ਅੰਮ੍ਰਿਤਸਰ:
(19 ਦਸੰਬਰ, ਨਰਿੰਦਰ ਪਾਲ ਸਿੰਘ): ਸ੍ਰੀ ਅਕਾਲ ਤਖਤ ਸਾਹਿਬ ਨੂੰ ਸਮਰਪਿਤ ਵੱਖ ਵੱਖ ਸਿੱਖ
ਜਥੇਬੰਦੀਆਂ ਨੇ ਸ੍ਰੀ ਅਕਾਲ ਤਖਤ ਸਾਹਿਬ ਦੇ ਜਥੇਦਾਰ ਗਿਆਨੀ ਗੁਰਬਚਨ ਸਿੰਘ ਨਾਲ ਮੁਲਾਕਾਤ
ਕਰਕੇ ਮੰਗ ਕੀਤੀ ਹੈ, ਕਿ ਪੰਥ ਪਰਵਾਨਿਤ ਸਿੱਖ ਰਹਿਤ ਮਰਿਆਦਾ ਵਿੱਚ ਕੋਈ ਵੀ ਤਬਦੀਲੀ ਨਾ
ਕੀਤੀ ਜਾਵੇ ਤੇ ਸਾਲ 2003 ਵਾਲਾ ਸੂਰਜੀ ਪ੍ਰਣਾਲੀ ਤੇ ਅਧਾਰਿਤ ਨਾਨਕਸ਼ਾਹੀ ਕੈਲੰਡਰ ਹੀ
ਲਾਗੂ ਕੀਤਾ ਜਾਵੇ।
ਗੁਰਮਤਿ ਗਿਆਨ ਮਿਸ਼ਨਰੀ
ਕਾਲਜ, ਲੁਧਿਆਣਾ, ਅਕਾਲ ਪੁਰਖ ਕੀ ਫੌਜ, ਸਿੱਖ ਮਿਸ਼ਨਰੀ ਕਾਲਜ ਲੁਧਿਆਣਾ, ਸੁਖਮਨੀ ਸਾਹਿਬ
ਸੇਵਾ ਸੁਸਾਇਟੀ, ਸ੍ਰੀ ਗੁਰੂ ਦਾਸ ਸੇਵਕ ਸਭਾ, ਤਖਤ ਸ੍ਰੀ ਦਮਦਮਾ ਸਾਹਿਬ ਦੇ ਸਾਬਕਾ
ਜਥੇਦਾਰ ਗਿਆਨੀ ਕੇਵਲ ਸਿੰਘ, ਗਿਆਨੀ ਜਗਤਾਰ ਸਿੰਘ ਜਾਚਕ, ਪ੍ਰਿ: ਹਰਜੀਤ ਸਿੰਘ ਸੰਪਾਦਕ
ਸਿੱਖ ਫੁਲਵਾੜੀ ਅਤੇ ਸ਼੍ਰੋਮਣੀ ਕਮੇਟੀ ਮੈਂਬਰ ਜਸਵਿੰਦਰ ਸਿੰਘ ਐਡਵੋਕੇਟ ਸਮੇਤ ਕੋਈ ਦੋ
ਦਰਜਨ ਦੇ ਕਰੀਬ ਪੰਥਕ ਸ਼ਖਸ਼ੀਅਤਾਂ ਨੇ ਗਿਆਨੀ ਗੁਰਬਚਨ ਸਿੰਘ ਨਾਲ ਮੁਲਾਕਾਤ ਕੀਤੀ।
ਸੰਸਥਾਵਾਂ ਤੇ ਮੁਖੀ ਸ਼ਖਸ਼ੀਅਤਾਂ ਨੇ ਗਿਆਨੀ
ਗੁਰਬਚਨ ਸਿੰਘ ਨੂੰ ਦੱਸਿਆ ਪੰਥ ਪ੍ਰਵਾਨਿਤ ਸਿੱਖ ਰਹਿਤ ਮਰਿਆਦਾ, ਕਈ ਸਾਲਾਂ ਦੀ ਅਣਥਕ
ਪੰਥਕ ਮਿਹਨਤ ਅਤੇ ਕਰੜੀ ਘਾਲਣਾ ਬਾਅਦ ਹੋਂਦ ਵਿਚ ਆਈ। ਜਥੇਦਾਰ ਨੂੰ ਦੱਸਿਆ ਗਿਆ ਕਿ ਇਹ
ਰਹਿਤ ਮਰਿਆਦਾ ਸਮੁਚੇ ਪੰਤ ਨੂੰ ਇਕ ਸੂਤਰ ਵਿਚ ਪ੍ਰੋਣ ਦਾ ਆਪਣੇ ਆਪ ਵਿਚ ਅਹਿਮ ਦਸਤਾਵੇਜ
ਹੈ। ਉਨ੍ਹਾਂ ਬੇਨਤੀ ਕੀਤੀ ਕਿ ਇਸ ਦਸਤਾਵੇਜ ਨੂੰ ਬਦਲਣ ਦਾ
ਅਧਿਕਾਰ ਸਿਰਫ ਤੇ ਸਿਰਫ ਸਮੁਚੇ ਪੰਥ ਵਿਚ ਹੈ, ਤੇ ਤੁਸੀਂ ਬਤੌਰ ਜਥੇਦਾਰ ਸ੍ਰੀ ਅਕਾਲ ਤਖਤ
ਸਾਹਿਬ ਇਸ ਰਹਿਤ ਮਰਿਆਦਾ ਦੇ ਪਹਿਰੇਦਾਰ ਵੀ ਹੋ, ਇਸ ਲਈ ਇਸ ਵਿਚ ਕਿਸੇ ਦੇ
