ਅੰਮ੍ਰਿਤਸਰ
29 ਨਵੰਬਰ (ਜਸਬੀਰ ਸਿੰਘ) ਸ਼੍ਰੋਮਣੀ ਅਕਾਲੀ ਦਲ (ਪੰਚ ਪ੍ਰਧਾਨੀ) ਦੇ ਮੀਤ ਪ੍ਰਧਾਨ ਸ੍ਰ.
ਬਲਦੇਵ ਸਿੰਘ ਸਿਰਸਾ ਨੇ ਢੁੱਡੀਕੇ ਕਾਂਡ ਦੀ ਕਰੜੇ ਸ਼ਬਦਾਂ ਵਿੱਚ ਨਿਖੇਧੀ ਕਰਦਿਆਂ ਕਿਹਾ
ਕਿ ਜਥੇਦਾਰ ਅਕਾਲ ਤਖਤ ਗਿਆਨੀ ਗੁਰਬਚਨ ਸਿੰਘ ਨੇ ਅਧੂਰਾ ਬਿਆਨ ਦੇ ਕੇ, ਨਵੇਂ ਸ਼ੰਕੇ
ਪ੍ਰਗਟ ਕੀਤੇ ਹਨ, ਜਦ ਕਿ ਹਾਕਮ ਧਿਰ ਵੱਲੋ ਸਿਰਫ ਡੇਰਾ ਪ੍ਰੇਮੀਆਂ ਦੀਆਂ ਵੋਟਾਂ ਬਟੋਰਨ
ਲਈ ਹੀ ਉਹਨਾਂ ਨੂੰ ਨਾਮ ਚਰਚਾ ਦੀ ਆਗਿਆ ਦੇ ਕੇ, ਤਨਾਅ ਪੈਦਾ ਕੀਤਾ ਜਾ ਰਿਹਾ ਹੈ ਅਤੇ
ਅਕਾਲ ਤਖਤ ਦੇ ਹੁਕਮਾਂ ਦੀ ਪਾਲਣਾ ਕਰਦਿਆਂ ਨਾਮ ਚਰਚਾ ਦਾ ਵਿਰੋਧ ਕਰਨ ਵਾਲੇ ਸਿੱਖਾਂ ਦੇ
ਖਿਲਾਫ ਪਰਚੇ ਕੀਤੇ ਜਾ ਰਹੇ ਹਨ ਤੇ ਦੋਸ਼ੀ ਪ੍ਰੇਮੀਆਂ ਦੀ ਹਿਫਾਜਤ ਲਈ ਪੁਲੀਸ ਦੇ ਪਹਿਰੇ
ਲਗਾਏ ਜਾ ਰਹੇ ਹਨ, ਜਿਸ ਲਈ ਜਿਲਾ ਪ੍ਰਸ਼ਾਸ਼ਨ ਦੇ ਨਾਲ ਨਾਲ ਸਰਕਾਰ ਦੋਸ਼ੀ ਹੈ ਅਤੇ ਜਥੇਦਾਰ
ਨੂੰ ਚਾਹੀਦਾ ਹੈ ਕਿ ਉਹ ਪੰਜਾਬ ਦੇ ਮੁੱਖ ਮੰਤਰੀ ਸ੍ਰ. ਪ੍ਰਕਾਸ਼ ਸਿੰਘ ਬਾਦਲ ਤੇ ਗ੍ਰਹਿ
ਮੰਤਰੀ ਸ੍ਰ. ਸੁਖਬੀਰ ਸਿੰਘ ਬਾਦਲ ਨੂੰ ਤਲਬ ਕਰਕੇ ਮਰਿਆਦਾ ਅਨੁਸਾਰ ਕਾਰਵਾਈ ਕਰੇ।
ਜਾਰੀ ਇੱਕ ਬਿਆਨ ਰਾਹੀ ਸ੍ਰ. ਬਲਦੇਵ ਸਿੰਘ ਸਿਰਸਾ ਨੇ ਕਿਹਾ ਕਿ
ਹਾਕਮ ਧਿਰ ਦੀ ਸਿੱਖ ਵਿਰੋਧੀ ਨੀਤੀ ਹੋਣ ਕਾਰਨ ਡੇਰਾ ਪ੍ਰੇਮੀਆਂ ਦੇ ਹੌਸਲੇ ਇੰਨੇ ਬੁਲੰਦ
