ਅੰਮ੍ਰਿਤਸਰ:
(27 ਦਸੰਬਰ, ਨਰਿੰਦਰ ਪਾਲ ਸਿੰਘ) : ਚੰਡੀਗੜ੍ਹ ਦੀ ਬੜੈਲ ਜੇਲ੍ਹ ਵਿਚੋਂ ਭਾਈ ਲਖਵਿੰਦਰ
ਸਿੰਘ ਅਤੇ ਭਾਈ ਸ਼ਮਸ਼ੇਰ ਸਿੰਘ ਦੀ ਪੈਰੋਲ ਤੇ ਰਿਹਾਈ ਦੀ ਖਬਰ ਮਿਲਣ ਬਾਅਦ ਭਾਈ ਗੁਰਬਖਸ਼
ਸਿੰਘ ਖਾਲਸਾ ਨੇ ਆਪਣੀ ੪੪ ਦਿਨਾਂ ਭੁੱਖ ਹੜਤਾਲ ਖਤਮ ਕਰ ਦਿੱਤੀ । ਅਦਾਲਤੀ ਸਜਾਵਾਂ
ਭੁਗਤਣ ਬਾਅਦ ਵੀ ਜੇਲ੍ਹਾਂ ਵਿਚ ਬੰਦ ਸਿੰਘਾਂ ਦੀ ਰਿਹਾਈ ਲਈ ੧੪ ਨਵੰਬਰ ਨੂੰ ਭੁੱਖ ਹੜਤਾਲ
ਤੇ ਬੈਠੇ ਭਾਈ ਗੁਰਬਖਸ ਸਿੰਘ ਨੇ ਅੱਜ ਦੇਰ ਸ਼ਾਮ ੮ ਵਜੇ ਦੇ ਕਰੀਬ ਸ੍ਰੀ ਅਕਾਲ ਤਖਤ ਸਾਹਿਬ
ਦੇ ਸਨਮੁਖ ਅਰਦਾਸ ਕਰਨ ਤੇ ਦੇਗ ਵਰਤਾਣ ਬਾਅਦ ਆਪਣੀ ਭੁਖ ਹੜਤਾਲ ਖਤਮ ਕਰ ਦਿੱਤੀ।
ਭਾਈ
ਸਾਹਿਬ ਦੀ ਭੁੱਖ ਹੜਤਾਲ ਖਤਮ ਕਰਾਉਣ ਲਈ ਸ੍ਰੀ ਅਕਾਲ ਤਖਤ ਸਾਹਿਬ ਦੇ ਜਥੇਦਾਰ ਗਿਆਨੀ
ਗੁਰਬਚਨ ਸਿੰਘ ਨੇ ਸ੍ਰੀ ਦਰਬਾਰ ਸਾਹਿਬ ਕੰਪਲੈਕਸ ਸਥਿਤ ਸ਼ਹੀਦੀ ਯਾਦਗਾਰ ਦੇ ਸਾਹਮਣੇ ਉਨ੍ਹਾਂ
ਨੂੰ ਜੂਸ ਦਾ ਗਿਲਾਸ ਪਿਲਾਇਆ । ਜੂਸ ਦਾ ਗਿਲਾਸ ਭਾਈ ਸਾਹਿਬ ਦੇ ਮੂੰਹ ਨੂੰ ਲਗਦੇ ਹੀ
ਹਾਜਰ ਸੰਗਤਾਂ ਨੇ ਜੈਕਾਰੇ ਗਜਾ ਦਿੱਤੇ।
ਪੱਤਰਕਾਰਾਂ ਨਾਲ ਗਲਬਾਤ ਕਰਦਿਆਂ ਭਾਈ ਗੁਰਬਖਸ ਸਿੰਘ ਖਾਲਸਾ ਨੇ
ਕਿਹਾ ਕਿ ਉਨ੍ਹਾ ਵਲੋਂ ਸਿੰਘਾਂ ਦੀ ਰਿਹਾਈ ਲਈ ਰੱਖੀ ਭੁਖ ਹੜਤਾਲ ਨੂੰ ਸਮੁਚੇ ਵਿਸ਼ਵ ਭਰ
ਦੀਆਂ ਸੰਗਤਾਂ ਦੇ ਸਹਿਯੋਗ ਨਾਲ ਸਫਲਤ ਮਿਲੀ ਹੈ ,ਚਾਰ ਸਿੰਘ ਪੈਰੋਲ ਤੇ ਰਿਹਾਅ ਹੋ ਗਏ ਹਨ
