ਵਿਸ਼ਾਖਾਪਟਨਮ,
6 ਅਕਤੂਬਰ (ਏਜੰਸੀਆਂ): ਵਿਸ਼ਾਖਾਪਟਨਮ (ਆਂਧਰਾ ਪ੍ਰਦੇਸ਼) ਨੇੜੇ ਵਿਜੇ ਨਗਰ ਚ ਕੇ. ਐਲ.
ਪੁਰਮ ਸਥਿਤ ਗੁਰਦੁਆਰਾ ਸ੍ਰੀ ਗੁਰੂ ਨਾਨਕ ਦਰਬਾਰ ਸਾਹਿਬ ਤੇ ਤਕਰੀਬਨ 150-200 ਭੜਕੇ ਲੋਕਾਂ
ਨੇ ਅਚਾਨਕ ਹਮਲਾ ਕਰਕੇ ਗੁਰਦੁਅਰਾ ਸਾਹਿਬ ਦੀ ਇਮਾਰਤ ਦੀ ਭੰਨਤੋੜ ਕਰਦਿਆਂ ਇਮਾਰਤ ਦੇ ਕੁਝ
ਹਿਸੇ ਤੇ ਸਾਜ਼ੋ-ਸਮਾਨ ਨੂੰ ਸਾੜ ਦਿਤਾ।
ਪ੍ਰਾਪਤ ਜਾਣਕਾਰੀ ਅਨੁਸਾਰ ਇਸ ਸਾਰੇ ਘਟਨਾਕ੍ਰਮ ਚ ਗੁਰਦੁਆਰਾ
ਸਾਹਿਬ ਦੇ ਗ੍ਰੰਥੀ ਸ. ਜਸਵੀਰ ਸਿੰਘ ਨੇ ਪਾਵਨ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੀ ਬੀੜ ਨੂੰ
ਲੈ ਕੇ ਇਕ ਕਮਰੇ ਚ ਵੜਨ ਚ ਕਾਮਯਾਬ ਹੋ ਗਏ। ਇਸ ਤੋਂ ਪਹਿਲਾਂ ਭੜਕੇ ਲੋਕਾਂ ਵਲੋਂ ਰੁਮਾਲਾ
ਸਾਹਿਬ ਤੇ ਗੁਰਦੁਆਰਾ ਸਾਹਿਬ ਦੇ ਹੋਰ ਸਾਜ਼ੋ ਸਮਾਨ ਨੂੰ ਵੀ ਅੱਗ ਲਗਾ ਦਿਤੀ ਗਈ।
ਕੁਝ ਅਪੁਸ਼ਟ ਖਬਰਾਂ ਮੁਤਾਬਕ ਗੁਰੂ ਗ੍ਰੰਥ ਸਾਹਿਬ ਦੀ ਬੀੜ ਨੂੰ ਕੁਝ
ਨੁਕਸਾਨ ਪਹੁੰਚਣ ਦੀਆਂ ਵੀ ਰਿਪੋਰਟਾਂ ਹਨ, ਪਰ ਇਸ ਦੀ ਅਜੇ ਤਾਈਂ ਪੁਸ਼ਟੀ ਨਹੀਂ ਹੋ ਸਕੀ
ਹੈ। ਪਾਵਨ ਬੀੜ ਸਾਹਿਬ ਨੂੰ ਬਚਾਉਣ ਵਾਲੇ ਗ੍ਰੰਥੀ ਜਸਵੀਰ ਸਿੰਘ ਦੀ ਇਨ੍ਹਾਂ ਲੋਕਾਂ ਵਲੋਂ
ਕਾਫੀ ਕੁੱਟਮਾਰ ਕੀਤੀ ਗਈ ਹੈ ਜਿਸ ਕਾਰਨ ਉਨ੍ਹਾਂ ਦੇ ਕਾਫੀ ਸੱਟਾਂ ਵੱਜਣ ਦੀ ਵੀ ਰਿਪੋਰਟ
ਹੈ।
ਇਥੇ ਦੱਸਣਯੋਗ ਹੈ ਕਿ ਕੇਂਦਰ ਸਰਕਾਰ ਵਲੋਂ ਆਂਧਰਾ ਪ੍ਰਦੇਸ਼ ਚ ਵੱਖਰਾ
