Main News Page

ਲੁਧਿਆਣਾ 18 ਅਗਸਤ (ਸੰਦੀਪ ਸਿੰਘ): ਸਰੀਰ ਦੀ ਗੁਲਾਮੀ ਨਾਲੋਂ ਮਨੁੱਖ ਨੂੰ ਮਾਨਸਿਕ ਗੁਲਾਮੀ ਕਮਜੌਰ ਤੇ ਲਾਚਾਰ ਕਰਦੀ ਹੈ, ਇਨ੍ਹਾਂ ਸ਼ਬਦਾਂ ਦਾ ਪ੍ਰਗਟਾਵਾ ਗੁਰਮਤਿ ਗਿਆਨ ਮਿਸ਼ਨਰੀ ਕਾਲਜ ਲੁਧਿਆਣਾ ਦੇ ਪ੍ਰੋ: ਸਰਬਜੀਤ ਸਿੰਘ ਜੀ ਧੂੰਦਾ ਨੇ ਅੰਮ੍ਰਿਤਸਰ ਦੀ ਕੇਂਦਰੀ ਜੇਲ ਦੇ ਗੁਰਦੁਆਰਾ ਸਾਹਿਬ ਵਿਖੇ ਹੋਏ ਇੱਕ ਗੁਰਮਤਿ ਸਮਾਗਮ ਦੌਰਾਨ ਉਥੋਂ ਦੀਆਂ ਸੰਗਤਾਂ ਦੇ ਇਕੱਠ ਨੂੰ ਸਬੋਧਨ ਹੁੰਦਿਆਂ ਕੀਤਾ। ਇਹ ਸਮਾਗਮ ਭਾਈ ਹਰਨੇਕ ਸਿੰਘ, ਭਾਈ ਇੰਦਰਜੀਤ ਸਿੰਘ ਵੱਲੋਂ ਜੇਲ ਪ੍ਰਸ਼ਾਸ਼ਨ ਦੇ ਸਹਿਯੋਗ ਨਾਲ ਕੀਤਾ ਗਿਆ। ਇਸ ਸਮੇਂ ਪ੍ਰੋ: ਧੂੰਦਾ ਦੇ ਨਾਲ ਭਾਈ ਗੁਰਜੰਟ ਸਿੰਘ ਰੂਪੋਵਾਲੀ, ਭਾਈ ਸੁਬੇਗ ਸਿੰਘ ਧੁੰਨ, ਭਾਈ ਸੁਖਵਿੰਦਰ ਸਿੰਘ, ਭਾਈ ਨਿਰਵੈਲ ਸਿੰਘ, ਦਲਜੀਤ ਸਿੰਘ ਸੋਨੀ, ਲੇਖਕ ਸਕੱਤਰ ਸਿੰਘ ਆਦਿ ਵੀ ਪਹੁੰਚੇ ਸਨ।

ਧੂੰਦਾ ਜੀ ਨੇ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਹਜ਼ੂਰੀ ਵਿੱਚ ਸੰਗਤਾਂ ਨਾਲ ਵੀਚਾਰ ਕਰਦਿਆਂ ਕਿਹਾ ਕਿ ਇਕ ਕੈਦ ਚਾਰ ਦੀਵਾਰੀ ਦੀ ਹੈ, ਕਦੀ ਨਾ ਕਦੀ ਮਨੁੱਖ ਦੋ, ਚਾਰ ਜਾਂ ਕੁੱਝ ਸਾਲਾਂ ਬਾਅਦ ਇਸ ਤੋਂ ਛੁਟਕਾਰਾ ਪਾ ਲੈਂਦਾ ਹੈ, ਪਰ ਦੂਜੇ ਪਾਸੇ ਕੈਦੀ ਉਹ ਲੋਕ ਹਨ ਜਿਨ੍ਹਾਂ ਨੂੰ ਵਹਿਮਾਂ, ਭਰਮਾਂ, ਤੇ ਕਰਮਕਾਂਡਾਂ ਨੇ ਜਕੜ ਰਖਿਆ ਹੈ। ਅਜਿਹੇ ਲੋਕ ਮਾਨਸਿਕ ਤੌਰ ਤੇ ਗੁਲਾਮ ਹੁੰਦੇ ਹਨ, ਤੇ ਇਹ ਗੁਲਾਮੀ ਪੀੜੀ ਦਰ ਪੀੜੀ ਉਤਨਾਂ ਚਿਰ ਤੱਕ ਚਲਦੀ ਰਹਿੰਦੀ ਹੈ। ਜਿੰਨਾਂ ਚਿਰ ਮਨੁੱਖ ਸੱਚੇ ਗੁਰੂ ਦਾ ਲੜ ਨਹੀਂ ਫੜਦਾ, ਇਸ ਗੁਲਾਮੀ ਤੋਂ ਛੁੱਟਕਾਰਾ ਕੇਵਲ ਗੁਰੂ ਦੇ ਸ਼ਬਦ ਦੀ ਵੀਚਾਰ ਦੁਆਰਾ ਹੀ ਪਾਇਆ ਜਾ ਸਕਦਾ ਹੈ।