ਦੋ ਦੀ ਰਾਹਈ ਦੀ ਕਾਨੂੰਨੀ ਪ੍ਰਕਿਰਿਆ ਚਲ ਰਹੀ ਹੈ ,ਗਿਆਨੀ ਗੁਰਬਚਨ ਸਿੰਘ ਨੇ ਯਕੀਨ
ਦਿਵਾਇਆ ਹੈ ਕਿ ਇਹ ਰਿਹਾਈ ਵੀ ਜਲਦੀ ਹੋ ਜਾਵੇਗੀ ਇਸ ਲਈ ਉਹ ਭੁਖ ਹੜਤਾਲ ਖਤਮ ਕਰ ਰਹੇ ਹਨ
।
ਉਨ੍ਹਾ ਕਿਹਾ ਕਿ ਉਹ ਸਿੰਘਾਂ ਦੀ ਰਿਹਾਈ ਲਈ ਆਰੰਭੇ ਸੰਘਰਸ਼ ਵਿਚ
ਯੋਗਦਾਨ ਪਾਣ ਵਾਲੇ ਹਰ ਸਿੱਖ ਦੇ ਸ਼ੁਕਰਗੁਜਾਰ ਤੇ ਅਕਾਲ ਪੁਰਖ ਵਾਹਿਗੁਰੂ ਦੇ ਰੋਮ ਰੋਮ
ਤੋਂ ਧੰਨਵਾਦੀ ਹਨ । ਗਿਆਨੀ ਗੁਰਬਚਨ ਸਿੰਘ ਨੇ ਕਿਹਾ ਕਿ ਜੋ ਸਿੰਘ ਪੈਰੋਲ ਤੇ ਰਿਹਾਅ ਹੋਏ
ਹਨ, ਇਨ੍ਹਾ ਦੀ ਮੁਕੰਮਲ ਰਿਹਾਈ ਲਈ ਕਾਨੂੰਨੀ ਪ੍ਰਕਿਰਿਆ ਥੋੜੀ ਲੰਬੀ ਜਰੂਰ ਹੈ, ਲੇਕਿਨ
ਉਹ ਵਿਸ਼ਵਾਸ਼ ਨਾਲ ਕਹਿ ਸਕਦੇ ਹਨ ਕਿ ਭਾਈ ਸਾਹਿਬ ਦੇ ਆਰੰਭੇ ਸੰਘਰਸ਼ ਨੂੰ ਸਫਲਤਾ ਜਰੂਰ ਮਿਲੀ
ਹੈ।
ਇਸ ਮੌਕੇ ਸ੍ਰ ਕਰਨੈਲ ਸਿੰਘ ਪੀਰ ਮੁਹੰਮਦ, ਆਈ.ਐਸ.ਓ.ਦੇ ਜਿਲਲ੍ਹਾ
ਪ੍ਰਧਾਨ ਭਾਈ ਕੰਵਰਬੀਰ ਸਿੰਘ ਗਿੱਲ, ਜਗਮੋਹਨ ਸਿੰਘ ਸ਼ਾਂਤ, ਸ੍ਰ ਗੁਰਿੰਦਰ ਸਿੰਘ ,ਭਾਈ
ਸਾਹਿਬ ਦੇ ਸਪੁਤਰ ਜੁਝਾਰ ਸਿੰਘ ਸਮੇਤ ਵੱਡੀ ਗਿਣਤੀ ਵਿੱਚ ਸਿੱਕ ਸੰਗਤਾਂ ਮੌਜੂਦ ਸਨ ।
ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ ਤੋਂ ਮੇਜਰ ਸਿੰਘ ਦੀ ਰਿਪੋਰਟ ਮੁਤਾਬਕ ਭਾਈ ਲੱਖਵਿੰਦਰ ਸਿੰਘ
ਲੱਖਾ ਅਤੇ ਭਾਈ ਸ਼ਮਸ਼ੇਰ ਸਿੰਘ ਬੁੜੇਲ ਵਿਚ ਪੇਰੋਲ ਤੇ ਰਿਹਾਅ ਹੋ ਕੇ ਗੁਰਦੁਆਰਾ ਅੰਬ
ਸਾਹਿਬ ਪਹੁੰਚੇ ਅਤੇ ਗੁਰੂ ਗ੍ਰੰਥ ਸਾਹਿਬ ਜੀ ਅੱਗੇ ਅਰਦਾਸ ਕੀਤੀ।