ਹੋ ਗਏ ਹਨ ਕਿ ਉਹ ਜਾਣ ਬੁੱਝ ਕੇ ਅਜਿਹੀਆ ਕਾਰਵਾਈਆ ਕਰ ਰਹੇ ਹਨ, ਜਿਸ ਨਾਲ ਰਾਜ ਦੇ
ਸ਼ਾਤਮਈ ਮਾਹੌਲ ਵਿੱਚ ਕਾਜੀ ਘੋਲੀ ਜਾ ਸਕੇ ।
ਉਹਨਾਂ ਕਿਹਾ ਕਿ ਮੁੱਖ ਮੰਤਰੀ ਸ੍ਰ. ਪ੍ਰਕਾਸ਼ ਸਿੰਘ ਬਾਦਲ ਨੂੰ ਇਹ
ਨਹੀਂ ਭੁੱਲਣਾ ਚਾਹੀਦਾ ਕਿ ਪੰਜਾਬ ਦਾ ਮਾਹੌਲ 1978 ਵਾਲਾ ਨਿਰੰਕਾਰੀ ਕਾਂਡ ਵਾਲਾ ਬਣਦਾ
ਜਾ ਰਿਹਾ ਹੈ ਤੇ ਉਸ ਤੋਂ ਬਾਅਦ ਨਿਰੰਕਾਰੀ ਤਾਂ ਗਾਇਬ ਹੋ ਗਏ ਸੀ, ਪਰ ਸ੍ਰ ਬਾਦਲ ਨੂੰ
ਮੁੜ ਮੁੱਖ ਮੰਤਰੀ ਬਣਨ ਲਈ 20 ਸਾਲ ਉਡੀਕ ਕਰਨੀ ਪਈ ਸੀ। ਉਹਨਾਂ ਕਿਹਾ ਕਿ ਪੰਜਾਬ ਦੇ
ਮਾਹੌਲ ਨੂੰ ਗੰਧਲਾ ਕਰਨ ਲਈ 1978 ਵਿੱਚ ਬਾਦਲ ਸਰਕਾਰ ਵੱਲੋਂ ਹੀ ਸੁੱਟੀ ਗਈ ਚੰਗਿਆੜੀ ਹੀ
ਸੀ, ਜਿਸ ਕਾਰਨ ਹੀ ਸਾਕਾ ਨੀਲਾ ਤਾਰਾ ਤੇ ਹੋਰ ਘਟਨਾਵਾ ਵਾਪਰੀਆ ਸਨ। ਉਹਨਾਂ ਕਿਹਾ ਕਿ
ਸਾਕਾ ਨੀਲਾ ਤਾਰਾ ਤੋਂ ਬਾਅਦ ਸ੍ਰ. ਬਾਦਲ ਵੱਲੋ ਵਲਾਇਤੀ ਰੇਡੀਓ ਬੀ.ਬੀ.ਸੀ ਤੇ ਸਿੱਖ
ਫੌਜੀਆਂ ਨੂੰ ਬੈਰਕਾਂ ਛੱਡ ਕੇ ਸ੍ਰੀ ਦਰਬਾਰ ਸਾਹਿਬ ਵੱਲ ਆਉਣ ਦੀ ਅਪੀਲ ਕੀਤੀ ਅਤੇ ਇਸ
ਅਪੀਲ ਸਦਕਾ ਹੀ ਸਿੱਖ ਫੌਜੀ ਬੈਰਕਾਂ ਛੱਡ ਕੇ ਸ੍ਰੀ ਦਰਬਾਰ ਸਾਹਿਬ ਵੱਲ ਵਧੇ, ਪਰ ਰਸਤੇ
ਵਿੱਚ ਹੀ ਬਹੁਤ ਸਾਰੇ ਫੌਜੀਆ ਨੂੰ ਮੁਕਾਬਲੇ ਬਣਾ ਮਾਰ ਦਿੱਤਾ ਗਿਆ ਜਾਂ ਫਿਰ ਗ੍ਰਿਫਤਾਰ
ਕਰਕੇ ਜੇਲਾਂ ਵਿੱਚ ਡੱਕ ਦਿੱਤਾ ਗਿਆ ਹੈ। ਉਹਨਾਂ ਕਿਹਾ ਕਿ ਅੱਜ ਤੱਕ ਉਸ ਤੋਂ ਬਾਅਦ ਚਾਰ
