Main News Page

ਕਾਰਟੇਰਟ-ਨਿਊਯਾਰਕ ਦੇ ਨਜ਼ਦੀਕ ਵਸਦੇ ਅਮਰੀਕਾ ਦੇ ਸ਼ਹਿਰ ਕਾਰਟੇਰਟ ਵਿੱਚ ਪੰਜਾਬੀਆਂ ਵਿਸ਼ੇਸ਼ ਕਰਕੇ ਸਿੱਖ ਭਾਈਚਾਰੇ ਦਾ ਸਤਿਕਾਰ ਭਰਿਆ ਬੋਲਬਾਲਾ ਹੈ। ਇਸਦਾ ਸਭ ਤੋਂ ਮਹੱਤਵਪੂਰਨ ਪਰਮਾਣ ਸ਼ਹਿਰ ਦੇ ਬੋਰੋ ਹਾਲ ਤੇ ਕੇਸਰੀ ਨਿਸ਼ਾਨ ਸਾਹਿਬ ਦਾ ਝੁਲਣਾ ਹੈ। ਭਾਵੇਂ ਕਿ ਕਾਰਟੇਰਟ ਵਿੱਚ ਕੋਈ ਗੁਰਦਵਾਰਾ ਨਹੀਂ ਪਰ ਇਸਦੀ ਹੱਦ ਤੇ ਮੌਜੂਦ 2 ਗੁਰਦਵਾਰਾ ਸਾਹਿਬਾਨ ਜਿਹਨਾਂ ਵਿੱਚ ਸਿੰਘ ਸਭਾ ਅਤੇ ਦਸ਼ਮੇਸ਼ ਦਰਬਾਰ ਆਉਂਦੇ ਹਨ ਜਿਹਨਾਂ ਨੂੰ ਆਮ ਕਰਕੇ ਸਿੱਖ ਭਾਈਚਾਰੇ ਕਾਰਟੇਰਟ ਦੇ ਗੁਰਦਵਾਰੇ ਹੀ ਕਹਿ ਦਿੰਦਾ। ਸਿੱਖ ਭਾਈਚਾਰੇ ਦੀ ਬੋਰੋ ਹਾਲ ਵਿੱਚ ਇੰਨੀ ਜਿਆਦਾ ਇੱਜਤ ਬਣ ਚੁੱਕੀ ਹੈ ਕਿ ਭਾਈਚਾਰੇ ਨਾਲ ਸਬੰਧਤ ਕੀਤੇ ਜਾਣ ਵਾਲੇ ਸਮਾਗਮਾਂ ਲਈ ਜਿੱਥੇ ਪਰਮਿਟ ਮੌਕੇ ਤੇ ਹੀ ਦੇ ਦਿੱਤੇ ਜਾਂਦੇ ਹਨ ਉੱਥੇ ਕਈ ਵਾਰ ਉਹਨਾਂ ਦੀ ਕੋਈ ਫੀਸ ਵੀ ਨਹੀਂ ਲਈ ਜਾਂਦੀ।

ਕਾਰਟੇਰਟ ਪਲਾਨਿੰਗ ਬੋਰਡ ਦੇ ਚੇਅਰਮੈਨ ਸ.ਹਰਦਿਆਲ ਸਿੰਘ ਜੌਹਲ ਨੇ ਦੱਸਿਆ ਕਿ ਅਜਿਹਾ ਹੀ ਪਰਮਿਟ ਬੱਚਿਆਂ ਦੀ ਪਿਕਨਿਕ ਲਈ ਬੋਰੋ ਹਾਲ ਵਲੋਂ 23 ਜੂਨ ਨੂੰ ਦਿੱਤਾ ਗਿਆ। ਬੱਚਿਆਂ ਦੀ ਇਹ ਪਿਕਨਿਕ ਗੁਰਦਵਾਰਾ ਦਸ਼ਮੇਸ਼ ਦਰਬਾਰ ਦੀ ਦਸ਼ਮੇਸ਼ ਅਕੈਡਮੀ ਵਲੋਂ ਕਰਾਈ ਜਾ ਰਹੀ ਹੈ। ਪਿਕਨਿਕ ਦਾ ਸਥਾਨ ਕਾਰਟੇਰਟ ਵਾਟਰ ਫਰੰਟ ਪਾਰਕ ਹੈ ਜਿੱਥੇ ਬੱਚੇ 9 ਵਜੇ ਤੋਂ ਲੈ ਕੇ 3 ਵਜੇ ਤੱਕ ਪਿਕਨਿਕ ਦਾ ਅਨੰਦ ਮਾਨਣਗੇ ਅਤੇ ਨਾਲ ਦੀ ਨਾਲ ਹੀ ਦਰਿਆ ਵਿੱਚ ਲੰਘਦੇ ਅੰਤਰਾਸ਼ਟਰੀ ਸਮੁੰਦਰੀ ਜਹਾਜ਼ਾਂ ਨੂੰ ਵੀ ਦੇਖ ਸਕਣਗੇ। ਸ.ਜੌਹਲ ਨੇ ਦੱਸਿਆ ਕਿ ਕਾਰਟੇਰਟ ਦੇ ਸੀਨੀਅਰ ਪੰਜਾਬੀਆਂ ਵਾਸਤੇ ਵੀ ਇਸੇ ਪਾਰਕ ਵਿੱਚ ਪਿਕਨਿਕ ਰੂਪੀ ਇਕੱਠ ਆਉਣ ਵਾਲੇ ਦਿਨਾਂ ਵਿੱਚ ਕੀਤਾ ਜਾਵੇਗਾ। ਸ.ਜੌਹਲ ਜਿਹੜੇ ਕਿ ਗੁਰਦਵਾਰਾ ਦਸ਼ਮੇਸ਼ ਦਰਬਾਰ ਦੀ ਸੁਪਰੀਮ ਕੌਂਸਲ ਦੇ ਮੈਂਬਰ ਵੀ ਹਨ ਨੇ ਬੋਰੋ ਹਾਲ ਦੇ ਅਧਿਕਾਰੀਆਂ ਦਾ ਧੰਨਵਾਦ ਕੀਤਾ ਹੈ ਜਿਹੜੇ ਕਿ ਸਿੱਖ ਭਾਈਚਾਰੇ ਦੀਆਂ ਲੋੜਾਂ ਨੂੰ ਮਹਿਸੂਸ ਕਰਦੇ ਹੋਏ ਇੰਨਾ ਵੱਧ ਸਹਿਯੋਗ ਦੇ ਰਹੇ ਹਨ।