Share on Facebook

Main News Page

ਅਖੌਤੀ ਦਸਮ ਗ੍ਰੰਥ ਦੀ ਬਦੌਲਤ ਹੁਣ ਹਿੰਦੂ ਸੰਸਥਾਵਾਂ ਵੱਲੋਂ ਗੁਰੂ ਸਾਹਿਬਾਨ ਨੂੰ ਸ਼ਿਵ ਦਾ ਉਪਾਸ਼ਕ ਬਨਾਉਣ ਲਈ ਯਤਨ ਸ਼ੁਰੂ: ਨੌਜਵਾਨ ਆਗੂ ਸ. ਇਕਵਾਕ ਸਿੰਘ ਪੱਟੀ ਵੱਲੋਂ ਖੁਲਾਸਾ

ਅੰਮ੍ਰਿਤਸਰ: ਗੁਰੂ ਨਾਨਕ ਮਿਸ਼ਨ ਯੂਥ ਕਲੱਬ ਦੇ ਨੌਜਵਾਨ ਆਗੂ ਸ. ਇਕਵਾਕ ਸਿੰਘ ਪੱਟੀ ਨੇ ਅੱਜ ਵਿਸ਼ੇਸ਼ ਗੱਲਬਾਤ ਰਾਹੀਂ ਹਿੰਦੂ ਜਥੇਬੰਦੀਆਂ ਵੱਲੋਂ ਬੜੀ ਚਲਾਕੀ ਨਾਲ ਗੁਰੂ ਸਾਹਿਬਾਨ ਨੂੰ ਸ਼ਿਵ ਦਾ ਉਪਾਸ਼ਕ ਦੱਸਣ ਲਈ ਕੀਤੇ ਜਾ ਰਹੇ ਯਤਨਾਂ ਦਾ ਖੁਲਾਸਾ ਕਰਦਿਆਂ ਕਿਹਾ, ਕਿ ਅਖੌਤੀ ਦਸਮ ਗ੍ਰੰਥ ਤੋਂ ਬਾਅਦ ਹੁਣ ਸਿੱਖਾਂ ਨੂੰ ਪ੍ਰਮਾਤਮਾ ਦੀ ਪਰਿਭਾਸ਼ਾ ਸ਼ਿਵ ਵਜੋਂ ਦੱਸਣ ਲਈ ਇੱਕ ਹਿੰਦੂ ਸੰਸਥਾ ਪ੍ਰਜਾਪਿਤਾ ਬ੍ਰਹਮਕੁਮਾਰੀ ਈਸ਼ਵਰੀ ਵਿਸ਼ਵ ਵਿਦਿਆਲਾ, ਪਾਂਡਵ ਭਵਨ, ਮਾਊਂਟ ਆਬੂ (ਰਜਿ:) ਵੱਲੋਂ 16 ਸਫਿਆਂ ਪ੍ਰਮਾਤਮਾ ਦੀ ਪਛਾਣ ਹੈ ਨਾਮੀ ਇੱਕ ਕਿਤਾਬਚੇ ਵਿੱਚ ਕੁਫਰ ਤੋਲਿਆ ਜਾ ਰਿਹਾ ਹੈ, ਤਾਂ ਕਿ ਸਿੱਖ ਕੌਮ ਦੇ ਸਿਧਾਂਤਾਂ ਦਾ ਪੂਰੀ ਤਰ੍ਹਾਂ ਹਿੰਦੂਕਰਣ ਕੀਤਾ ਜਾ ਸਕੇ ਅਤੇ ਅਸਿੱਧੇ ਰੂਪ ਵਿੱਚ ਇਸ ਕਿਤਾਬ ਰਾਹੀਂ ਇਸ ਗੱਲ ਤੇ ਜ਼ੋਰ ਦਿੱਤਾ ਜਾ ਰਿਹਾ ਹੈ ਕਿ ਪ੍ਰਮਾਤਮਾ ਦਾ ਨਾਮ ਸ਼ਿਵ ਹੀ ਹੈ । ਅਤੇ ਹਰ ਧਰਮ ਵਿੱਚ ਉਸਦੀ ਪੂਜਾ ਕਿਸੇ ਨਾ ਕਿਸੇ ਤਰੀਕੇ ਨਾਲ ਕੀਤੀ ਜਾ ਰਹੀ ਹੈ।

ਉਹਨਾਂ ਦੱਸਿਆਂ ਕਿ ਪੰਨਾ ਨੰ. 4 ਉੱਪਰ ਲਿਖਿਆ ਹੈ ਕਿ ਇਹ ਆਖਣਾ ਗਲਤ ਹੈ ਕਿ ਪ੍ਰਮਾਤਮਾ ਨਾਮ ਤੋਂ ਨਿਆਰਾ ਹੈ, ਹਾਂ! ਇਹ ਕਿਹਾ ਜਾ ਸਕਦਾ ਹੈ ਕਿ ਪ੍ਰਮਾਤਮਾ ਦਾ ਨਾਮ ਨਿਆਰਾ ਹੈ। ਉਹ ਦਿਵ ਨਾਮ ਹੈ ਸ਼ਿਵ। ਸ਼ਿਵ ਦਾ ਅਰਥ ਹੈ 1. ਕਲਿਆਣਕਾਰੀ 2. ਬੀਜ ਰੂਪ 3. ਬਿੰਦੂ । ਕਿਉਂਕਿ ਪ੍ਰਮਾਤਮਾ ਸਾਰੀ ਸ੍ਰਿਸ਼ਟੀ ਦਾ ਸਦ-ਗਤੀ ਦਾਤਾ ਹੈ, ਇਸ ਲਈ ਉਹ ਕਲਿਆਣਕਾਰੀ ਹੈ। ਜਿਸ ਪ੍ਰਕਾਰ ਬੀਜ ਕਿਸੇ ਬ੍ਰਿਕਸ਼ ਦਾ ਰਚਤਾ ਹੁੰਦਾ ਹੈ, ਇਸੇ ਪ੍ਰਕਾਰ ਪ੍ਰਮਾਤਮਾ ਸ਼ਿਵ ਬੀ ਸ੍ਰਿਸ਼ਟੀ-ਰੂਪੀ ਬ੍ਰਿਕਸ਼ ਦਾ ਨਮਤਿ ਕਾਰਣ ਹੈ, ਕਿਉਂਕਿ ਪ੍ਰਮਾਤਮਾ ਦਾ ਰੂਪ ਜੋਤੀ ਬਿੰਦੂ ਸਮਾਨ ਹੈ। ਇੱਥੋਂ ਸੱਪਸ਼ਟ ਹੁੰਦਾ ਹੈ ਕਿ ਉਸਦਾ ਸ਼ਿਵ ਨਾਮ ਬਿਲਕੁਲ ਠੀਕ ਹੈ।

