|
ਗਣਤੰਤਰ ਦਿਵਸ ਮੌਕੇ
ਫ਼ਰੈਂਕਫ਼ਰਟ ਵਿਖੇ, ਸਿੱਖ ਜਥੇਬੰਦੀਆਂ ਨੇ ਕੀਤਾ ਰੋਸ ਮੁਜ਼ਾਹਰਾ
ਕਲੋਨ (ਜਰਮਨੀ), 29 ਜਨਵਰੀ (ਕਾਬਲ ਸਿੰਘ): ਸਿੱਖਾਂ ਨੇ ਗਣਤੰਤਰ ਦਿਹਾੜੇ ਮੌਕੇ
ਭਾਰਤੀ ਕੌਂਸਲੇਟ ਫਰੈਂਕਫ਼ਰਟ ਸਾਹਮਣੇ ਭਾਰੀ ਰੋਸ ਮੁਜ਼ਾਹਰਾ ਕੀਤਾ। ਇਸ ਵਿਚ ਜਰਮਨੀ ਭਰ ਤੋਂ ਸਿੱਖ ਆਗੂ
ਸ਼ਾਮਲ ਹੋਏ। ਉਨ੍ਹਾਂ ਦੋਸ਼ ਲਗਾਏ ਕਿ ਦੇਸ਼ ਦੀ ਆਜ਼ਾਦੀ ਉਪਰੰਤ 26 ਜਨਵਰੀ 1950 ਨੂੰ ਜਿਹੜਾ ਵਿਧਾਨ
ਲਾਗੂ ਕੀਤਾ ਗਿਆ ਸੀ, ਉਸ ਵਿਚ ਸਿੱਖ ਕੌਮ ਨਾਲ ਮਤਰੇਈ ਮਾਂ ਵਾਲਾ ਸਲੂਕ ਕੀਤਾ ਗਿਆ। ਸਿੱਖ ਕੌਮ ਦੀ
ਆਜ਼ਾਦ ਹਸਤੀ ਨੂੰ ਮੰਨਣ ਤੋਂ ਇਨਕਾਰੀ ਹੁੰਦਿਆਂ ਸਿੱਖ ਕੌਮ ਨੂੰ ਧਾਰਾ 25 ਅਨੁਸਾਰ ਹਿੰਦੂ ਧਰਮ ਦਾ
ਹਿੱਸਾ ਬਣਾ ਦਿਤਾ। ਇਸੇ ਕਰ ਕੇ ਉਸ ਸਮੇਂ ਦੇ ਸਿੱਖ ਲੀਡਰਾਂ ਨੇ ਇਸ ਵਿਧਾਨ ’ਤੇ ਰੋਸ ਵਜੋਂ ਅਪਣੇ
ਦਸਤਖਤ ਨਹੀਂ ਕੀਤੇ। ਉਨ੍ਹਾਂ ਕਿਹਾ ਕਿ ਪਿਛਲੇ ਤਿੰਨ ਦਹਾਕਿਆਂ ਤੋਂ ਸਿੱਖ ਕੌਮ ਉਪਰ ਭਾਰਤ ਸਰਕਾਰ
ਵਲੋਂ ਤਸ਼ੱਸਦ ਜਾਰੀ ਹੈ। ਹਰ ਰੋਜ਼ ਨਿਰਦੋਸ਼ ਸਿੱਖ ਨੌਜਵਾਨਾਂ ਨੂੰ ਝੂਠੇ ਕੇਸਾਂ ਵਿਚ ਫਸਾ ਕੇ ਜੇਲਾਂ
ਵਿਚ ਡਕਿਆ ਜਾ ਰਿਹਾ ਹੈ, ਬੰਦੀ ਬਣਾਇਆ ਜਾ ਰਿਹਾ ਹੈ। ਇਸ ਮੌਕੇ
ਸਿੱਖ ਆਗੂਆਂ ਨੇ ਭਾਰਤ ਸਰਕਾਰ ਵਿਰੁਧ ਜ਼ੋਰਦਾਰ ਨਾਹਰੇਬਾਜ਼ੀ ਕੀਤੀ।
ਇਸ ਸਮੇਂ ਸਿੱਖ ਫ਼ੈਡਰੇਸ਼ਨ ਜਰਮਨੀ ਦੇ ਪ੍ਰਧਾਨ ਭਾਈ ਗੁਰਮੀਤ ਸਿੰਘ ਖਨਿਆਣ,
ਬੱਬਰ ਖ਼ਾਲਸਾ ਜਰਮਨੀ ਦੇ ਜਥੇਦਾਰ ਰੇਸ਼ਮ ਸਿੰਘ ਬੱਬਰ, ਦਲ ਖ਼ਾਲਸਾ ਦੇ ਆਗੂ ਅੰਗਰੇਜ਼ ਸਿੰਘ ਤੇ ਹਰਮੀਤ
ਸਿੰਘ, ਸ਼ੋਮਣੀ ਅਕਾਲੀ ਦਲ ਅੰਮ੍ਰਿਤਸਰ ਦੇ ਪ੍ਰਧਾਨ ਭਾਈ ਸੋਹਣ ਸਿੰਘ ਕੰਗ, ਗੁਰਚਰਨ ਸਿੰਘ ਗੁਰਾਇਆ,
ਗੁਰਵਿੰਦਰ ਸਿੰਘ ਗੋਲਡੀ ਬੱਬਰ, ਰਜਿੰਦਰ ਸਿੰਘ ਬੱਬਰ, ਜਤਿੰਦਰਵੀਰ ਸਿੰਘ, ਗੁਰਦਵਾਰਾ ਦਸਮੇਸ਼ ਸਿੰਘ
ਸਭਾ ਕਲੋਨ ਜਰਮਨੀ ਦੇ ਪ੍ਰਧਾਨ ਜਥੇਦਾਰ ਸਤਨਾਮ ਸਿੰਘ, ਜਨਰਲ ਸਕੱਤਰ ਹਰਪਾਲ ਸਿੰਘ, ਗੁਰਦਵਾਰਾ ਸਿੱਖ
ਸੈਂਟਰ ਫ਼ਰੈਂਕਫ਼ਰਟ ਦੇ ਚੇਅਰਮੈਨ ਭਾਈ ਮਨਜੀਤ ਸਿੰਘ ਹੋਠੀ, ਸਾਬਕਾ ਪ੍ਰਧਾਨ ਭਾਈ ਬਲਕਾਰ ਸਿੰਘ,
ਅਵਤਾਰ ਸਿੰਘ ਬੱਬਰ, ਬਾਬਾ ਜਸਬੀਰ ਸਿੰਘ ਤੇ ਗੁਰਪਾਲ ਸਿੰਘ ਨੇ ਸੰਗਤਾਂ ਨਾਲ ਵਿਚਾਰ ਸਾਂਝੇ ਕੀਤੇ।
ਭਾਰਤੀ ਕੌਂਸਲੇਟ ਦੇ ਅਧਿਕਾਰੀ ਹਾਊਸ ਦੇ ਅੰਦਰੋਂ ਹੀ ਮੁਜ਼ਾਹਰਾ ਕਰਨ ਵਾਲਿਆਂ ਦੀਆਂ ਫ਼ਿਲਮਾਂ ਬਣਾ ਰਹੇ
ਸਨ। |
