Main News Page

ਪੰਜਾਬ ਦੇ ਧਰਤੀ ਤੇ ਸਿੱਖਾਂ ਦੇ ਧਾਰਮਿਕ ਸਮਾਗਮ ਰੋਕਣ ਲਈ ਬਜ਼ਿੱਦ ਸੌਦਾ ਸਾਧ ਦੀ ਜ਼ਿੱਦ ਦੇ ਚੱਲਦਿਆਂ, ਪੁਲਿਸ ਵਲੋਂ ਬੀਤੇ ਦਿਨ ਸੰਤ ਬਲਜੀਤ ਸਿੰਘ ਦਾਦੂਵਾਲ ਦੇ ਸਮਾਗਮ 'ਚ ਸਪੀਕਰ ਚੱਲਣੋਂ ਬੰਦ ਕਰ ਦਿੱਤੇ ਗਏ

ਬਠਿੰਡਾ, 2 ਜਨਵਰੀ (ਪੀ.ਐਸ.ਐਨ): ਵੋਟ ਰਾਜਨੀਤੀ ਦੀ ਸ਼ਿਕਾਰ ਬਾਦਲ ਸਰਕਾਰ ਨੇ ਇੱਕ ਵਾਰ ਫਿਰ ਸੌਦਾ ਸਾਧ ਅੱਗੇ ਗੋਡੇ ਟੇਕਦਿਆਂ, ਸਿੱਖਾਂ ਤੇ ਤਸ਼ੱਦਦ ਦਾ ਇੱਕ ਹੋਰ ਨਵਾਂ ਘਿਨੌਣਾ ਕਾਂਡ, ਭਿਖੀ ਦੇ ਧਰਤੀ ਤੇ ਵਰਤਾ ਦਿੱਤਾ। ਪੰਜਾਬ ਦੇ ਧਰਤੀ ਤੇ ਸਿੱਖਾਂ ਦੇ ਧਾਰਮਿਕ ਸਮਾਗਮ ਰੋਕਣ ਲਈ ਬਜ਼ਿੱਦ ਸੌਦਾ ਸਾਧ ਦੀ ਜ਼ਿੱਦ ਦੇ ਚੱਲਦਿਆਂ, ਪੁਲਿਸ ਵਲੋਂ ਬੀਤੇ ਦਿਨ ਸੰਤ ਬਲਜੀਤ ਸਿੰਘ ਦਾਦੂਵਾਲ ਦੇ ਸਮਾਗਮ 'ਚ ਸਪੀਕਰ ਚੱਲਣੋਂ ਬੰਦ ਕਰ ਦਿੱਤੇ ਗਏ ਅਤੇ ਅੱਜ ਸਵੇਰੇ ਦਾਦੂਵਾਲ ਨੂੰ ਕਥਾ ਕੀਰਤਨ ਤੋਂ ਰੋਕਣ ਲਈ ਗ੍ਰਿਫ਼ਤਾਰ ਕਰ ਲਿਆ ਗਿਆ, ਜਿਸ ਤੋਂ ਭੜਕੇ ਸਿੱਖਾਂ ਵਲੋਂ ਕੀਤੇ ਚੱਕਾ ਜਾਮ ਨੂੰ ਬਹਾਨਾ ਬਣਾਕੇ, ਪੁਲਿਸ ਨੇ ਜਿਥੇ ਸਿੱਖ ਸੰਗਤਾਂ ਤੇ ਅੰਨੇਵਾਹ ਕੁਟਾਪਾ ਚਾੜਿਆ ਕੜਾਕੇ ਦੀ ਠੰਡ 'ਚ ਪਾਣੀ ਦੀ ਵਾਛੜ ਕੀਤੀ ਗਈ, ਉਥੇ ਹਵਾਈ ਫਾਈਰਿੰਗ ਵੀ ਕੀਤੀ ਗਈ। ਤਸ਼ੱਦਦ ਦੇ ਸ਼ਿਕਾਰ ਹੋਏ ਸਿੱਖਾਂ ਦੀ ਹਮਦਰਦੀ 'ਚ ਸੰਗਤਾਂ ਨੂੰ ਆਉਣ ਤੋਂ ਰੋਕਣ ਲਈ ਭਿਖੀ ਕਸਬੇ 'ਚ ਕਰਫਿਊ ਲਾ ਦਿੱਤਾ ਗਿਆ। ਸਰਕਾਰ ਦੀ ਇਸ ਸਿੱਖ ਵਿਰੋਧੀ ਨੀਤੀ ਕਾਰਣ ਸਮੁੱਚੇ ਸਿੱਖ ਜਗਤ 'ਚ ਭਾਰੀ ਰੋਸ ਹੈ ਅਤੇ ਭਲਕੇ, ਸਿੱਖਾਂ ਵਲੋਂ ਇਸ ਕਾਂਡ ਦਾ ਵਿਰੋਧ ਕਰਨ ਲਈ ਕੋਈ ਯੋਜਨਾ ਉਲੀਕਣ ਲਈ ਅੰਦਰ ਖਾਤੇ ਤਿਆਰੀ ਚੱਲ ਰਹੀ ਦੱਸੀ ਜਾਂਦੀ ਹੈ।

ਬੀਤੇ ਤਿੰਨ ਦਿਨਾਂ ਤੋਂ ਸਿੱਖ ਸ਼ਰਧਾਲੂ ਸੰਤ ਬਲਜੀਤ ਸਿੰਘ ਦਾਦੂਵਾਲ ਵੱਲੋਂ ਭਿੱਖੀ ਵਿੱਚ ਧਾਰਮਿਕ ਦੀਵਾਨ ਸਜਾਏ ਜਾ ਰਹੇ ਸਨ ਜਿਹਨਾਂ ਨੂੰ ਤਾਰਪੀਡੋ ਕਰਨ ਲਈ ਡੇਰਾ ਪ੍ਰੇਮੀਆਂ ਵੱਲੋਂ ਵਿਰੋਧ ਕੀਤਾ ਜਾ ਰਿਹਾ ਸੀ ਤੇ ਬੀਤੇ ਦਿਨ ਪੁਲਿਸ ਵਲੋਂ ਧਾਰਮਿਕ ਦੀਵਾਨ ਵਿੱਚ ਦਖਲ ਦੇ ਕੇ ਤਾਰਾਂ ਪੱਟਣ ਤੋਂ ਬਾਅਦ ਅੱਜ ਮਾਹੌਲ ਉਸ ਸਮੇਂ ਹੋਰ ਟਕਰਾਅ ਵੱਲ ਵੱਧ ਗਿਆ ਜਦੋਂ ਪੁਲਿਸ ਨੇ ਸੰਤ ਬਲਜੀਤ ਸਿੰਘ ਦਾਦੂਵਾਲ ਨੂੰ ਗ੍ਰਿਫਤਾਰ ਕਰ ਲਿਆ ਤੇ ਉਹਨਾਂ ਦੀ ਰਿਹਾਈ ਨੂੰ ਲੈਕੇ ਸਿੱਖ ਵਰਕਰਾਂ ਵੱਲੋਂ ਮਾਨਸਾ ਰੋਡ ਤੇ ਜਾਮ ਲਾ ਦਿੱਤਾ ਪਰੰਤੂ ਪੁਲਿਸ ਵੱਲੋਂ ਬਿਨਾਂ ਕਿਸੇ ਕਾਰਨ ਸਿੱਖ ਸੰਗਤਾਂ ਤੇ ਕੀਤੇ ਗਏ ਲਾਠੀਚਾਰਜ ਨਾਲ ਮਾਹੌਲ ਭੜਕ ਉਠਿਆ ਜਿਸ ਵਿੱਚ ਜਾਣਕਾਰੀ ਅਨੁਸਾਰ ਸਿਖ ਵਰਕਰ ਜਖਮੀ ਹੋ ਗਏ ਤੇ ਪੁਲਿਸ ਨੇ ਜਿੱਥੇ ਲਾਠੀਚਾਰਜ ਦਾ ਸਹਾਰਾ ਲਿਆ ਉਥੇ ਹੀ ਹਵਾਈ ਫਾਇਰਿੰਗ ਵੀ ਕੀਤੀ ਗਈ। ਜਾਣਕਾਰੀ ਦਿੰਦੇ ਹੋਏ ਸਿੱਖ ਵਰਕਰ ਗੁਰਸੇਵਕ ਸਿੰਘ ਜਵਾਰਕੇ ਤੇ ਗੁਰਪ੍ਰੀਤ ਸਿੰਘ ਝਿਬਰ ਅਤੇ ਗੁਰਦੁਆਰਾ ਕਮੇਟੀ ਦੇ ਆਗੂ ਕਾਲਾ ਸਿੰਘ ਆਰੇਵਾਲਾ, ਪਰਮਜੀਤ ਸਿੰਘ ਭਿੱਖੀ, ਜੀਵਨ ਸਿੰਘ ਨੇ ਦੱਸਿਆ ਕਿ ਸੰਤ ਬਲਜੀਤ ਸਿੰਘ ਦਾਦੂਵਾਲ ਵਲੋਂ ਸ਼ਾਂਤ ਮਈ ਦੀਵਾਨ ਸਜਾਏ ਜਾ ਰਹੇ ਸਨ ਪਰ ਪ੍ਰੇਮੀਆਂ ਵੱਲੋਂ ਜਾਣਬੁੱਝ ਕੇ ਦੀਵਾਨਾਂ ਵਿੱਚ ਦਖਲ ਦੇਣ ਤੇ ਮਾਹੋਲ ਤਨਾਅਪੂਰਣ ਦੀ ਕੋਸ਼ਿਸ਼ ਕੀਤੀ ਗਈ ਤੇ ਪਿਲਸ ਨੇ ਸਿੱਖ ਵਰਕਰਾਂ ਦੀ ਸੁਰੱਖਿਆ ਕਰਨ ਦੀ ਬਜਾਏ ਪ੍ਰੇਮੀਆਂ ਦਾ ਸਾਥ ਦਿੰਦੇ ਹੋਏ ਸਿੱਖਾਂ ਤੇ ਬਿਨਾਂ ਵਜਾ ਜਾਣਬੁੱਝ ਕੇ ਲਾਠੀਚਾਰਜ ਕੀਤਾ ਗਿਆ ਜਿਸ ਲਈ ਸਿਧੇ ਤੌਰ ਤੇ ਪੰਜਾਬ ਸਰਕਾਰ ਤੇ ਪਿਲਸ ਪ੍ਰਸਾਸਨ ਜਿੰਮੇਵਾਰ ਹੈ ਤੇ ਇਸ ਮੌਕੇ ਪੁਲਿਸ ਨੇ ਗੋਲੀਆਂ ਵੀ ਚਲਾਈਆਂ ਜਿਸ ਵਿੱਚ ਕਈ ਸਿੱਖ ਵਰਕਰ ਜਖਮੀ ਹੋ ਗਏ।

ਇਸ ਮੌਕੇ ਤੇ ਆਈ ਜੀ ਨਿਰਮਲ ਸਿੰਘ ਢਿੱਲੋਂ, ਡੀ ਆਈ ਜੀ ਲੋਕ ਨਾਥ ਆਂਗਰਾ ਤੇ ਐਸ ਐਸ ਪੀ ਹਰਦਿਆਲ ਸਿੰਘ ਮਾਨ ਦੀ ਅਗਵਾਈ ਵਿੱਚ ਭਾਰੀ ਤਦਾਦ ਵਿੱਚ ਪੁਲਿਸ ਫੋਰਸ ਨੇ ਸਥਿਤੀ ਨੂੰ ਕੰਟਰੋਲ ਕਰਨ ਅਤੇ ਅਮਨ ਸ਼ਾਂਤੀ ਬਣਾਈ ਰੱਖਣ ਲਈ ਭਿੱਖੀ ਕਸਬੇ ਵਿੱਚ ਕਰਫਿਊ ਲਾ ਦਿੱਤੀ ਤੇ ਭਿੱਖੀ ਨੂੰ ਆਉਣ ਜਾਣ ਵਾਲੇ ਸਾਰੇ ਰਸਤੇ ਸੀਲ ਕਰਦਿਆਂ ਸੁਰੱਖਿਆ ਵਧਾ ਦਿੱਤੀ ਗਈ। ਮਿਲੀ ਜਾਣਕਾਰੀ ਅਨੁਸਾਰ ਡੇਰਾ ਪ੍ਰੇੇਮੀਆਂ ਦੇ ੨੫ ਮੈਂਬਰੀ ਕਮੇਟੀ ਆਗੂ ਗਿਆਨ ਚੰਦ ਭਿੱਖੀ, ਸੂਰਜ ਭਾਨ ਦਾ ਕਹਿਣਾ ਸੀ ਕਿ ਸੰਤ ਬਲਜੀਤ ਸਿੰਘ ਦਾਦੂਵਾਲ ਜਾਣਬੁੱਝ ਕੇ ਮਾਹੌਲ ਤਨਾਅਪੂਰਣ ਕਰਨ ਲਈ ਧਾਰਮਿਕ ਦੀਵਾਨਾਂ ਵਿੱਚ ਡੇਰਾ ਮੁਖੀ ਦੇ ਖਿਲਾਫ ਗਲਤ ਸ਼ਬਦਾਵਲੀ ਦੀ ਵਰਤੋ ਕਰਦਾ ਹੈ ਜਿਸ ਨਾਲ ਸ਼ਰਧਾਲੂਆਂ ਦੀਆਂ ਭਾਵਨਾਵਾਂ ਨੂੰ ਠੇਸ ਪਹੁੰਚਦੀ ਹੈ ਤੇ ਇਸੇ ਕਾਰਨ ਉਹਨਾਂ ਵੱਲੋਂ ਵਿਰੋਧ ਕੀਤਾ ਗਿਆ ਸੀ। ਆਈ ਜੀ ਨਿਰਮਲ ਸਿੰਘ ਸੰਧੂ ਨੇ ਦੱਸਿਆ ਕਿ ਅਮਨ ਸ਼ਾਂਤੀ ਬਣਾਈ ਰੱਖਣ ਲਈ ਪੁਲਿਸ ਨੇ ਹਲਕਾ ਲਾਠੀਚਾਰਜ ਕੀਤਾ ਤੇ ਕਰਫਿਊ ਲਾਇਆ ਗਿਆ ਹੈ । ਉਥੇ ਹੀ ਊਹਨਾਂ ਦੱਸਿਆ ਕਿ ਛੇ ਪੁਲਿਸ ਕਰਮਚਾਰੀ ਗੰਭੀਰ ਜਖਮੀ ਹੋਏ ਹਨ ਤੇ ਦੋ ਦਰਜਨ ਤੋਂ ਵੱਧ ਸਿੱਖ ਵਰਕਰ ਗ੍ਰਿਫਤਾਰ ਕੀਤੇ ਗਏ ਹਨ ਤੇ ਹੁਣ ਸਥਿਤੀ ਕੰਟਰੋਲ ਅਧੀਨ ਹੈ।

ਭੀਖੀ ਵਿਖੇ ਸਿੱਖ ਕਾਰਕੁੰਨਾਂ ਤੇ ਪੁਲਿਸ ਵੱਲੋਂ ਕੀਤੇ ਵਹਿਸ਼ੀ ਤਸੱਦਦ ਦੀ ਸਖਤ ਨਿਖੇਧੀ ਕਰਦਿਆਂ ਅਕਾਲੀ ਦਲ ਅਮ੍ਰਿਤਸਰ ਦੇ ਪ੍ਰਧਾਨ ਸ੍ਰ: ਸਿਮਰਨਜੀਤ ਸਿੰਘ ਮਾਨ ਦੋਸ਼ ਲਾਇਆ ਕਿ ਡੇਰਾਵਾਦ ਨੂੰ ਪ੍ਰਫੁੱਲਤ ਕਰਕੇ ਰਾਜ ਦੀ ਬਾਦਲ ਸਰਕਾਰ ਪੰਜਾਬ ਨੂੰ ਮੁੜ ੧੯੭੮ ਵਰਗੇ ਹਾਲਾਤ ਵੱਲ ਧੱਕ ਰਹੀ ਹੈ। ਇਸ ਪੱਤਰਕਾਰ ਨਾਲ ਫੋਨ ਤੇ ਗੱਲਬਾਤ ਕਰਦਿਆਂ ਸ੍ਰ: ਮਾਨ ਨੇ ਇਸ ਤੱਥ ਤੇ ਡਾਢੀ ਨਰਾਜਗੀ ਪ੍ਰਗਟ ਕੀਤੀ ਕਿ ਇੱਕ ਪਾਸੇ ਪੁਲਿਸ ਪ੍ਰਸਾਸਨ ਨੇ ਬਾਦਲ ਸਰਕਾਰ ਦੀਆਂ ਹਦਾਇਤਾਂ ਤੇ ਅਮਲ ਕਰਦਿਆਂ ਕੱਲ ਸਪੀਕਰ ਦੀਆਂ ਤਾਰਾਂ ਪੁੱਟ ਕੇ ਸੰਤ ਬਲਜੀਤ ਸਿੰਘ ਦਾਦੂਵਾਲ ਵੱਲੋਂ ਲਾਏ ਧਾਰਮਿਕ ਦੀਵਾਨ ਨੂੰ ਭੰਗ ਕਰਨ ਦਾ ਸਰਮਨਾਕ ਕਾਰਾ ਕੀਤਾ, ਦੂਜੇ ਪਾਸੇ ਅੱਜ ਡੇਰਾ ਸੱਚਾ ਸੌਦਾ ਦੇ ਪ੍ਰੇਮੀਆਂ ਦੀ ਆਪਣੀ ਸੁਰੱਖਿਆ ਹੇਠ ਨਾਮਚਰਚਾ ਕਰਵਾ ਕੇ ਸਿੱਖਾਂ ਦੇ ਜਖ਼ਮਾਂ ਤੇ ਨਮਕ ਭੁੱਕਣ ਦਾ ਕੰਮ ਕੀਤੈ। ਮਾਨ ਨੇ ਵਿਚਾਰ ਪ੍ਰਗਟ ਕੀਤਾ ਕਿ ਅਜਿਹੀ ਗੈਰ ਪੇਸੇਵਾਰਾਨਾ ਤੇ ਗੈਰ ਜੁਮੇਵਾਰੀ ਵਾਲੀ ਕਾਰਵਾਈ ਤੋਂ ਇਲਾਵਾ ਜੇ ਪੁਲਿਸ ਸੰਤ ਦਾਦੂਵਾਲ ਦੀ ਬੇਲੋੜੀ ਗਿਰਫਤਾਰੀ ਨਾ ਕਰਦੀ, ਤਾਂ ਭੀਖੀ ਵਿਖੇ ਸਿੱਖ ਸੰਗਤਾਂ ਨੇ ਬੇਕਾਬੂ ਨਹੀਂ ਸੀ ਹੋਣਾ। ਇਸ ਸਾਰੇ ਵਰਤਾਰੇ ਦੀ ਬਾਦਲ ਸਰਕਾਰ ਨੂੰ ਦੋਸ਼ੀ ਕਰਾਰ ਦਿੰਦਿਆਂ ਸ੍ਰ: ਮਾਨ ਨੇ ਕਿਹਾ ਕਿ ਡੇਰੇਦਾਰਾਂ ਦੀਆਂ ਵੋਟਾਂ ਹਾਸਲ ਕਰਨ ਲਈ ਉਹ ਉਹਨਾਂ ਨੂੰ ਪਰਚਾਅ ਰਹੀ ਹੈ। ਰੈਡੀਕਲ ਸਿੱਖ ਆਗੂ ਨੇ ਕਿਹਾ ਕਿ ਪਿਛਲੇ ਅਰਸੇ ਦੌਰਾਨ ਸਿੱਖ ਭਾਈਚਾਰਾ ਪਹਿਲਾਂ ਹੀ ਅਣਕਿਆਸੇ ਸੰਤਾਪ ਹੰਢਾ ਚੁੱਕਾ ਹੈ, ਜਿਸਦੀ ਸੁਰੂਆਤ ਵੀ ਉਸ ਵੇਲੇ ਦੀ ਬਾਦਲ ਸਰਕਾਰ ਨੇ ਅਮ੍ਰਿਤਸਰ ਵਿਖੇ ਨਿਰੰਕਾਰੀਆਂ ਨੂੰ ਸਮਾਗਮ ਆਯੋਜਿਤ ਕਰਨ ਦੀ ਇਜਾਜਤ ਦੇ ਕੇ ਕੀਤੀ ਸੀ, ਜਿੱਥੋਂ ਪੰਜਾਬ ਦੇ ਦੁਖਾਂਤ ਦਾ ਮੁੱਢ ਬੱਝਿਆ ਸੀ।

Source: Punjab Spectrum