ਵਾਰ ਅਕਾਲੀ ਦਲ ਦੀ ਸਰਕਾਰ ਬਣ ਚੁੱਕੀ ਹੈ, ਪਰ ਇਹਨਾਂ ਫੌਜੀ ਪਰਿਵਾਰਾਂ ਦੀ ਸਾਰ ਕਿਸੇ ਵੀ
ਸਰਕਾਰ ਨੇ ਨਹੀਂ ਲਈ। ਉਹਨਾਂ ਕਿਹਾ ਕਿ ਢੁੱਡੀਕੇ ਵਿਖੇ ਸਿੱਖਾਂ ਨੇ ਜੋ ਕੁਝ ਵੀ ਕੀਤਾ
ਹੈ, ਸ੍ਰੀ ਅਕਾਲ ਤਖਤ ਸਾਹਿਬ ਦੇ ਆਦੇਸ਼ਾਂ ‘ਤੇ ਕੀਤਾ ਹੈ, ਇਸ ਲਈ ਪਰਚੇ ਸਿੱਖਾਂ ਦੇ
ਖਿਲਾਫ ਨਹੀਂ ਸਗੋ ਪ੍ਰੇਮੀਆ ਦੇ ਖਿਲਾਫ ਦਰਜ ਹੋਣੇ ਚਾਹੀਦੇ ਹਨ।
ਉਹਨਾਂ ਕਿਹਾ ਕਿ ਜਥੇਦਾਰ ਅਕਾਲ ਤਖਤ ਗਿਆਨੀ ਗੁਰਬਚਨ ਸਿੰਘ
ਪ੍ਰਸ਼ਾਸ਼ਨ ਨੂੰ ਦੋਸ਼ੀ ਠਹਿਰਾ ਕੇ ਬੁੱਤਾ ਨਹੀਂ ਸਾਰ ਸਕਦੇ, ਸਗੋਂ ਪਰੇਮੀਆ ਨੂੰ ਨਾਮ ਚਰਚਾ
ਦੀ ਆਗਿਆ ਦੇਣ ਲਈ ਸਰਕਾਰ ਦੋਸ਼ੀ ਹੈ। ਇਸ ਲਈ ਅਕਾਲੀ ਸਰਕਾਰ ਦੇ ਮੁੱਖ ਮੰਤਰੀ ਤੇ ਗ੍ਰਹਿ
ਮੰਤਰੀ ਨੂੰ ਬਿਨਾਂ ਕਿਸੇ ਦੇਰੀ ਤੋਂ ਸ੍ਰੀ ਅਕਾਲ ਤਖਤ ਤੇ ਬੁਲਾ ਕੇ ਤਾੜਨਾ ਕੀਤੀ ਜਾਵੇ
ਕਿ ਪੰਜਾਬ ਦੇ ਸ਼ਾਤਮਈ ਮਾਹੌਲ ਨੂੰ ਖਰਾਬ ਕਰਨ ਦੀ ਕੋਸ਼ਿਸ਼ ਕਰਨ ਵਾਲੇ ਸਿਰਸਾ ਸਾਧ ਦੇ
ਪ੍ਰੇਮੀਆਂ ਦੇ ਪੰਜਾਬ ਵਿੱਚ ਨਾਮ ਚਰਚਾ ਕਰਨ ਤੇ ਪੂਰਣ ਰੋਕ ਲਗਾਈ ਜਾਵੇ ਅਤੇ ਪੁਲੀਸ ਵੱਲੋਂ
ਦਰਜ ਕੀਤੇ ਗਏ ਸਿੱਖਾਂ ਦੇ ਖਿਲਾਫ ਪਰਚੇ ਰੱਦ ਕੀਤੇ ਜਾਣ। ਉਹਨਾਂ ਕਿਹਾ ਕਿ ਸ਼੍ਰੋਮਣੀ
ਕਮੇਟੀ ਪਰਧਾਨ ਅਵਤਾਰ ਸਿੰਘ ਮੱਕੜ ਵੀ ਸਪੱਸ਼ਟ ਕਰੇ ਕਿ ਉਹ ਸਰਕਾਰ ਤੇ ਪ੍ਰੇਮੀਆਂ ਨਾਲ ਹਨ,
ਜਾਂ ਫਿਰ ਸਿੱਖਾਂ ਦੇ ਨਾਲ ਹਨ, ਕਿਉਂਕਿ ਉਹਨਾਂ ਦੀ ਚੁੱਪ ਵੀ ਕਈ ਪ੍ਰਕਾਰ ਦੇ ਸ਼ੰਕੇ
ਪ੍ਰਗਟ ਕਰਦੀ ਹੈ।