ਸੈਨਹੋਜ਼ੇ
(ਤਰਲੋਚਨ ਸਿੰਘ ਦੁਪਾਲ ਪੁਰ):- ਅਸੀਂ ਸੰਨ 2003 ਵਿੱਚ ਲਾਗੂ ਹੋਏ ਮੂਲ ਨਾਨਕਸ਼ਾਹੀ
ਕੈਲੰਡਰ ਦੀ ਮਹੱਤਤਾ ਅਤੇ ਮੁੜ ਬਹਾਲੀ ਲਈ 26 ਅਕਤੂਬਰ ਨੂੰ ਸਿਆਟਲ ਵਿੱਚ ਕਰਵਾਏ ਜਾ ਰਹੇ
ਸੈਮੀਨਾਰ ਦੀ ਪੁਰਜ਼ੋਰ ਪ੍ਰੋੜ੍ਹਤਾ ਕਰਦੇ ਹਾਂ ਅਤੇ ਇਸ ਪੰਥਕ ਕਾਰਜ ਨੂੰ ਆਯੋਜਿਤ ਕਰਨ
ਵਾਲ਼ੀਆਂ ਵਰਲਡ ਸਿੱਖ ਫੈਡਰੇਸ਼ਨ ਅਤੇ ਉਸ ਦੀਆਂ ਅਮਰੀਕਾ ਕਨੈਡਾ ਸਥਿਤ ਸਹਿਯੋਗੀ ਜਥੇਬੰਦੀਆਂ
ਦੀ ਭਰਪੂਰ ਸ਼ਲਾਘਾ ਕਰਦੇ ਹਾਂ ਜੋ ਕਿ ਖਾਲਸਾ ਪੰਥ ਦੀ ਵਿਲੱਖਣ ਹਸਤੀ ਦੇ ਜਾਮਨ ਇਸ ਕੌਮੀ
ਮਸਲੇ ਦਾ ਪੰਥਕ ਜੁਗਤ ਅਨੁਸਾਰ ਵਿਦੇਸ਼ਾਂ ਵਿੱਚ ਪ੍ਰਚਾਰ ਪ੍ਰਸਾਰ ਕਰ ਰਹੀਆਂ ਹਨ।
ਅਖੰਡ ਕੀਰਤਨੀ ਜਥਾ ਯੂ.ਕੇ. ਦੇ ਲੈਟਰਪੈਡ ‘ਤੇ 21 ਅਕਤੂਬਰ ਨੂੰ
ਜਾਰੀ ਹੋਏ ਪ੍ਰਸੰਸਾ ਪੱਤਰ ਵਿੱਚ ਉਕਤ ਸ਼ਬਦਾਂ ਰਾਹੀਂ ਸਿਆਟਲ ਵਿੱਚ ਹੋ ਰਹੇ ਸੈਮੀਨਾਰ ਦਾ
ਸੁਆਗਤ ਕਰਦਿਆਂ ਇਹ ਵੀ ਦੱਸਿਆ ਗਿਆ ਹੈ ਕਿ ਯੂ.ਕੇ. ਅਤੇ ਯੂਰਪੀਅਨ ਦੇਸ਼ਾਂ ਵਿੱਚ ਸਥਿਤ
ਅਖੰਡ ਕੀਰਤਨੀ ਜਥੇ ਦੀਆਂ ਵੀਹ ਬਰਾਂਚਾਂ ਵੀ ਮੂਲ ਨਾਨਕਸ਼ਾਹੀ ਕੈਲੰਡਰ ਉੱਤੇ ਦ੍ਰਿੜ੍ਹਤਾ
ਨਾਲ਼ ਪਹਿਰਾ ਦਿੰਦੀਆਂ ਆ ਰਹੀਆਂ ਹਨ। ਇਸ ਜਥੇਬੰਦੀ ਦੇ ਭਾਰਤੀ ਪ੍ਰਮੁੱਖ ਭਾਈ ਬਖਸ਼ੀਸ਼ ਸਿੰਘ
ਵਲੋਂ ਨਾਨਕਸ਼ਾਹੀ ਕੈਲੰਡਰ ਦੇ ਰਚਣਹਾਰੇ ਭਾਈ ਪਾਲ ਸਿੰਘ ਪੁਰੇਵਾਲ਼ ਨੂੰ ਮੂਲ ਨਾਨਕਸ਼ਾਹੀ
ਕੈਲੰਡਰ ‘ਤੇ ਪਹਿਰਾ ਦੇਣ ਦੇ ਦਿੱਤੇ ਹੋਏ ਵਚਨ ਦੀ ਪੈਰਵੀ ਕਰਦਿਆਂ ਸਿਆਟਲ ਵਿੱਚ ਹੋ ਰਹੇ
ਸੈਮੀਨਾਰ ਦੀ ਸਫਲਤਾ ਵਾਸਤੇ ਤਨੋਂ ਮਨੋਂ ਸਹਾਇਤਾ ਕਰਨ ਦਾ ਭਰੋਸਾ ਵੀ ਦੁਆਇਆ ਗਿਆ ਹੈ।
