ਜਦੋਂ
ਦਾ ਕਰੋਨਾ ਨੇ ਕਹਿਰ ਢਾਹਿਆ ਹੈ, ਧਰਮ ਦੇ ਨਾਮ 'ਤੇ ਪਖੰਡ ਦਾ ਬੋਲਬਾਲਾ ਵੀ ਨਾਲ ਹੀ
ਚੱਲਿਆ ਹੈ।
ਧਰਮ ਦਾ ਸੰਬੰਧ ਮਨ ਨਾਲ ਹੈ, ਪਰ ਇਸ
ਸੱਚਾਈ ਨੂੰ ਕਿਸੇ ਵੀ ਮਜ਼ਹਬ ਦੇ ਪੈਰੋਕਾਰਾਂ ਨੇ ਸਮਝਿਆ ਨਹੀਂ । ਉਨ੍ਹਾਂ ਨੇ ਆਪਣੇ
ਆਪਣੇ ਕਰਮਕਾਂਡਾਂ ਨਾਲ ਇਸ ਕਹਿਰ ਨੂੰ ਰੋਕਣ ਲਈ ਪਖੰਡ ਸ਼ੁਰੂ ਕੀਤੇ।
ਹਿੰਦੂ ਹਵਨ ਅਤੇ ਗਾਂ ਦੇ ਮੂਤ ਗੋਹੇ ਨਾਲ ਇਸਨੂੰ ਰੋਕਣ ਦੇ
ਦਾਅਵੇ ਕਰਣ ਲੱਗ ਪਏ, ਸਿੱਖ ਅਖਵਾਉਣ ਵਾਲੇ ਅਖੰਡ ਪਾਠ
ਕਰਣ ਲੱਗ ਪਏ। ਗੁਰਬਾਣੀ ਜੀਵਨ ਸੇਧ ਦੇਣ ਲਈ ਹੈ, ਮਨ ਨੂੰ ਸਾਧਣ ਲਈ ਹੈ, ਕੋਈ
ਜਾਦੂ ਮੰਤਰ ਨਹੀਂ, ਜਿਸ ਨਾਲ ਕੋਈ ਸ਼ਰੀਰਕ ਬੀਮਾਰੀ ਦੂਰ ਹੋਵੇ।
ਜਿਹੜੇ ਵੀ ਇਹ ਪਖੰਡ ਕਰ ਰਹੇ ਨੇ ਉਹ
ਚੀਨ ਦੇ ਵੁਹਾਨ ਸ਼ਹਿਰ ਜਾਣ ਅਤੇ ਇਹ ਸਭ ਕੁੱਝ ਕਰਕੇ ਦਿਖਾਉਣ। ਪਰ ਇਹ ਸਭ ਇਨ੍ਹਾਂ
ਨੇ ਲੋਕਾਂ ਨੂੰ ਬੁੱਧੂ ਬਣਾਉਣ ਲਈ ਕਰਨਾ ਹੈ, ਜਿਸ ਨਾਲ ਇਨ੍ਹਾਂ ਕਥਤਿ ਧਾਰਮਿਕ ਕਰਮਕਾਂਡਾਂ
ਨਾਲ ਇਨ੍ਹਾਂ ਦਾ ਤੋਰੀ ਫੁਲਕਾ ਚਲਦਾ ਰਹੇ।
ਗੁਰਬਾਣੀ ਵਿੱਚ ਮਹਲਾ 1 ਅਸਟਪਦੀਆ ਅਧੀਨ
ਗੁਰੂ ਸਾਹਿਬ ਇਹ ਆਖਦੇ ਹਨ:
ਕੋਟੀ ਹੂ ਪੀਰ ਵਰਜਿ ਰਹਾਏ ਜਾ ਮੀਰੁ ਸੁਣਿਆ ਧਾਇਆ ॥
ਥਾਨ ਮੁਕਾਮ ਜਲੇ ਬਿਜਮੰਦਰ ਮੁਛਿ ਮੁਛਿ ਕੁਇਰ ਰੁਲਾਇਆ ॥
ਕੋਈ ਮੁਗਲੁ ਨ ਹੋਆ ਅੰਧਾ ਕਿਨੈ ਨ ਪਰਚਾ ਲਾਇਆ
॥ {ਪੰਨਾ 417-418}
ਜਦੋਂ ਪਠਾਣ ਹਾਕਮਾਂ ਨੇ ਸੁਣਿਆ ਕਿ ਮੀਰ ਬਾਬਰ ਹੱਲਾ ਕਰ ਕੇ (ਵਗਾ ਤਗ) ਆ ਰਿਹਾ ਹੈ, ਤਾਂ
ਉਹਨਾਂ ਅਨੇਕਾਂ ਹੀ ਪੀਰਾਂ ਨੂੰ (ਜਾਦੂ ਟੂਣੇ ਕਰਨ ਲਈ) ਰੋਕ ਰੱਖਿਆ। (ਪਰ ਉਹਨਾਂ ਦੀਆਂ
ਤਸਬੀਆਂ ਫਿਰਨ ਤੇ ਭੀ) ਪੱਕੇ ਥਾਂ ਮੁਕਾਮ ਪੱਕੇ ਮਹਲ (ਮੁਗ਼ਲਾਂ ਦੀ ਲਾਈ ਅੱਗ ਨਾਲ) ਸੜ
(ਕੇ ਸੁਆਹ ਹੋ) ਗਏ। ਉਹਨਾਂ ਨੇ ਪਠਾਣ ਸ਼ਾਹਜ਼ਾਦਿਆਂ ਨੂੰ ਟੋਟੇ ਕਰ ਕਰ ਕੇ (ਮਿੱਟੀ ਵਿਚ)
ਰੋਲ ਦਿੱਤਾ। (ਪੀਰਾਂ ਦੀਆਂ ਤਸਬੀਆਂ ਨਾਲ) ਕੋਈ ਇੱਕ ਭੀ
ਮੁਗ਼ਲ ਅੰਨ੍ਹਾ ਨਾ ਹੋਇਆ, ਕਿਸੇ ਭੀ ਪੀਰ ਨੇ ਕੋਈ ਕਰਾਮਾਤ ਕਰ ਨਾ ਵਿਖਾਈ।4।
ਕੀ ਅਖੰਡ ਪਾਠ ਕਰਣ ਵਾਲੇ ਇਸ ਪੰਕਤੀ ਨੂੰ ਪੜ੍ਹਦੇ ਸਮਝਦੇ ਨਾ
ਹੋਣਗੇ? ਜੇ ਸਮਝਦੇ ਹੁੰਦੇ ਤਾਂ ਅਮਲ ਕਰਦੇ ਸਿਰਫ ਪਾਠ ਹੀ ਨਾ ਕਰਦੇ। ਪਾਠ ਦਾ
ਮਤਲਬ ਹੈ Lesson, ਕਿ ਇਸ ਤੋਂ ਕੋਈ ਸੇਧ ਲਈ ਜਾਵੇ। ਪਰ ਅਫਸੋਸ ਸਿੱਖ ਅਖਵਾਉਣ ਵਾਲੇ ਵੀ
ਸਿਰਫ ਪਖੰਡ ਹੀ ਕਰ ਰਹੇ ਹਨ, ਕੋਈ ਅਕਲ ਵਾਲੀ ਗੱਲ ਨਹੀਂ ਕਰ ਰਹੇ।
ਕਰੋਨਾ ਜਾਂ ਹੋਰ
ਕਿਸੇ ਵੀ ਮਹਾਂਮਾਰੀ ਦਾ ਇਲਾਜ... ਪਰਹੇਜ਼, ਜਾਂਚ ਅਤੇ ਦਵਾਈਆਂ ਨਾਲ ਹੀ ਹੋ ਸਕਦਾ
ਹੈ, ਕਿਸੇ ਵੀ ਕਥਿਤ ਧਾਰਮਿਕ ਪਖੰਡ ਨਾਲ ਨਹੀਂ।