Main News Page

ਪੰਜਾਬ `ਚ ਵੱਧ ਰਿਹਾ ਡੇਰਾਵਾਦ ਕਿਸੇ ਵਿਅਕਤੀ-ਵਿਸ਼ੇਸ਼ ਲਈ ਹੀ ਨਹੀਂ ਬਲਕਿ ਪੂਰੀ ਮਨੁੱਖਤਾ ਲਈ ਖਤਰੇ ਦੀ ਘੰਟੀ ਹੈ। ਕਿਉਂਕਿ ਪਾਖੰਡੀ ਤੇ ਵਿਭਚਾਰੀ ਡੇਰੇਦਾਰਾਂ ਨੂੰ ਸਰਕਾਰੀ ਅਫਸਰਾਂ ਅਤੇ ਸਿਆਸੀ ਲੀਡਰਾਂ ਦਾ ਅਸ਼ੀਰਵਾਦ ਪ੍ਰਾਪਤ ਹੈ, ਜਿਸ ਕਾਰਨ ਇਨਾਂ ਡੇਰਿਆਂ `ਚ ਸਿੱਖ ਵਿਰੋਧੀ ਅਤੇ ਪੰਜਾਬ ਵਿਰੋਧੀ ਗੁੰਡਾ ਅਨਸਰਾਂ ਦੀ ਭਰਤੀ ਕੀਤੀ ਜਾਂਦੀ ਹੈ ਅਤੇ ਇਹ ਗੁੰਡਾ ਅਨਸਰ ਲੁੱਟਾਂ-ਖੋਹਾਂ ਅਤੇ ਮਾਰਧਾੜ ਕਰਕੇ ਪੰਜਾਬ ਦਾ ਮਾਹੌਲ ਖਰਾਬ ਕਰਨਾ ਚਾਹੁੰਦੇ ਹਨ। ਇਸ ਤੋਂ ਇਲਾਵਾ ਇਨਾਂ ਸਮਾਜ ਵਿਰੋਧੀ ਅਨਸਰਾਂ ਨੂੰ ਸਿਆਸੀ ਆਗੂਆਂ ਦੇ ਥਾਪੜੇ ਅਤੇ ਅਫਸਰਸ਼ਾਹੀਂ ਦੀ ਮਿਲੀਭੁਗਤ ਨਾਲ ਜਾਅਲੀ ਹਥਿਆਰਾਂ ਦੇ ਲਾਇਸੰਸ ਬਣਾ ਕੇ ਦਿੱਤੇ ਜਾਂਦੇ ਹਨ। ਜਲੰਧਰ ਜ਼ਿਲੇ ਦੇ ਕਸਬੇ ਨੂਰਮਹਿਲ ਦੇ ਚਰਚਿਤ ਡੇਰੇਦਾਰ ਆਸ਼ੂਤੋਸ਼ ਦਾ ਸੱਜਾ ਹੱਥ ਜਾਣਿਆ ਜਾਂਦਾ ਅਮਰਜੀਤ ਸਿੰਘ ਉਰਫ਼ ਅਰਵਿੰਦਾ ਨੰਦ ਅਜਿਹੇ ਕੰਮਾਂ ਲਈ ਬੜਾ ਮਸ਼ਹੂਰ ਹੈ।

ਅਰਵਿੰਦਾ ਨੰਦ ਨੇ ਪਿਛਲੇ ਸਮੇਂ `ਚ ਆਸ਼ੂਤੋਸ਼ ਦੀਆਂ ਕਰਤੂਤਾਂ ਨੰਗੀਆਂ ਕਰਨ ਵਾਲੇ ਪਤਾ ਨਹੀਂ ਕਿੰਨੇ ਲੋਕਾਂ ਨੂੰ ਟਿਕਾਣੇ ਲਾਇਆ ਅਤੇ ਹੁਣ ਵੀ ਉਹ ਅਜਿਹੇ ਵਿਅਕਤੀਆਂ ਨੂੰ ਸਬਕ ਸਿਖਾਉਣ ਲਈ ਯਤਨਸ਼ੀਲ ਹੈ। ਪਿਛਲੇ ਦਿਨੀਂ ਨੂਰਮਹਿਲੀਏ ਦੇ ਪਖੰਡਾਂ ਦਾ ਭਾਂਡਾ ਭੰਨਣ ਦੇ ਦੋਸ਼ `ਚ ਉਸਨੇ ਮੇਰੇ ਉੱਤੇ ਵੀ ਕਾਤਲਾਨਾ ਹਮਲਾ ਕਰਵਾਇਆ ਤੇ ਮੈਂ ਵਾਲ-ਵਾਲ ਜਾਨੋ ਤਾਂ ਬਚ ਗਿਆ ਪਰ ਮੇਰੀ ਇੱਕ ਲੱਤ ਤੇ ਮੋਢਾ ਟੁੱਟ ਗਿਆ, ਜਿਸ ਕਰਕੇ ਮੈਨੂੰ ਲੰਮੇ ਸਮੇਂ ਲਈ ਮੰਜੇ `ਤੇ ਪੈਣਾ ਪਿਆ। ਮੈਂ ਹੁਣ ਵੀ ਮੰਜੇ `ਤੇ ਪਿਆ ਪੰਥ ਦੇ ਨਾਂਅ `ਤੇ ਵਿਦੇਸ਼ਾਂ `ਚੋਂ ਪੌਂਡ ਜਾਂ ਡਾਲਰ ਇਕੱਠੇ ਕਰਨ ਵਾਲੇ ਭੱਦਰ-ਪੁਰਸ਼ਾਂ ਨੂੰ ਕੋਸਣ ਲਈ ਮਜਬੂਰ ਹਾਂ। ਕਿਉਂਕਿ ਮੈਨੂੰ ਬਾਬਾ ਬਲਜੀਤ ਸਿੰਘ ਦਾਦੂਵਾਲ ਤੋਂ ਇਲਾਵਾ ਕਿਸੇ ਵੀ ਪੰਥ ਦਰਦੀ ਨੇ ਕੋਈ ਸਹਾਇਤਾ ਨਹੀਂ ਭੇਜੀ। ਜਿਸ ਕਰਕੇ ਮੈਂ ਮੁਥਾਜੀ ਦੀ ਜਿੰਦਗੀ ਬਤੀਤ ਕਰ ਰਿਹਾ ਹਾਂ। ਆਸ਼ੂਤੋਸ਼ ਦਾ ਸਾਬਕਾ ਡਰਾਈਵਰ ਹੋਣ ਨਾਤੇ ਮੈਂ ਉਸ ਦੀਆਂ ਸਿੱਖ ਵਿਰੋਧੀ ਹਰਕਤਾਂ ਅਤੇ ਹੋਰ ਸ਼ਰਮਨਾਕ ਕਰਤੂਤਾਂ ਜਨਤਕ ਕਰਨ ਦੀ ਦਲੇਰੀ ਕਰ ਬੈਠਾ, ਜਿਸ ਬਦਲੇ ਮੈਨੂੰ ਸਮੇਂ-ਸਮੇਂ ਬਹੁਤ ਸੰਤਾਪ ਹੰਢਾਉਣਾ ਪਿਆ। ਮੇਰੇ ਰੋਜ਼ਾਨਾ ਸਪੋਕਸਮੈਨ ਅਖਬਾਰ `ਚ ਛਪੇ ਬਿਆਨ ਤੋਂ ਬਾਅਦ ਨੂਰਮਹਿਲੀਏ ਡੇਰੇ ਦੀਆਂ ਚੇਲੀਆਂ ਵੱਲੋਂ ਪੰਜਾਬ ਭਰ `ਚ ਸਪੋਕਸਮੈਨ ਦੇ 7 ਦਫਤਰਾਂ ਦੀ ਇਕੋ ਸਮੇਂ ਭੰਨ-ਤੋੜ ਕਰਕੇ ਕੀਮਤੀ ਸਮਾਨ ਨੂੰ ਤਹਿਸ-ਨਹਿਸ ਕੀਤਾ ਗਿਆ ਪਰ ਸਿਆਸੀ ਆਗੂਆਂ ਦੀ ਸਰਪ੍ਰਸਤੀ ਕਰਕੇ ਕਿਸੇ ਵੀ ਚੇਲੀ ਖਿਲਾਫ ਕੋਈ ਮਾਮਲਾ ਦਰਜ ਨਾ ਹੋਇਆ ਤੇ ਨਾ ਹੀ ਸਰਕਾਰ ਵੱਲੋਂ ਅਖਬਾਰ ਦੇ ਮਾਲਕਾਂ ਪ੍ਰਤੀ ਹਮਦਰਦੀ ਦੇ ਦੋ ਸ਼ਬਦ ਵਰਤੇ ਗਏ।

