* ਅਸਲ ਨਾਨਕਸ਼ਾਹੀ ਕੈਲੰਡਰ ਇਕ ਦਿਨ ਲਾਗੂ ਹੋਵੇਗਾ, ਭਾਵੇਂ ਅੱਜ ਤੇ
ਭਾਵੇਂ 10 ਸਾਲਾਂ ਨੂੰ
ਅੰਮ੍ਰਿਤਸਰ
– ਨਾਨਕਸ਼ਾਹੀ ਕੈਲੰਡਰ ਦੇ ਨਿਰਮਾਤਾ ਪਾਲ ਸਿੰਘ ਪੁਰੇਵਾਲ ਨੇ ਕਿਹਾ ਕਿ ਨਾਨਕਸ਼ਾਹੀ ਕੈਲੰਡਰ
ਦੀ ਵਿਰੋਧਤਾ ਰਾਜਨੀਤਿਕਾਂ, ਸੰਤ ਸਮਾਜ , ਭਾਰਤੀ ਜਨਤਾ ਪਾਰਟੀ ਤੇ ਸਿੱਖ ਵਿਰੋਧੀ ਤਾਕਤਾਂ
ਨੇ ਇਸ ਲਈ ਕੀਤੀ, ਕਿਉਂਕਿ ਇਨ੍ਹਾਂ ਤਾਕਤਾਂ ਤੋਂ ਸਿੱਖਾਂ ਦੀ ਅਜ਼ਾਦ ਹਸਤੀ ਤੇ ਅੱਡਰੀ
ਹੋਂਦ ਬਰਦਾਸ਼ਤ ਨਹੀਂ ਹੋ ਰਹੀ, ਇਹ ਇਕ ਦਿਨ ਲਾਗੂ ਹੋਵੇਗਾ, ਭਾਵੇਂ ਅੱਜ ਤੇ ਭਾਵੇਂ 10
ਸਾਲਾਂ ਨੂੰ। ਉਹ ਅਕਾਲ ਤਖਤ ਸਾਹਿਬ ਦੇ ਜਥੇਦਾਰ ਗਿਆਨੀ ਗੁਰਬਚਨ ਸਿੰਘ ਨੂੰ ਮਿਲਣ ਉਪਰੰਤ
ਪੱਤਰਕਾਰਾਂ ਨਾਲ ਗੱਲਬਾਤ ਕਰ ਰਹੇ ਸਨ। ਉਨ੍ਹਾਂ ਕਿਹਾ ਕਿ ਹੁਣ ਉਨ੍ਹਾਂ ਨੇ ਇਕ ਅਜਿਹਾ
ਸਾਫਟਵੇਅਰ ਤਿਆਰ ਕੀਤਾ ਹੈ, ਜੋ ਕੈਲੰਡਰ ਮਾਮਲੇ ਵਿਚ ਬੜੀ ਸਹਾਇਤਾ ਕਰ ਸਕਦਾ ਹੈ।
ਉਨ੍ਹਾਂ ਕਿਹਾ ਕਿ ਕੈਲੰਡਰ ਤਿਆਰ ਕਰਨ ਵਿਚ ਉਨ੍ਹਾਂ ਸਾਇੰਸ, ਭੁਗੋਲ,
ਖਗੋਲ, ਤਾਰਾ ਵਿਗਿਆਨ ਤੇ ਗੁਰਬਾਣੀ ਨੂੰ ਅਧਾਰ ਬਣਾਇਆ ਗਿਆ ਹੈ। ਮੂਲ ਨਾਨਕਸ਼ਾਹੀ ਕੈਲੰਡਰ
ਵਿਚ ਸਿੱਖ ਕੌਮ ਦੀ ਵਿਲੱਖਣਤਾ ਸ਼ਾਮਲ ਹੈ। ਉਨ੍ਹਾਂ ਨੇ ਸ੍ਰੀ ਅਕਾਲ ਤਖਤ ਸਾਹਿਬ ਵਲੋਂ