ਸ. ਪੱਟੀ ਨੇ ਕਿਹਾ ਬੇਸ਼ੱਕ ਸਿੱਖੀ ਸਿਧਾਂਤਾਂ ਤੇ ਕਿਤਾਬ ਵਿੱਚ ਸਿੱਧੇ ਤੌਰ ਤੇ ਕੁੱਝ ਨਹੀਂ ਲਿਖਿਆ ਗਿਆ, ਪਰ ਟਾਈਲ ਪੇਜ ਤੇ ਗੁਰੂ ਨਾਨਕ ਸਾਹਿਬ ਅਤੇ ਗੁਰੂ ਗੋਬਿੰਦ ਸਿੰਘ ਜੀ ਦੀ ਤਸਵੀਰ ਛਾਪ ਕੇ ਸਿੱਖ ਕੌਮ ਵਿੱਚ ਅਪ੍ਰਮਾਣਿਤ ਦਸ਼ਮ ਗ੍ਰੰਥ ਵਿੱਚੋਂ ਪੰਗਤੀ ਦੇਹ ਸ਼ਿਵਾ ਬਰ ਲਿਖ ਕੇ ਗੁਰੂ ਸਾਹਿਬਾਨ ਵੱਲੋਂ ਸ਼ਿਵ ਦੀ ਮਹਿਮਾ ਦਰਸਾਉਣ ਦੀ ਕੋਸ਼ਿਸ਼ ਕੀਤੀ ਗਈ ਹੈ, ਉਥੇ ਗੁਰੂ ਨਾਨਕ ਸਾਹਿਬ ਦੀ ਤਸਵੀਰ ਵਿੱਚ ਵੀ ਇੱਕ ਜੋਤੀ ਬਿੰਦੂ ਵਿੱਚ ਨਿਕਲ ਰਹੀ ਰੋਸ਼ਨੀ ਲੈਂਦੇ ਦਿਖਾਇਆ ਗਿਆ ਹੈ। ਜੋ ਕਿ ਸਿੱਖ ਹਲਕਿਆਂ ਲਈ ਇੱਕ ਚਿੰਤਾਜਨਕ ਵਿਸ਼ਾ ਹੈ।

ਉਹਨਾਂ ਕਿਹਾ ਕਿ ਆਪਣੀ ਗੱਲ ਨੂੰ ਸਿਧ ਕਰਨ ਲਈ ਹੋਰ ਘੱਟ ਗਿਣਤੀ ਕੌਮਾਂ ਦੇ ਰਹਿਬਰਾਂ ਦੀ ਤਸਵੀਰਾਂ ਦਾ ਦੁਰਪ੍ਰਯੋਗ ਵੀ ਕੀਤਾ ਗਿਆ ਜਿਸ ਵਿੱਚ ਮੁਸਲਮਾਨ ਧਰਮ ਦੇ ਹਜ਼ਰਤ ਮੂਸਾ ਜੀ, ਇਸਾਈ ਧਰਮ ਦੇ ਯਿਸੂ ਮਸੀਹ ਆਦਿਕ ਦੀਆਂ ਤਸਵੀਰਾਂ ਨੂੰ ਵੀ ਸ਼ਾਮਲ ਕਰਦਿਆਂ ਹੋਇਆਂ ਜੋਤੀ ਬਿੰਦੂ ਸ਼ਿਵ ਨੂੰ ਪ੍ਰਮਾਤਮਾ ਵਜੋ ਦਰਸਾਉਂਦਿਆਂ ਹੋਇਆਂ ਸੱਭ ਰਹਿਬਰਾਂ ਨੂੰ ਸ਼ਿਵ ਦੇ ਉਪਾਸ਼ਕ ਦਰਸਾਇਆ ਗਿਆ ਹੈ। ਉਹਨਾਂ ਕਿਹਾ ਕਿ ਹਿੰਦੂ ਫਿਰਕਾਪ੍ਰਸਤੀ ਵੱਲੋਂ ਘੱਟ ਗਿਣਤੀ ਕੌਮਾਂ ਦੇ ਇਤਿਹਾਸ ਅਤੇ ਵੀਚਾਰਧਾਰਾ ਨੂੰ ਰੱਲਗੱਡ ਕਰਨਾ ਘੱਟ ਗਿਣਤੀ ਕੌਮਾਂ ਦੇ ਭਵਿੱਖ ਲਈ ਖਤਰੇ ਦੀ ਘੰਟੀ ਹੈ।


Disclaimer: Khalsanews.org does not necessarily endorse the views and opinions voiced in the news / articles / audios / videos or any other contents published on www.khalsanews.org and cannot be held responsible for their views.  Read full details....

Go to Top