ਉਨ੍ਹਾਂ ਕਿਹਾ ਕਿ ਕੋਈ ਇਨਸਾਨ ਐਸਾ ਨਹੀਂ, ਜਿਸ ਪਾਸੋਂ ਗਲਤੀ ਨਾ ਹੋਵੇ ਪਰ ਹੋਈਆਂ ਗਲਤੀਆਂ ਤੋਂ ਕੋਈ ਵਿਰਲਾ ਮਨੁੱਖ ਹੀ ਸਬਕ ਲੈ ਕੇ, ਆਪਣਾ ਜੀਵਨ ਸੁਚੱਜਾ ਬਣਾਉਂਦਾ ਹੈ, ਧੂੰਦਾ ਨੇ ਕਿਹਾ ਕਿ ਬਾਹਰ ਲਿਖਿਆ ਹੈ ਸੁਧਾਰ ਘਰ ਤੇ ਬਹੁਤ ਮਨੁੱਖ ਇੱਥੇ ਉਹ ਆਉਂਦੇ ਹਨ, ਜਿਹੜੇ ਆਪਣਾ ਜੀਵਨ ਸੁਧਾਰ ਲੈਂਦੇ ਹਨ। ਕਈ ਉਹ ਵੀ ਹਨ ਜੋ ਜਿਸ ਤਰ੍ਹਾਂ ਆਏ ਉਸੇ ਤਰ੍ਹਾਂ ਹੀ ਚਲੇ ਗਏ। ਇਸ ਮੌਕੇ ਗੁਰਦੁਆਰਾ ਸਾਹਿਬ ਦੇ ਪ੍ਰਧਾਨ ਭਾਈ ਸੁਖਬੀਰ ਸਿੰਘ ਜੀ ਨੇ ਸਭ ਸੰਗਤਾਂ ਨੂੰ ਤੇ ਬਾਹਰੋਂ ਆਏ ਮਹਿਮਾਨਾਂ ਨੂੰ ਜੀ ਆਇਆ ਕਿਹਾ। ਇਸ ਸਮੇਂ ਭਾਈ ਦਲਜੀਤ ਸਿੰਘ ਬਿੱਟੂ, ਸ੍ਰ: ਪਾਲ ਸਿੰਘ ਫਰਾਂਸ, ਸ੍ਰ: ਸੁਖਪਾਲ ਸਿੰਘ, ਭਾਈ ਗੁਰਵਿੰਦਰ ਸਿੰਘ, ਭਾਈ ਤੇਜਬੀਰ ਸਿੰਘ, ਭਾਈ ਸਾਹਿਬਜੀਤ ਸਿੰਘ, ਭਾਈ ਪ੍ਰਹਿਲਾਦ ਸਿੰਘ ਆਦਿ ਮੌਜੂਦ ਸਨ। ਸਮਾਪਤੀ ਤੋਂ ਉਪਰੰਤ ਗੁਰੂ ਕਾ ਲੰਗਰ ਅਤੁੱਟ ਵਰਤਿਆ।

ਰਿਪੋਰਟ: ਭਾਈ ਸੰਦੀਪ ਸਿੰਘ ਖਾਲੜਾ
ਇੰਚਾਰਜ ਗੁਰਮਤਿ ਪ੍ਰਚਾਰ ਕੇਂਦਰ