ਬਰਨਾਲਾ, 14 ਸਤੰਬਰ (ਜਗਸੀਰ ਸਿੰਘ ਸੰਧੂ) : ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ
ਕਮੇਟੀ ਦੇ ਪ੍ਰਧਾਨ ਅਵਤਾਰ ਸਿੰਘ ਮੱਕੜ ਵੱਲੋਂ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਸਾਬਕਾ ਜਥੇਦਾਰ ਭਾਈ
ਰਣਜੀਤ ਸਿੰਘ ਸੰਬਧੀ ਬੋਲੀ ਗਈ ਬਹੁਤ ਹੀ ਭੱਦੀ ਸ਼ਬਦਾਂਵਲੀ ਨਾਲ ਸਿੱਖ ਕੌਮ ਅੰਦਰ ਇਕ ਰੋਸ ਦੀ ਲਹਿਰ
ਪੈਦਾ ਹੋ ਗਈ ਹੈ, ਜੋ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆਂ ਆਮ ਚੋਣਾਂ ਸਿਰ 'ਤੇ ਹੋਣ ਕਰਕੇ
ਬਾਦਲ ਦਲ ਨੂੰ ਬਹੁਤ ਮਹਿੰਗੀ ਪੈ ਸਕਦੀ ਹੈ।
ਇਹ ਵੀਡੀਓ ਕਲਿਪਿੰਗ
ਵਿਚ ਇਕ ਸਾਥੀ ਨਾਲ ਬੈਠੇ ਸ਼੍ਰੋਮਣੀ ਕਮੇਟੀ ਪ੍ਰਧਾਨ ਅਵਤਾਰ ਸਿੰਘ ਮੱਕੜ ਟੈਲੀਫੂਨ 'ਤੇ ਹੋ ਰਹੀ
ਗੱਲਬਾਤ ਰਾਹੀਂ ਕਿਸੇ ਨੂੰ ਕਹਿ ਰਹੇ ਹਨ ਕਿ ‘‘ਮੈਂ ਉਸ ਨੂੰ ਘੂਰ 'ਤਾ,
ਮੈਂ ਕਿਹਾ ਉਸ ਸਾਲੇ ਬ੍ਰਾਹਮਣ ਦੇ ਪੁੱਤ ਦਾ ਕੁਛ ਨਹੀਂ ਜਾਣਾ ਨੁਕਸਾਨ ਤੇਰਾ ਹੋ ਰਿਹੈ, ਉਹਨੂੰ
ਹਰਾਮ ਦੇ ਨੂੰ ਤਾਂ ਕੋਈ ਹਰਜ ਨਹੀਂ, ਬੇਇੱਜਤੀ ਸਾਡੀ ਹੋਣੀ, ਕਿਉਂਕਿ ਅਸੀਂ ਦਾਹ 'ਤੇ ਲੱਗੇ ਹੋਏ
ਹਾਂ'' ਇਸ ਗੱਲਬਾਤ ਤੋਂ ਬਾਅਦ ਮੱਕੜ ਸਾਹਿਬ ਅੱਗੋਂ ਕਿਸੇ ਵੱਲੋਂ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਸਾਬਕਾ
ਜਥੇਦਾਰ ਭਾਈ ਰਣਜੀਤ ਸਿੰਘ ਵੱਲੋਂ ਅਵਤਾਰ ਸਿੰਘ ਮੱਕੜ 'ਤੇ 1 ਕਰੋੜ 62 ਲੱਖ ਰੁਪਏ ਦਾ ਪੈਟਰੋਲ ਫੂਕੇ
ਜਾਣ ਸਬੰਧੀ ਲਾਏ ਦੋਸ਼ਾਂ ਬਾਰੇ ਕੀਤੇ ਹੋਏ ਸਵਾਲ ਦਾ ਜਵਾਬ ਦਿੰਦਿਆਂ ਮੱਕੜ ਸਾਹਿਬ ਕਹਿੰਦੇ ਹਨ
‘‘ਉਹਨੂੰ ਕਹੋ, ਤੂੰ ਕੋਠੀ ਦੱਬੀ ਫਿਰਦੈ, ਤੈਨੂੰ ਕਿੰਨੇ ਸਾਲ ਹੋਗੇ, ਅਕਾਲ ਤਖ਼ਤ ਦੀ ਜਥੇਦਾਰੀ ਛੱਡੇ