ਵੀ ਕਹਿਣ ਤੇ ਕੋਈ ਤਬਦੀਲੀ ਨਾ ਕੀਤੀ ਜਾਵੇ। ਇਹ ਵੀ ਮੰਗ ਕੀਤੀ ਗਈ ਕਿ ਸਾਲ 2003 ਵਿਚ
ਲਾਗੂ ਹੋਏ, ਸੂਰਜੀ ਪ੍ਰਣਾਲੀ ਤੇ ਅਧਾਰਿਤ ਨਾਨਕਸ਼ਾਹੀ ਕੈਲੰਡਰ ਨੂੰ ਮੜ ਲਾਗੂ ਕੀਤਾ ਜਾਵੇ।
ਟਿੱਪਣੀ:
ਜਿਹੜੇ ਲੋਕ ਇੱਕਠੇ ਹੋ ਕੇ ਅਖੌਤੀ ਜਥੇਦਾਰ
ਕੋਲ ਫਰਿਆਦ ਲੈ ਕੇ ਗਏ ਸੀ ਅਤੇ ਕਹਿੰਦੇ ਨੇ ਕਿ "ਤੁਸੀਂ
ਬਤੌਰ ਜਥੇਦਾਰ ਸ੍ਰੀ ਅਕਾਲ ਤਖਤ ਸਾਹਿਬ ਇਸ ਰਹਿਤ ਮਰਿਆਦਾ ਦੇ ਪਹਿਰੇਦਾਰ ਵੀ ਹੋ"
ਕੀ ਇਹ ਦੱਸਣ ਦੀ ਖੇਚਲ ਕਰਣਗੇ ਕਿ ਕਿਹੜਾ ਐਸਾ ਕੰਮ ਇਸ
ਬਾਦਲ ਦੇ ਟੁਕੜਾਂ 'ਤੇ ਪੱਲਣ ਵਾਲੇ ਨੇ ਕੀਤੇ ਨੇ ਸਿੱਖ
ਰਹਿਤ ਮਰਿਆਦਾ ਦੀ ਪਹਿਰੀਦਾਰੀ ਦੇ?
ਕੋਈ ਵੀ ਕ੍ਰਾਂਤੀ, ਬਾਬਰ ਨਾਲ ਹੱਥ ਮਿਲਾ
ਕੇ ਨਹੀਂ, ਬਾਬਰ ਦੇ
ਖਿਲਾਫ ਹੋ ਕੇ, ਬਾਬਰ ਦੇ ਸਾਹਮਣੇ ਖਲੋ ਕੇ, ਜਾਬਰ ਕਹਿ
ਕੇ ਆਉਂਦੀ ਹੈ।
ਇਹ ਲੋਕ ਨੇ
ਜਿਹੜੇ ਸਟੇਜਾਂ 'ਤੇ ਇਸੀ ਜਥੇਦਾਰ ਖਿਲਾਫ ਬੋਲਦੇ ਨੇ, ਤੇ ਬਾਅਦ 'ਚ ਜਾ ਕੇ ਫਰਿਆਦਾਂ
ਵੀ ਇਸੀ ਕੋਲ ਕਰਦੇ ਨੇ,
ਕੈਸੀ ਵਿਡੰਬਨਾ ਹੈ... ਸਾਨੂੰ ਪਤਾ ਹੈ ਕਿ ਲੋਕਾਂ ਨੇ ਬੁਰਾ
ਮਨਾਉਣਾ ਹੈ, ਪਰ ਕੀ ਇਹ ਸੱਚ ਨਹੀਂ? ਜਿਸ ਅਖੌਤੀ ਜਥੇਦਾਰ ਨੇ ਮੂਲ ਨਾਨਕਸ਼ਾਹੀ
ਕੈਲੰਡਰ ਦਾ ਭੋਗ ਪਾਇਆ ਹੋਵੇ, ਸਿੱਖ
ਰਹਿਤ ਮਰਿਆਦਾ ਦੀਆਂ ਹਰ ਰੋਜ਼ ਧੱਜੀਆਂ ਉਹ ਆਪ ਉੜਾਉਂਦਾ
ਹੋਵੇ, ਉਸੇ ਕੋਲ ਜਾ ਕੇ ਫਰਿਆਦਾਂ, ਉਸੀ ਕੋਲ ਜਾਕੇ ਮੰਗਾਂ...
ਇਹ ਦੋਗਲੀ ਨੀਤੀ ਨਹੀਂ
ਤਾਂ ਹੋਰ ਕੀ ਹੈ?
ਕਿਰਪਾ ਕਰਕੇ,
ਇਹ ਲੋਕ ਇਸ ਦਾ ਜਵਾਬ ਦੇਣ। ਘੱਟੋ ਘੱਟ ਭਾਈ ਗੁਰਬਖਸ਼
ਸਿੰਘ ਕੋਲੋਂ ਹੀ ਕੁੱਝ ਸਿਖ ਲਵੋ, ਕਿ ਕਿਸ ਤਰ੍ਹਾਂ
ਆਪਣੇ ਕਹੇ 'ਤੇ ਦ੍ਰਿੜਤਾ ਨਾਲ ਖੜਨਾ ਹੈ...
ਜਿਸ ਤਰ੍ਹਾਂ ਡੇਰੇਵਾਦੀ ਸਾਧਾਂ ਤੋਂ ਬਚਣ ਦੀ ਲੋੜ ਹੈ, ਇਨ੍ਹਾਂ ਦੋਗਲੇ ਲੋਕਾਂ ਤੋਂ
ਬਚਣ ਦੀ ਵੀ ਉਤਨੀ ਹੀ ਲੋੜ ਹੈ।
ਭੁੱਲ ਚੁੱਕ ਦੀ ਖਿਮਾ...
ਸੰਪਾਦਕ ਖ਼ਾਲਸਾ ਨਿਊਜ਼