ਤਾਜ਼ਾ ਜਾਣਕਾਰੀ ਅਨੁਸਾਰ ਇਸ ਡੇਰੇ ਵਿੱਚ ਇੱਕ 16 ਮਰਲੇ ਦੇ ਮਕਾਨ ਵਿੱਚ 270 ਜੀਆਂ ਦੇ ਜਾਅਲੀ ਰਾਸ਼ਨ ਕਾਰਡ ਬਣਾਏ ਗਏ ਹਨ ਅਤੇ ਇਨਾਂ ਰਾਸ਼ਨ ਕਾਰਡਾਂ ਦੇ ਅਧਾਰ `ਤੇ ਹੀ ਇਨਾਂ ਨੂੰ ਹਥਿਆਰਾਂ ਦੇ ਲਾਇਸੰਸ ਬਣਾ ਕੇ ਦਿੱਤੇ ਗਏ ਹਨ ਅਤੇ ਇਨਾਂ ਗੁੰਡਾ ਅਨਸਰਾਂ ਨੂੰ ਸਰਕਾਰੀ ਪੁਲਿਸ ਅਧਿਕਾਰੀਆਂ ਅਤੇ ਸੇਵਾਮੁਕਤ ਅਫਸਰਾਂ ਵਲੋਂ ਟ੍ਰੇਨਿੰਗ ਦਿੱਤੀ ਜਾਂਦੀ ਹੈ। ਜ਼ਿਕਰਯੋਗ ਹੈ ਕਿ ਇਸ ਡੇਰੇ ਵਿੱਚ ਭਰਤੀ ਕੀਤੇ ਨੌਜਵਾਨ ਮੁੰਡੇ/ਕੁੜੀਆਂ ਦੇ ਨਾਂਅ ਬਦਲ ਕੇ ਰੱਖ ਲਏ ਜਾਂਦੇ ਹਨ ਅਤੇ ਆਸ਼ੂਤੋਸ਼ ਨੇ ਵੀ ਬਿਹਾਰ ਅਤੇ ਦਿੱਲੀ ਵਿੱਚ ਨਾਂਅ ਬਦਲਕੇ ਰੱਖੇ ਸਨ, ਕਦੀ ਇਹ ਪ੍ਰਵਕਤਾ ਨੰਦ ਅਤੇ ਕਦੀ ਮਹੇਸ਼ ਕੁਮਾਰ ਝਾਅ ਅਤੇ ਹੁਣ ਆਸ਼ੂਤੋਸ਼ ਰੱਖ ਕੇ ਲੋਕਾਂ ਦੀਆਂ ਅੱਖਾਂ `ਚ ਘੱਟਾ ਪਾ ਰਿਹਾ ਹੈ। ਪੰਜਾਬ ਸਰਕਾਰ ਇਨਾਂ ਡੇਰਿਆਂ ਵਿਰੁੱਧ ਜਾਂਚ ਕਰਾਉਣ `ਚ ਅਸਫਲ ਰਹੀ ਹੈ ਅਤੇ ਮੈਂ ਕੇਂਦਰ ਸਰਕਾਰ ਅਤੇ ਸੀ. ਬੀ. ਆਈ. ਨੂੰ ਅਪੀਲ ਕਰਦਾ ਹਾਂ ਕਿ ਇਨਾਂ ਡੇਰਿਆਂ `ਚ ਰਹਿ ਰਹੇ ਅਨਸਰਾਂ, ਜਾਅਲੀ ਹਥਿਆਰਾਂ ਦੀ ਜਾਂਚ ਕੀਤੀ ਜਾਵੇ ਅਤੇ ਅਰਵਿੰਦਾ ਨੰਦ ਤੋਂ ਡੂੰਘਾਈ ਨਾਲ ਪੁੱਛ-ਪੜਤਾਲ ਕੀਤੀ ਜਾਵੇ ਤਾਂ ਕਿ ਆਉਣ ਵਾਲੇ ਸਮੇਂ `ਚ ਪੰਜਾਬ 84 ਦੇ ਦੰਗਿਆਂ ਦਾ ਰੂਪ ਨਾ ਧਾਰਨ ਕਰ ਸਕੇ।

ਪੂਰਨ ਸਿੰਘ ਦੇਸਲ
ਮੋਬਾ. 81466-48150