ਨੂੰ, ਮੈਂ ਤਾਂ ਪ੍ਰਧਾਨ ਆਂ, ਮੈਂ ਤਾਂ ਕੁਛ ਕੀਤਾ, ਉਦੇ 'ਤੇ ਮੈਂ ਖਰਚਿਐ, ਮੈਂ ਤਾਂ ਸਾਬਿਤ ਕਰਦੂਗਾ,
ਬਈ ਮੈਂ ਕਿਉਂ ਖਰਚਿਐ, ਮੇਰੀਆਂ ਤਿੰਨ ਗੱਡੀਆਂ ਚਲਦੀਆਂ ਨੇ, ਮੇਰੀਆਂ ਤਿੰਨੇ ਗੱਡੀਆਂ ਪੈਟਰੋਲ 'ਤੇ
ਨੇ, ਦੋ ਮੇਰੀ ਸਕਿਊਰਟੀ ਦੀਆਂ ਤੇ ਇਕ ਗੱਡੀ ਮੇਰੀ ਆਪਣੀ ਐ ਕੈਮਰੀ, ਉਹਨੂੰ ਪੁੱਛੋਂ ਬਈ ਤੂੰ ਕੋਠੀ
ਕਿਹੜੀ ਆੜ 'ਚ ਦੱਬੀ ਬੈਠੈ, ਛੱਜ ਤਾਂ ਬੋਲੇ ਛਾਣਨੀ ਕੀ ਬੋਲੇ, ਜਿਹੜਾ ਬੰਦਾ ਆਪ ਗੁਰੂਘਰ ਦੀ
ਪ੍ਰਾਪਰਟੀ ਦੱਬੀ ਬੈਠੈ, ਉਹ ਲੋਕਾਂ ਨੂੰ ਕੀ ਨਸੀਅਤ ਦਿਊ, ਜੇ ਉਹ ਐਨਾ ਈ ਨਸੀਅਤ ਦੇਣ ਜੋਗਾ ਹੁੰਦਾ
ਤਾਂ ਅਕਾਲ ਤਖ਼ਤ ਦੀ ਜਥੇਦਾਰੀ ਨਾ ਨਿਭਾਅ ਲੈਂਦਾ, ਇਸ ਵਾਸਤੇ ਉਹਨੂੰ ਕਹੋ ਤੂੰ ਆਪਣੀ ਜਬਾਨ-----,
ਜਿੱਦਾਂ ਮਰਜੀ ਝੂਠੀ ਬੋਲੀ ਜਾਵੇ, ਉਹਦੇ ਝੂਠ ਦਾ ਸੰਗਤ 'ਤੇ ਕੋਈ ਅਸਰ ਨਹੀਂ, ਇਸ ਤੋਂ ਇਲਾਵਾ ਵੀ
ਮੇਰੇ ਕੋਲ ਹੈਗਾ ਬਈ ਦਿੱਲੀ ਦੇ ਜਿਹੜੇ ਮੈਂਬਰ ਬਣਦੇ ਨੇ, ਉਹਨਾਂ ਵਾਸਤੇ ਕੀ ਕਰਦੈ ਇਹੈ''
ਇਸ ਤੋਂ ਬਾਅਦ ਸਾਹਮਣੇ ਵਾਲੇ ਦੇ ਪੁੱਛੇ ਸਵਾਲ ਦਾ ਜਵਾਬ ਦਿੰਦਿਆਂ ਮੱਕੜ ਸਾਹਿਬ ਕਹਿੰਦੇ ਹਨ ‘‘ਥੋਨੂੰ
ਦੱਸਿਆ ਤਾਂ ਹੈ, ਜ਼ਮੀਨ 'ਚ ਗੱਡ ਕੇ ਤੋਰਾਂਗੇ'' ਇਸ ਉਪਰੰਤ ਮੱਕੜ ਸਾਹਿਬ ਖਚਰੀ ਜਿਹੀ ਹਾਸੀ
ਹੱਸਣ ਲੱਗਦੇ ਹਨ।
ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਵੱਲੋਂ ਸਿੱਖੀ ਦੀ ਸਰਬ ਉਚ
ਸੰਸਥਾ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਇਕ ਸਾਬਕਾ ਜਥੇਦਾਰ ਪ੍ਰਤੀ ਬੋਲੀ ਗਈ ਅਜਿਹੀ ਮੰਦੀ ਭਾਸ਼ਾ ਸਾਬਿਤ
ਕਰਦੀ ਹੈ ਕਿ ਜਾਂ ਤਾਂ ਮੱਕੜ ਸਾਹਿਬ ਬੁਖਲਾਹਟ ਵਿਚ ਆ ਚੁੱਕੇ ਹਨ ਅਤੇ ਜਾਂ ਫਿਰ ਉਹਨਾਂ ਦੀ ਨਜ਼ਰ
ਵਿਚ ਤਖ਼ਤਾਂ ਦੇ ਜਥੇਦਾਰਾਂ ਦੀ ਕੋਈ ਅਹਿਮੀਅਤ ਹੀ ਨਹੀਂ ਹੈ।
