Main News Page

ਬਠਿੰਡਾ/ਕਿਰਨਜੀਤ ਸਿੰਘ ਰੋਮਾਣਾ: ਡੇਰਾ ਸਿਰਸਾ ਦੇ ਖਿਲਾਫ਼ ਖੁੱਲ ਕੇ ਬੋਲਣ ਵਾਲੇ ਬਾਬਾ ਬਲਜੀਤ ਸਿੰਘ ਦਾਦੂਵਾਲ ਅਤੇ ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਦੀ ਸੋਮਵਾਰ ਰਾਤ ਨੂੰ ਕਮਲਾ ਨਹਿਰੂ ਕਾਲੋਨੀ ਵਿਖੇ ਇੱਕ ਗੁਪਤ ਮੀਟਿੰਗ ਹੋਈ । ਇਹ ਮੀਟਿੰਗ ਐਨੀ ਗੁਪਤ ਸੀ ਕਿ ਕਿਸੇ ਵੀ ਵਿਅਕਤੀ ਨੂੰ ਇਸ ਭਿਣਕ ਨਹੀਂ ਪੈਣ ਦਿੱਤੀ ।

ਪੁਖਤਾ ਸੂਤਰਾਂ ਮੁਤਾਬਿਕ ਪਤਾ ਲੱਗਾ ਕਿ ਇਸ ਬੈਠਕ ਦੌਰਾਨ ਸੰਤ ਦਾਦੂਵਾਲ ਅਤੇ ਡਿਪਟੀ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਦੀ ਕੁਝ ਮਾਮਲਿਆਂ ਵਿੱਚ 'ਆਪਸੀ ਰਜ਼ਾਮੰਦੀ' ਹੋ ਗਈ ਹੈ।

ਸੂਤਰ ਦੱਸਦੇ ਹਨ ਕਿ ਉੱਪ ਮੁੱਖ ਮੰਤਰੀ ਨੇ ਸੰਤ ਦਾਦੂਵਾਲ ਨੂੰ ਆਪਣੀ ਸੁਰ ਨੀਵੀ ਰੱਖਣ ਲਈ ਕਿਹਾ ਅਤੇ ਸੰਤ ਦਾਦੂਵਾਲ ਨੇ ਕਿਹਾ ਪੰਜਾਬ ਵਿੱਚ ਸਿੱਖਾਂ ਨੂੰ ਆਪਣਾ ਪ੍ਰਚਾਰ ਕਰਨ ਲਈ ਹੀ ਪਾਬੰਦੀਆਂ ਕਿਉਂ ਲਾਈਆਂ ਗਈਆਂ ਹਨ। ਜਦੋ ਸੰਤ ਦਾਦੂਵਾਲ ਨੇ ਭੀਖੀ ਕਾਂਡ ਵਿੱਚ ਸਿੱਖਾਂ ਉਪਰ ਲਾਠੀਚਾਰਜ ਕਰਨ ਅਤੇ ਡੇਰਾ ਸਿਰਸਾ ਦੇ ਪ੍ਰੇਮੀਆਂ ਨੂੰ ਨਾਮ ਚਰਚਾ ਕਰਵਾਉਣ ਲਈ ਸੁਰੱਖਿਆ ਸਬੰਧੀ ਗੱਲ ਕੀਤੀ ਤਾਂ ਮਾਨਯੋਗ ਉਪ ਮੁੱਖ ਮੰਤਰੀ ਨੇ ਇਹ ਕਹਿਕੇ ਗੱਲ ਸਮਾਪਤ ਕਰ ਦਿੱਤੀ ਕਿ ਉਸ ਸਮੇਂ ਦੌਰਾਨ ਉਹ ਵਿਦੇਸ਼ ਵਿੱਚ ਸਨ।

ਨੇੜੇ ਆਉਂਦੀਆਂ ਸ਼ਰੋਮਣੀ ਕਮੇਟੀ ਚੋਣਾਂ ਨੂੰ ਹਰ ਹਾਲਤ ਵਿੱਚ ਜਿੱਤਣ ਦੀ ਗੱਲ ਕਰਦਿਆਂ ਸੁਖਬੀਰ ਬਾਦਲ ਨੇ ਸੰਤ ਦਾਦੂਵਾਲ ਤੋਂ ਸਹਿਯੋਗ ਦੀ ਮੰਗ ਵੀ ਕੀਤੀ ਅਤੇ ਭਵਿੱਖ ਵਿੱਚ ਆਪਣੀ 'ਸੁਰ ' ਨੀਵੀ ਰੱਖਣ ਲਈ ਕਿਹਾ।

ਸੂਚਨਾ ਹੈ ਕਿ ਸੰਤ ਦਾਦੂਵਾਲ ਨੇ ਇਸ ਬਾਰੇ ਸਹਿਮਤੀ ਦਿੰਦਿਆ ਕਿਹਾ ਕਿ ਉਹ ਪੰਥਕ ਪ੍ਰਚਾਰ ਕਰ ਰਹੇ ਹਨ ਅਤੇ ਕਿਸੇ ਵੀ ' ਵਿਅਕਤੀ' ਦੇ ਖਿਲਕਾਫ਼ ਨਿੱਜੀ ਰੂਪ ਵਿੱਚ ਵਿਰੋਧ ਨਹੀਂ ਕਰਨਗੇ। ਇਸ ਗੁਪਤ ਸਮਝੌਤਾ ਦੇ ਅਸਰ ਦਾ ਆਉਣ ਵਾਲੇ ਦਿਨਾਂ ਵਿੱਚ ਪ੍ਰਤੱਖ ਰੂਪ ਵਿੱਚ ਸਾਹਮਣੇ ਆ ਜਾਣ ਦੀ ਸੰਭਾਵਨਾ ਹੈ।

Source: ਪੰਜਾਬੀ ਨਿਊਜ਼ ਆਨਲਾਈਨ