ਰਾਜਨੀਤੀ ਦਾ ਗੁਰਦੁਆਰਿਆਂ ਦੇ ਪ੍ਰਬੰਧ ਵਿਚ ਅੰਨ੍ਹੀ
ਦਖਲਅੰਦਾਜ਼ੀ ਕਾਰਨ ਹੀ ਸਿੱਖ ਕੌਮ ਧੜੇਬੰਦੀ ਅਤੇ ਗੁਰਮਤਿ ਪ੍ਰਚਾਰ ਵਿਚ ਘਾਟ ਆਈ ਹੈ
ਗੁਰਦੁਆਰਿਆਂ
ਦੇ ਪ੍ਰਬੰਧ ਰਾਹੀਂ ਰਾਜਨੀਤੀ ਦੀਆਂ ਪਉੜੀਆਂ ਚੜ੍ਹਨ ਦੇ ਮਾੜੇ ਰੁਝਾਨ ਨੇ ਸਿਖ ਕੌਮ ਵਿਚ ਧੜੇਬੰਦੀ
ਅਤੇ ਗੁਰਮਤਿ ਦੇ ਪ੍ਰਚਾਰ ਨੂੰ ਵੱਡੀ ਢਾਹ ਲਾਈ ਹੈ। ਵਿਰਲੀਆਂ ਥਾਵਾਂ
ਹੀ ਹੋਣਗੀਆਂ ਜਿਥੇ ਗੁਰਦੁਆਰਿਆਂ ਵਿਚ ਧੜੇਬੰਦੀਆਂ ਨਾ ਹੋਣ ਅਤੇ ਗੁਰਮਤਿ ਦਾ ਪ੍ਰਚਾਰ ਸਹੀ ਅਰਥਾਂ
ਵਿਚ ਹੋ ਰਿਹਾ ਹੋਵੇ। ਨਹੀਂ ਤਾਂ ਸਾਰਾ ਕੌਮੀ ਪ੍ਰਬੰਧ ਹੀ ਅਜਿਹੀ
ਕਮਜ਼ੋਰੀ ਦਾ ਸ਼ਿਕਾਰ ਹੋ ਚੁੱਕਾ ਹੈ ਕਿ ਸਿਖ ਪੰਥ ‘ਗੁਰਮੁਖਿ ਬੈਸਹੁ ਸਫਾ ਵਿਛਾਇ’ ਦੀ ਥਾਂ ਤੇ ‘ਆਪੋ
ਧਾਪੀ ਹੋਇ ਕੇ ਨਿਆਰੇ ਨਿਆਰੇ ਧਰਮ ਚਲਾਵੈ’ ਵਰਗੀ ਕਮਜ਼ੋਰੀ ਦਾ ਸ਼ਿਕਾਰ ਹੋਇਆ ਪਿਆ ਹੈ ਅਤੇ ਗੁਰਮਤਿ
ਦੀ ਥਾਂ ਮਨਮਤਿ ਅਮਰਵੇਲ ਵਾਂਗ ਛਾਈ ਜਾ ਰਹੀ ਹੈ। ਇਸ ਸਭ ਕੁਝ ਦਾ
ਵੱਡਾ ਜ਼ਿਮੇਵਾਰ ਗੁਰਦੁਆਰਿਆਂ ਦਾ ਸਿਆਸੀਕਰਨ ਅਤੇ ਉਸ ਨੂੰ ਰਾਜਨੀਤੀ ਦੀ ਜੰਗ ਦਾ ਅਖਾੜਾ ਬਣਾ ਦੇਣ
ਕਰਕੇ ਹੋਇਆ ਹੈ। ਇਸ ਵਜਹ ਕਰਕੇ ਹੀ ਲੋਕ ਗੁਰਦੁਆਰੇ ਵਰਗੀ ਪਵਿੱਤਰ
ਥਾਂ ਨੂੰ ਧੜੇਬੰਦੀ ਦੀ ਭਾਵਨਾ ਨਾਲ ਵੇਖਣ ਲੱਗ ਪਏ ਹਨ, ਅਤੇ ਜਿਸਦਾ
ਨਤੀਜਾ ਸਿਖ ਪੰਥ ਦੀਆਂ ਸ਼ਾਨਾਮੱਤੀ ਵਿਰਾਸਤਾਂ ਨੂੰ ਢਾਹ ਲੱਗਣ ਦੇ ਰੂਪ ਵਿਚ ਨਿਕਲ ਰਿਹਾ ਹੈ।
ਜਿਨ੍ਹਾ ਚਿਰ ਗੁਰਦੁਆਰਿਆਂ ਦਾ ਪ੍ਰਬੰਧ ਗੁਰਮਤਿ ਨੂੰ ਪ੍ਰਣਾਏ ਲੋਕਾਂ ਦੇ ਹੱਥਾਂ ਵਿਚ ਨਹੀਂ
ਆ ਜਾਂਦਾ, ਅਤੇ ਗੁਰਦੁਆਰੇ ਵਰਗੀ ਸੰਸਥਾਂ ਧੜੇਬੰਦੀ ਦੇ ਜਾਲ ਚੋਂ
ਨਹੀਂ ਨਿਕਲਦੀ ਗੁਰਮਤਿ ਦਾ ਸਹੀ ਆਸ਼ੇ ਅਨੁਸਾਰ ਪ੍ਰਚਾਰ ਸੰਭਵ ਹੀ ਨਹੀਂ ਹੋ ਸਕਦਾ। ਹਰਜਿੰਦਰ ਸਿੰਘ ਸਭਰਾਅ
98555-98833 |