‘ਤੇ,
ਗਿਣੂਗੀ ਨੋਟ ਤੇਰੇ ਘਰ-ਵਾਲ਼ੀ।
ਆ ਗਈਆਂ ਚੋਣਾਂ ਛਾਲੋ-ਛਾਲੀ,
ਤੂੰ ਵੀ ਖਾਹ ਕੋਈ ਦੜੀ ਦਲਾਲੀ।
ਏਵੇਂ ਤਾਂ ਫਿਰ ਕੰਮ ਨਹੀਂ ਚੱਲਣਾ,
ਖਾਤਾ ਤੇਰਾ……………….

ਜਾਂ ਫਿਰ ਸੜਾ ਸਪੈਕਟਰਮ ਖੋਲ੍ਹ,
ਨਾਲ਼ ਝਾੜੂ ਫਿਰ ਮਾਇਆ ਰੋਲ਼।
ਰੰਗ-ਢੰਗ ਸਿੱਖ ਲੈ ਰਾਜੇ ਕੋਲੋਂ,
ਜੇਬ ਰਹੂ ਨਾ ਕਦੇ ਵੀ ਖ਼ਾਲੀ।
ਆ ਗਈਆਂ ਚੋਣਾਂ ਛਾਲ਼ੋ-ਛਾਲ਼ੀ,
ਤੂੰ ਵੀ ਖਾਹ ਕੋਈ ਦੜੀ ਦਲਾਲੀ
ਏਵੇਂ ਤਾਂ ਫਿਰ ਕੰਮ ਨਹੀਂ ਚੱਲਣਾ,
ਖਾਤਾ ਤੇਰਾ………………. .।

ਜੇ ਤੈਨੂੰ ਇਹ ਢੰਗ ਨਹੀਂ ਆਉਂਦਾ,
ਐਵੇਂ ਕਾਹਨੂੰ ਏਂ ਸ਼ਰਮਾਉਂਦਾ।
ਰੋਲ ਮਾਡਲ ਹੈ ਪਾਸ ਅਸਾਡੇ,
ਤੂੰ ਗੁਰੂ ਧਾਰ ਲੈ ਲਾਲੂ ਲਾਲੀ।
ਆ ਗਈਆਂ ਚੋਣਾਂ ਛਾਲੋ-ਛਾਲੀ,
ਤੂੰ ਵੀ ਖਾਹ ਕੋਈ ਦੜੀ ਦਲਾਲੀ।
ਏਵੇਂ ਤਾਂ ਫਿਰ ਕੰਮ ਨਹੀਂ ਚੱਲਣਾ,
ਖਾਤਾ ਤੇਰਾ………………..