ਜਥੇ ਵਲੋਂ ਯੂ.ਕੇ. ਅਤੇ ਹੋਰ ਯ੍ਰੂਰਪੀਅਨ ਦੇਸ਼ਾਂ ਦੀ ਮੰਗ ਮੁਤਾਬਿਕ
ਮੂਲ ਨਾਨਕਸ਼ਾਹੀ ਕੈਲੰਡਰ ਹਜ਼ਾਰਾਂ ਦੀ ਗਿਣਤੀ ਛਾਪਣ ਦਾ ਦਾਅਵਾ ਕਰਨ ਦੇ ਨਾਲ਼ ਨਾਲ਼ ਦੇਸ਼
ਵਿਦੇਸ਼ ਦੀਆਂ ਸਮੂੰਹ ਗੁਰਦੁਆਰਾ ਕਮੇਟੀਆਂ, ਸਭਾ ਸੁਸਾਇਟੀਆਂ ਅਤੇ ਪੰਥ ਦਰਦੀਆਂ ਨੂੰ ਅਪੀਲ
ਕੀਤੀ ਗਈ ਹੈ ਕਿ ਉਹ ਸਾਰੇ ਧਾਰਮਿਕ ਅਤੇ ਇਤਿਹਾਸਿਕ ਦਿਹਾੜੇ ਮੂਲ ਨਾਨਕਸ਼ਾਹੀ ਕੈਲੰਡਰ
ਅਨੁਸਾਰ ਹੀ ਮਨਾਉਣੇ ਯਕੀਨੀਂ ਬਣਾਉਣ ਦੀ ਕ੍ਰਿਪਾਲਤਾ ਕਰਨ।
ਅਖੰਡ ਕੀਰਤਨੀ ਜਥਾ ਯੂ.ਕੇ. ਦੇ ਮੁਖੀ ਭਾਈ ਰਜਿੰਦਰ ਸਿੰਘ ਪੁਰੇਵਾਲ਼
ਵਲੋਂ ਜਾਰੀ ਕੀਤੇ ਗਏ ਇਸ ਪ੍ਰਸੰਸਾ ਪੱਤਰ ਵਿੱਚ ਗੁਰਦੁਆਰਾ ਸ੍ਰੀ ਗੁਰੁ ਸਿੰਘ ਸਭਾ
ਕੁਵੈਂਟਰੀ, ਗੁਰਦੁਆਰਾ ਸ੍ਰੀ ਗੁਰੂ ਸਿੰਘ ਸਭਾ ਡਰਬੀ, ਕਾਰ ਸੇਵਾ ਕਮੇਟੀ ਸਿੱਖ ਗੁਰਧਾਮ
ਪਾਕਿਸਤਾਨ, ਸਿੱਖ ਸੇਵਕ ਸੁਸਾਇਟੀ ਇੰਟਰਨੈਸ਼ਨਲ, ਬ੍ਰਿਟਿਸ਼ ਸਿੱਖ ਕੌਂਸਲ, ਨੈਸ਼ਨਲ ਹੈਰੀਟੇਜ਼
ਅਤੇ ਘੱਲੂਘਾਰਾ ਅਜਾਇਬ ਘਰ ਡਰਬੀ ਅਤੇ ਖਾਲਸਾ ਇੰਟਰਨੈਸ਼ਨਲ ਵੈਲਫੇਅਰ ਸੁਸਾਇਟੀ ਆਦਿਕ
ਸੰਸਥਾਵਾਂ ਦੇ ਮੁਖੀਆਂ ਦੇ ਨਾਮ ਵੀ ਸ਼ਾਮਿਲ ਹਨ। ਭਾਈ ਪੁਰੇਵਾਲ ਨੇ ਸ੍ਰੀ ਅਕਾਲ ਤਖਤ
ਸਾਹਿਬ ਅਤੇ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੂੰ ਵੀ ਅਪੀਲ ਕੀਤੀ ਹੈ ਕਿ ਦੇਸ਼
ਵਿਦੇਸ਼ ਵਿੱਚ ਸਫਲਤਾ ਸਹਿਤ ਸੱਤ ਸਾਲ ਕਾਰਆਮਦ ਰਹੇ ਮੂਲ ਨਾਨਕਸ਼ਾਹੀ ਕੈਲੰਡਰ ਨੂੰ ਲਾਗੂ
ਕਰਕੇ ਪੰਥ ਵਿੱਚੋਂ ਦੁਬਿਧਾ ਦਾ ਮਾਹੌਲ ਖਤਮ ਕੀਤਾ ਜਾਵੇ।