ਰਾਜ ਤੇਲੰਗਾਨਾ ਬਣਾਏ ਜਾਣ ਕਾਰਨ ਲੋਕ ਕਾਫੀ ਭੜਕੇ ਹੋਏ ਹਨ ਤੇ ਇਸ ਹਮਲੇ ਨੂੰ ਉਸੇ ਦਾ
ਸਿਟਾ ਦੱਸਿਆ ਜਾ ਰਿਹਾ ਹੈ। ਵਿਜੇਨਗਰ ਖੇਤਰ ਚ 1 ਲੱਖ ਦੇ ਕਰੀਬ ਸਿੱਖ ਵਸੋਂ ਵਸਦੀ ਹੈ ਤੇ
ਇਹ ਗੁਰਦੁਅਰਾ ਸਾਹਿਬ ਇਲਾਕੇ ਦਾ ਸਭ ਤੋਂ ਵੱਡਾ ਗੁਰਦੁਆਰਾ ਹੈ। ਭੀੜ ਵਲੋਂ ਗਿਣੀ-ਮਿਥੀ
ਸਾਜਿਸ਼ ਤਹਿਤ ਗੁਰਦੁਆਰਾ ਸਾਹਿਬ ਦੀ ਇਮਾਰਤ ਤੇ ਹਮਲਾ ਕੀਤਾ ਗਿਆ ਹੈ। ਇਸ ਵੇਲੇ ਸਥਾਨਕ
ਪੁਲਿਸ ਵਲੋਂ ਮੌਕੇ ਤੇ ਪਹੁੰਚਕੇ ਸਥਿਤੀ ਕਾਬੂ ਹੇਠ ਕੀਤੀ ਹੋਈ ਹੈ ਜਦਕਿ ਹਮਲੇ ਲਈ ਕਿਸੇ
ਦੀ ਗ੍ਰਿਫਤਾਰੀ ਨਹੀਂ ਹੋਈ ਹੈ।
ਇਸ ਸਬੰਧੀ ਦਿੱਲੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਮਨਜੀਤ
ਸਿੰਘ ਜੀ ਕੇ ਨਾਲ ਗੱਲਬਾਤ ਦੌਰਾਨ ਦੱਸਿਆ ਕਿ ਉਹ ਇਸ ਘਟਨਾ ਤੇ ਪੂਰੀ ਨਜ਼ਰ ਰੱਖ ਰਹੇ ਹਨ।
ਉਨ੍ਹਾਂ ਇਸ ਦੀ ਨਿੰਦਾ ਕਰਦਿਆਂ ਕਿਹਾ ਕਿ ਗੁਰਦੁਆਰਾ ਸਾਹਿਬ ਦੀ ਇਮਾਰਤ ਤੇ ਹਮਲਾ ਕਰਨ
ਵਾਲੇ ਅਨਸਰਾਂ ਨੂੰ ਤੁਰੰਤ ਗ੍ਰਿਫਤਾਰ ਕਰਕੇ ਸਲਾਖਾਂ ਪਿਛੇ ਡੱਕਣਾ ਚਾਹੀਦਾ ਹੈ। ਇਥੇ ਇਹ
ਜ਼ਿਕਰ ਕਰਨਾ ਉਚਿਤ ਹੋਵੇਗਾ ਕਿ ਇਸ ਘਟਨਾ ਕਾਰਨ ਜਿਥੇ ਕੇਂਦਰ ਵਲੋਂ ਬਣਾਏ ਵੱਖਰੇ ਤੇਲੰਗਾਨਾ
ਰਾਜ ਨਾਲ ਆਪਣੀਆਂ ਸਿਆਸੀ ਰੋਟੀਆਂ ਸੇਕਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ, ਉਥੇ ਇਕ ਵਾਰ ਫਿਰ
ਪਾੜੋ ਤੇ ਰਾਜ ਕਰੋ ਦੀ ਇਸ ਸਿਆਸਤ ਦਾ ਸ਼ਿਕਾਰ ਘੱਟ ਗਿਣਤੀ ਸਿੱਖ ਭਾਈਚਾਰਾ ਤੇ ਇਸ ਦੇ
ਧਾਰਮਕ ਸਥਾਨ ਹੋ ਰਹੇ ਹਨ।