ਅੰਮਿ੍ਤਸਰ,
7 ਦਸੰਬਰ (ਹਰਪ੍ਰੀਤ ਸਿੰਘ ਗਿੱਲ)- ਦੇਸ਼ ਦੀਆਂ ਵੱਖ-ਵੱਖ ਜੇਲ੍ਹਾਂ 'ਚ ਬੰਦ ਆਪਣੀ ਸਜ਼ਾ
ਪੂਰੀ ਕਰ ਚੁੱਕੇ ਸਿੱਖ ਨੌਜਵਾਨਾਂ ਦੀ ਰਿਹਾਈ ਲਈ ਬੀਤੀ 14 ਨਵੰਬਰ ਤੋਂ ਅਜੀਤਗੜ੍ਹ ਦੇ
ਗੁਰਦੁਆਰਾ ਅੰਬ ਸਾਹਿਬ ਮੂਹਰੇ ਭੁੱਖ ਹੜਤਾਲ 'ਤੇ ਬੈਠੇ ਭਾਈ ਗੁਰਬਖਸ਼ ਸਿੰਘ ਨੂੰ ਬੀਤੇ
ਦਿਨ ਪੰਜਾਬ ਪੁਲਿਸ ਵੱਲੋਂ ਜ਼ਬਰੀ ਚੁੱਕ ਲੈਣ ਦੇ ਮਾਮਲੇ ਨੂੰ ਗਿਆਨੀ ਗੁਰਬਚਨ ਸਿੰਘ ਨੇ
ਗਲਤ ਤਰੀਕੇ ਕੀਤੀ ਗਈ ਜਾਇਜ਼ ਕਾਰਵਾਈ ਕਰਾਰ ਦਿੱਤਾ
ਹੈ।
ਉਨ੍ਹਾਂ ਕਿਹਾ ਕਿ ਪੁਲਿਸ ਦਾ ਵਤੀਰਾ ਜਾਇਜ਼ ਨਹੀਂ ਪਰ ਆਤਮਦਾਹ ਦੀ
ਕਗਾਰ 'ਤੇ ਪਹੁੰਚੇ ਇਨਸਾਨ ਨੂੰ ਬਚਾਉਣਾ ਸਰਕਾਰ ਦੀ ਜ਼ਿੰਮੇਵਾਰੀ
ਹੈ। ਗੁਰਬਚਨ ਸਿੰਘ ਨੇ
ਕਿਹਾ ਕਿ ਮਰਨ ਵਰਤ ਇਕ ਜਜ਼ਬਾਤੀ ਕਾਰਾ ਤਾਂ ਹੋ ਸਕਦਾ ਹੈ, ਪਰ ਸਿੱਖ ਸਿਧਾਂਤਾਂ ਅਤੇ
ਗੁਰਮਤਿ ਮੁਤਾਬਿਕ ਇਸ ਨੂੰ ਗਲਤ ਮੰਨਿਆ ਜਾਂਦਾ
ਹੈ।
ਭਾਈ ਗੁਰਬਖਸ਼ ਸਿੰਘ ਦੀਆਂ ਮੰਗਾਂ ਨੂੰ ਗੰਭੀਰ ਮਸਲਾ ਦੱਸਦਿਆਂ
ਸਿੰਘ ਸਾਹਿਬ ਨੇ ਕਿਹਾ ਕਿ ਉਨ੍ਹਾਂ ਆਪਣੇ ਤੌਰ 'ਤੇ ਹੀ ਭੁੱਖ ਹੜਤਾਲ ਰੱਖ ਲਈ ਜਦਕਿ ਪੰਥਕ
ਮੋਰਚਿਆਂ ਨੂੰ ਆਰੰਭਣ ਤੋਂ ਪਹਿਲਾਂ ਵਿਚਾਰ ਚਰਚਾ 'ਚ ਘੋਖ ਲੈਣਾ ਚਾਹੀਦਾ
ਹੈ। ਉਨ੍ਹਾਂ
ਕਿਹਾ ਕਿ ਭਾਈ ਸਾਹਿਬ ਵੱਲੋਂ ਜਿਨ੍ਹਾਂ 6 ਸਿੱਖ ਨੌਜਵਾਨਾਂ ਦੀ ਸਜ਼ਾ ਬਾਰੇ ਧਿਆਨ 'ਚ
ਲਿਆਂਦਾ ਹੈ, ਉਨ੍ਹਾਂ ਦੇ ਸਿਰਫ ਨਾਂਅ ਦਿੱਤੇ ਗਏ ਹਨ ਪਰ ਉਨ੍ਹਾਂ ਦੀ ਸਜ਼ਾ ਬਾਰੇ ਕੋਈ
ਵੇਰਵਾ ਨਹੀਂ ਦਿੱਤਾ ਗਿਆ।
ਸਿੱਖ ਨੌਜਵਾਨਾਂ ਦੀ ਰਿਹਾਈ ਸਬੰਧੀ ਉਹ ਲਗਾਤਾਰ ਸਰਕਾਰ ਤੇ
ਸ਼੍ਰੋਮਣੀ ਕਮੇਟੀ ਦੇ ਸੰਪਰਕ 'ਚ ਹਨ, ਜਿਨ੍ਹਾਂ ਰਾਹੀਂ ਵੱਖ-ਵੱਖ ਜੇਲ੍ਹਾਂ 'ਚ ਬੰਦ 75
ਸਾਲ ਤੋਂ ਵਧੇਰੇ ਉਮਰ ਦੇ ਬਜ਼ੁਰਗਾਂ, ਛੇ ਮਹੀਨੇ ਤੋਂ ਘੱਟ ਰਹਿੰਦੀ ਸਜ਼ਾ ਵਾਲੇ ਕੈਦੀਆਂ
ਸਬੰਧੀ ਸੂਚੀ ਇਕੱਤਰ ਕੀਤੀ ਜਾ ਰਹੀ
ਹੈ। ਸੂਬਾ ਸਰਕਾਰ ਨੂੰ ਪੰਜਾਬ ਤੋਂ ਬਾਹਰਲੀਆਂ
ਜ਼ੇਲ੍ਹਾਂ 'ਚ ਕੈਦ ਭੁਗਤ ਰਹੇ ਸਿੱਖ ਕੈਦੀਆਂ ਨੂੰ ਪੰਜਾਬ ਤਬਦੀਲ ਕਰਨ ਲਈ ਕਦਮ ਚੁੱਕਣ ਲਈ
ਵੀ ਕਿਹਾ ਗਿਆ ਹੈ।