ਨਾਨਕਸ਼ਾਹੀ ਕੈਲੰਡਰ ਦੀ ਕੀਤੀ ਗਈ ਸੋਧ ਨੂੰ ਸਿਰੇ ਤੋਂ ਨਕਾਰਦਿਆਂ ਕਿਹਾ ਹੈ ਕਿ ਉਨ੍ਹਾਂ
ਨੇ ਤਾਂ ਅਗਲੇ 200 ਸਾਲਾਂ ਤਕ ਦਾ ਕੈਲੰਡਰ ਤਿਆਰ ਕਰ ਲਿਆ ਹੈ ਪਰ ਸੋਧ ਕਰਵਾਉਣ ਵਾਲਿਆਂ
ਕੋਲ ਕੋਈ ਵੀ ਤਰਕ ਨਹੀਂ ਹੈ ਤੇ ਸਿਰਫ ਇਕ ਹਾਉਮੇ ਹੈ। ਉਨ੍ਹਾਂ ਕਿਹਾ ਕਿ ਜਬਰੀ ਤਬਦੀਲੀ
ਨੂੰ ਸੋਧ ਕਹਿਣਾ ਬਿਲਕੁਲ ਗ਼ਲਤ ਹੈ। ਸੋਧ ਦੀ ਬਜਾਏ ਕੈਲੰਡਰ ਦੀ ਮੂਲ ਭਾਵਨਾ ਨਾਲ ਖਿਲਵਾੜ
ਕਹਿ ਲਿਆ ਜਾਵੇ ਤਾਂ ਅਤਿਕਥਨੀ ਨਹੀਂ।
ਉਨ੍ਹਾਂ ਕਿਹਾ ਕਿ ਸੋਧ ਦੇ ਨਾਂ ‘ਤੇ ਜਿਸ ਤਰ੍ਹਾਂ ਤਬਦੀਲੀਆਂ
ਕੀਤੀਆਂ ਗਈਆਂ ਹਨ, ਉਹ ਸਿੱਖਾਂ ਦੀ ਵੱਖਰੀ ਹੋਂਦ ਨੂੰ ਖਤਰਾ ਹੈ। ਉਨ੍ਹਾਂ ਮਿਸਾਲ ਦਿੰਦੇ
ਹੋਏ ਕਿਹਾ ਕਿ ਵਿਸਾਖੀ ਦਾ ਦਿਨ ਸਿੱਖਾਂ ਲਈ ਬੇਹੱਦ ਅਹਿਮ ਹੈ ਤੇ ਇਸ ਦਿਨ ਹੀ ਗੁਰੂ ਨਾਨਕ
ਦੇਵ ਜੀ ਨੇ ਅਵਤਾਰ ਧਾਰਿਆ ਸੀ ਤੇ ਉਸੇ ਦਿਨ ਦੀ ਅਹਿਮੀਅਤ ਨੂੰ ਧਿਆਨ ਵਿਚ ਰੱਖ ਕੇ ਗੁਰੂ
ਗੋਬਿੰਦ ਸਿੰਘ ਜੀ ਨੇ ਖਾਲਸਾ ਪੰਥ ਦੀ ਸਾਜਨਾ ਕੀਤੀ ਸੀ। ਇਸ ਤਰ੍ਹਾਂ ਹੀ ਬੰਦੀ ਛੋੜ ਪੁਰਬ
ਵੀ ਫਰਵਰੀ ਵਿਚ ਆਉਂਦਾ ਹੈ, ਪਰ ਉਸ ਸੋਧ ਨੂੰ ਪ੍ਰਵਾਨ ਕਰਨ ਦੀ ਬਜਾਏ
ਜਥੇਦਾਰਾਂ ਨੇ ਸਿਆਸਤਦਾਨਾਂ, ਸੰਤ ਸਮਾਜ ਤੇ ਭਾਜਪਾ ਦੇ ਇਸ਼ਾਰੇ
‘ਤੇ ਕੈਲੰਡਰ ਵਿਚ ਅਹਿਮ ਤਬਦੀਲੀਆਂ ਕਰਕੇ ਕੈਲੰਡਰ ਦੀ ਮੂਲ ਭਾਵਨਾ ਨੂੰ ਹੀ ਖਤਮ ਕਰ ਦਿੱਤਾ।